ਮੁੰਬਈ— ਬਾਲੀਵੁੱਡ ਅਭਿਨੇਤਾ ਅਨਿਲ ਕਪੂਰ ਦਾ ਕਹਿਣਾ ਹੈ ਕਿ ਉਹ ਆਪਣੇ ਕਰੀਅਰ ਵਿਚ ਸਭ ਤੋਂ ਵੱਧ ਰਾਜ ਕਪੂਰ ਤੋਂ ਪ੍ਰਭਾਵਿਤ ਹਨ। ਅਨਿਲ ਕਪੂਰ ਤੋਂ ਜਦੋਂ ਪੁੱਛਿਆ ਗਿਆ ਕਿ ਉਹ ਆਪਣੇ ਜੀਵਨ ਵਿਚ ਸਭ ਤੋਂ ਵੱਧ ਕਿਸ ਤੋਂ ਪ੍ਰਭਾਵਿਤ ਹੋਏ ਹਨ ਤਾਂ ਉਨ੍ਹਾਂ ਕਿਹਾ ਕਿ ਬਿਨਾਂ ਕਿਸੇ ਚਰਚਾ ਤੋਂ ਮੈਂ ਰਾਜ ਕਪੂਰ ਦਾ ਨਾਂ ਲਵਾਂਗਾ। ਉਹ ਮਹਾਨ ਸ਼ੋਅਮੈਨ, ਬਿਹਤਰੀਨ ਐਂਟਰਟੇਨਰ ਤੇ ਮਹਾਨ ਨਿਰਦੇਸ਼ਕ ਹਨ ਅਤੇ ਉਨ੍ਹਾਂ ਦੀਆਂ ਫਿਲਮਾਂ ਵੀ ਬਹੁਤ ਮਨੋਰੰਜਕ ਹੁੰਦੀਆਂ ਸਨ।
ਰਾਜ ਕਪੂਰ ਦੀਆਂ ਫਿਲਮਾਂ ਦੀ ਅਹਿਮੀਅਤ ਇੰਨੀ ਜ਼ਿਆਦਾ ਹੈ ਕਿ ਅੱਜ ਦੇ ਸਮੇਂ ਵਿਚ ਵੀ ਉਨ੍ਹਾਂ ਦੀਆਂ ਫਿਲਮਾਂ ਪ੍ਰਸੰਗਿਕ ਹਨ, ਭਾਵੇਂ ਉਹ 'ਸ਼੍ਰੀ 420' ਹੋਵੇ, 'ਆਵਾਰਾ' ਹੋਵੇ ਜਾਂ 'ਮੇਰਾ ਨਾਮ ਜੋਕਰ'। ਹੀਰੋਇਨਾਂ ਨੂੰ ਉਨ੍ਹਾਂ ਤੋਂ ਬਿਹਤਰ ਫਿਲਮਾਂ ਵਿਚ ਕਿਸੇ ਨੇ ਪੇਸ਼ ਨਹੀਂ ਕੀਤਾ ਸੀ। ਉਨ੍ਹਾਂ ਦੀਆਂ ਫਿਲਮਾਂ ਹਮੇਸ਼ਾ ਵੱਖਰੀਆਂ ਹੀ ਹੁੰਦੀਆਂ ਸਨ।
ਉਹ ਇਕ ਅਜਿਹੇ ਕਲਾਕਾਰ ਸਨ, ਜੋ ਅਭਿਨੇਤਰੀਆਂ ਨੂੰ ਪਰਦੇ 'ਤੇ ਖੂਬਸੂਰਤੀ ਨਾਲ ਉਤਾਰਨਾ ਜਾਣਦੇ ਸਨ। ਇਸ ਲਈ ਇਸ ਪੂਰੀ ਇੰਡਸਟਰੀ ਵਿਚੋਂ ਉਨ੍ਹਾਂ ਦਾ ਮੇਰੇ ਜੀਵਨ 'ਤੇ ਸਭ ਤੋਂ ਵੱਧ ਪ੍ਰਭਾਵ ਹੈ।