ਮੁੰਬਈ— 'ਮੋਗੈਂਬੋ' ਦਾ ਮਸ਼ਹੂਰ ਕਿਰਦਾਰ ਨਿਭਾਉਣ ਵਾਲੇ ਅਮਰੀਸ਼ ਪੁਰੀ ਬਾਲੀਵੁੱਡ 'ਚ ਹੀਰੋ ਬਣਨ ਦਾ ਸੁਪਨਾ ਲੈ ਕੇ ਮੁੰਬਈ ਆਏ ਸਨ ਪਰ ਕਿਸਮਤ ਨੇ ਉਨ੍ਹਾਂ ਨੂੰ ਵਿਲੇਨ ਬਣਾ ਦਿੱਤਾ। ਅਮਰੀਸ਼ ਪੁਰੀ ਨੂੰ ਅੱਜ ਵੀ ਬਾਲੀਵੁੱਡ ਦਾ ਬੈਸਟ ਵਿਲੇਨ ਮੰਨਿਆ ਜਾਂਦਾ ਹੈ। ਬਾਲੀਵੁੱਡ ਦਾ ਇਹ ਮਹਾਨ ਖਲਨਾਇਕ ਅੱਜ ਦੁਨੀਆਂ 'ਚ ਨਹੀਂ ਹੈ। ਅਮਰੀਸ਼ ਪੁਰੀ ਅੱਜ ਜੇਕਰ ਸਾਡੇ ਵਿਚਕਾਰ ਹੁੰਦੇ ਤਾਂ 85 ਸਾਲ ਦੇ ਹੋ ਗਏ ਹੁੰਦੇ।
ਜਾਣਾਕਾਰੀ ਮੁਤਾਬਕ ਹੀਰੋ ਬਣਨ ਦਾ ਸੁਪਨਾ ਲੈ ਕੇ ਮੁੰਬਈ ਆਏ ਅਮਰੀਸ਼ ਪਹਿਲੇ ਹੀ ਸਕ੍ਰੀਨ ਟੈਸਟ 'ਚ ਫੇਲ ਹੋ ਗਏ ਸਨ। ਬਾਅਦ 'ਚ ਉਨ੍ਹਾਂ ਨੇ ਭਾਰਤੀ ਜੀਵਨ ਬੀਮਾ ਨਿਗਮ (ਐੱਲ.ਆਈ.ਸੀ.) 'ਚ ਨੌਕਰੀ ਕਰ ਲਈ। ਬੀਮਾ ਕੰਪਨੀ ਦੀ ਨੌਕਰੀ ਦੇ ਨਾਲ ਹੀ ਉਹ ਪ੍ਰਿਥਵੀ ਥੀਏਟਰ 'ਚ ਕੰਮ ਕਰਨ ਲੱਗੇ। ਥੀਏਟਰ ਕਰਦੇ ਹੀ ਹੌਲੀ-ਹੌਲੀ ਉਹ ਟੀ ਵੀ ਵਿਗਿਆਪਨਾਂ 'ਚ ਆਉਣ ਲੱਗੇ, ਜਿੱਥੋਂ ਉਹ ਫਿਲਮਾਂ 'ਚ ਵਿਲੇਨ ਦੇ ਕਿਰਦਾਰ ਤੱਕ ਪਹੁੰਚੇ।
39 ਦੀ ਉਮਰ 'ਚ ਮਿਲਿਆ ਬਾਲੀਵੁੱਡ 'ਚ ਬ੍ਰੇਕ
ਅਮਰੀਸ਼ ਨੂੰ ਬਾਲੀਵੁੱਡ 'ਚ ਪਹਿਲਾ ਰੋਲ 39 ਸਾਲ ਦੀ ਉਮਰ 'ਚ ਮਿਲਿਆ ਸੀ। ਸੁਨੀਲ ਦੱਤ ਅਤੇ ਵਹੀਦਾ ਰਹਿਮਾਨ ਸਟਾਰਰ ਫਿਲਮ 'ਰੇਸ਼ਮਾ ਔਰ ਸ਼ੇਰਾ' 'ਚ ਉਨ੍ਹਾਂ ਨੇ ਰਹਿਮਤ ਖਾਨ ਦੇ ਵਿਅਕਤੀ ਦਾ ਰੋਲ ਪਲੇਅ ਕੀਤਾ ਸੀ।
ਬਾਅਦ 'ਚ ਅਮਰੀਸ਼ ਪੁਰੀ ਨੇ ਵਿਲੇਨ ਦੇ ਰੂਪ 'ਚ ਕਈ ਦਮਦਾਰ ਭੂਮਿਕਾਵਾਂ ਨਿਭਾਈਆਂ। ਫਿਲਮਾਂ 'ਚ ਉਨ੍ਹਾਂ ਦੇ ਵੱਖ-ਵੱਖ ਗੈਟਅੱਪ ਕਿਸੇ ਨੂੰ ਵੀ ਡਰਾਉਣ ਲਈ ਕਾਫੀ ਹੁੰਦੇ ਸਨ। 'ਅਜੂਬਾ' 'ਚ ਵਜ਼ੀਰ-ਏ-ਆਲਾ, 'ਮਿਸਟਰ ਇੰਡੀਆ' 'ਚ 'ਮੋਗੈਂਬੋ', 'ਨਗੀਨਾ' 'ਚ ਭੈਰੋਨਾਥ, 'ਤਹਿਲਕਾ' 'ਚ ਜਨਰਲ ਡੋਂਗ ਦਾ ਗੈਟਅੱਪ ਅੱਜ ਵੀ ਲੋਕ ਭੁਲਾ ਨਹੀਂ ਪਾਏ ਹਨ।
ਬ੍ਰੇਨ ਹੇਮਰੇਜ ਨਾਲ ਹੋਈ ਮੌਤ
22 ਜੂਨ 1932 ਨੂੰ ਲਾਹੌਰ, ਪੰਜਾਬ (ਹੁਣ ਪਾਕਿਸਤਾਨ) 'ਚ ਜਨਮੇ ਅਮਰੀਸ਼ 12 ਜਨਵਰੀ, 2005 ਨੂੰ ਬ੍ਰੇਨ ਹੇਮਰੇਜ ਦੇ ਕਾਰਨ ਦੁਨੀਆ ਨੂੰ ਅਲਵਿਦਾ ਕਹਿ ਗਏ।
ਉਨ੍ਹਾਂ ਦੀ ਮੌਤ ਮੁੰਬਈ 'ਚ ਹੋਈ ਸੀ। ਜਦੋਂ ਉਨ੍ਹਾਂ ਦੀ ਮੌਤ ਹੋਈ, ਤਾਂ ਕਈ ਅਖਬਾਰਾਂ ਨੇ 'ਮੋਗੈਂਬੋ ਖਾਮੋਸ਼ ਹੋਇਆ' ਹੈਡਲਾਈਨ ਬਣਾਈ। ਉਨ੍ਹਾਂ ਦੀ ਮੌਤ 'ਤੇ ਦੁਨੀਆ ਭਰ 'ਚ ਉਨ੍ਹਾਂ ਦੇ ਕਰੋੜਾਂ ਪ੍ਰਸ਼ੰਸਕਾਂ 'ਚ ਉਦਾਸੀ ਛਾ ਗਈ ਸੀ।