ਜਲੰਧਰ (ਬਿਊਰੋ)— ਅੱਜ ਸਵੇਰੇ ਹੀ ਪੰਜਾਬੀ ਫਿਲਮ 'ਲਾਵਾਂ ਫੇਰੇ' ਦੀ ਟੀਮ ਵਲੋਂ ਐਤਵਾਰ ਨੂੰ ਫਿਲਮ ਦੀ ਭਾਰਤ 'ਚ ਕੀਤੀ ਕਮਾਈ ਦੇ ਅੰਕੜੇ ਜਾਰੀ ਕੀਤੇ ਗਏ ਸਨ। ਫਿਲਮ ਨੇ ਜਿਥੇ ਸਿਰਫ ਐਤਵਾਰ ਨੂੰ ਭਾਰਤ 'ਚ 1 ਕਰੋੜ 17 ਲੱਖ ਰੁਪਏ ਦੀ ਕਮਾਈ ਕੀਤੀ, ਉਥੇ ਤਿੰਨ ਦਿਨਾਂ 'ਚ ਭਾਰਤ ਸਮੇਤ ਦੁਨੀਆ ਭਰ 'ਚ ਕੁਲ 5.15 ਕਰੋੜ ਰੁਪਏ ਦੀ ਕਮਾਈ ਕਰ ਲਈ ਹੈ।
ਇਸ ਦੇ ਨਾਲ ਹੀ 'ਲਾਵਾਂ ਫੇਰੇ' ਸਾਲ 2018 ਦੀ ਪਹਿਲੀ ਬਲਾਕਬਸਟਰ ਪੰਜਾਬੀ ਫਿਲਮ ਬਣ ਗਈ ਹੈ। ਫਿਲਮ ਦੇ ਤਿੰਨ ਦਿਨਾਂ ਭਾਵ ਸ਼ੁੱਕਰਵਾਰ, ਸ਼ਨੀਵਾਰ ਤੇ ਐਤਵਾਰ ਨੂੰ ਕਮਾਈ ਦੇ ਅੰਕੜੇ ਵੱਖ-ਵੱਖ ਦੇਸ਼ਾਂ 'ਚ ਹੇਠ ਲਿਖੇ ਅਨੁਸਾਰ ਹਨ—
ਆਸਟ੍ਰੇਲੀਆ ਤੇ ਨਿਊਜ਼ੀਲੈਂਡ : 84 ਲੱਖ ਰੁਪਏ
ਉੱਤਰੀ ਅਮਰੀਕਾ : 90 ਲੱਖ ਰੁਪਏ
ਯੂ. ਕੇ. : 33 ਲੱਖ ਰੁਪਏ
ਹੋਰ ਦੇਸ਼ : 3 ਲੱਖ ਰੁਪਏ
ਭਾਰਤ : 3 ਕਰੋੜ 5 ਲੱਖ ਰੁਪਏ
ਦੱਸਣਯੋਗ ਹੈ ਕਿ ਫਿਲਮ ਦੇ ਵਰਲਡਵਾਈਡ ਡਿਸਟ੍ਰੀਬਿਊਸ਼ਨ ਦੀ ਜ਼ਿੰਮੇਵਾਰੀ ਓਮਜੀ ਗਰੁੱਪ ਤੇ ਗਰੈਂਡ ਸ਼ੋਅਬਿਜ਼ ਨੂੰ ਸੌਂਪੀ ਗਈ ਹੈ। ਸਮੀਪ ਕੰਗ ਵਲੋਂ ਡਾਇਰੈਕਟ ਕੀਤੀ 'ਲਾਵਾਂ ਫੇਰੇ' ਇਕ ਭਰਪੂਰ ਕਾਮੇਡੀ ਫਿਲਮ ਹੈ, ਜਿਸ 'ਚ ਰੌਸ਼ਨ ਪ੍ਰਿੰਸ, ਰੁਬੀਨਾ ਬਾਜਵਾ, ਗੁਰਪ੍ਰੀਤ ਘੁੱਗੀ, ਕਰਮਜੀਤ ਅਨਮੋਲ, ਬੀ. ਐੱਨ. ਸ਼ਰਮਾ ਤੇ ਹਾਰਬੀ ਸੰਘਾ ਮੁੱਖ ਭੂਮਿਕਾ ਨਿਭਾਅ ਰਹੇ ਹਨ।
ਕਰਮਜੀਤ ਅਨਮੋਲ ਇਸ ਫਿਲਮ ਦੇ ਪ੍ਰੋਡਿਊਸਰ ਵੀ ਹਨ। 16 ਫਰਵਰੀ ਨੂੰ ਰਿਲੀਜ਼ ਹੋਈ 'ਲਾਵਾਂ ਫੇਰੇ' ਫਿਲਮ ਤੋਂ ਇਹ ਉਮੀਦ ਕੀਤੀ ਜਾ ਰਹੀ ਹੈ ਕਿ ਹਫਤੇ ਦੇ ਅੰਦਰ ਇਹ ਫਿਲਮ 8 ਕਰੋੜ ਰੁਪਏ ਦੀ ਕਮਾਈ ਦਾ ਅੰਕੜਾ ਪਾਰ ਕਰ ਲਵੇਗੀ।