ਮੁੰਬਈ(ਬਿਊਰੋ)— 'ਆਸਕਰ ਐਵਾਰਡ 2018' ਦੀ ਦੇਸ਼ਾਂ-ਵਿਦੇਸ਼ਾਂ 'ਚ ਧੂਮ ਜਾਰੀ ਹੈ। ਇਸ ਮੌਕੇ ਅਸੀਂ ਭਾਰਤ ਦੇ ਇਕ ਅਜਿਹੇ ਆਟੋ ਡਰਾਈਵਰ ਦੀ ਕਹਾਣੀ ਦੱਸ ਰਹੇ ਹਾਂ, ਜਿਸ ਦੀ ਲਿਖੀ ਫਿਲਮ ਆਸਕਰ 'ਚ ਪਹੁੰਚ ਚੁੱਕੀ ਹੈ। ਤੁਸੀਂ ਸੋਚ ਰਹੇ ਹੋਵੋਗੇ ਕਿ ਇਕ ਆਟੋ ਡਰਾਈਵਰ ਦੀ ਲਿਖੀ ਫਿਲਮ ਆਸਕਰ 'ਚ ਕਿਵੇਂ ਪਹੁੰਚ ਸਕਦੀ ਹੈ? ਪਰ ਇਹ ਸੱਚ ਹੈ। ਅਸੀਂ ਜਿਸ ਦੀ ਗੱਲ ਕਰ ਰਹੇ ਹਾਂ ਉਹ ਕੋਈ ਮਾਮੂਲੀ ਵਿਅਕਤੀ ਨਹੀਂ ਹੈ। ਇਸ ਆਟੋ ਡਰਾਈਵਰ ਦੀ ਲਿਖੀ ਤਮਿਲ ਫਿਲਮ 'ਨੈਸ਼ਨਲ ਐਵਾਰਡ ਵੀ ਜਿੱਤ ਚੁੱਕੀ ਹੈ।
ਫਿਲਮ ਸੀ 'ਵਿਸਾਰਨਾਈ', ਜਿਸ ਨੂੰ 2017 'ਚ ਆਸਕਰ ਐਵਾਰਡਜ਼ ਦੀ ਫਾਰੇਨ ਲੈਂਗਵੇਜ ਕੈਟੇਗਰੀ 'ਚ ਭਾਰਤ ਵਲੋਂ ਅਧਿਕਾਰਤ ਤੌਰ 'ਤੇ ਐਂਟਰੀ ਮਿਲੀ ਸੀ। ਇਸ ਨੂੰ ਐਵਾਰਡ ਤਾਂ ਨਹੀਂ ਮਿਲਿਆ ਪਰ ਦੁਨੀਆਭਰ 'ਚ ਇਸ ਦੀ ਚਰਚਾ ਕਾਫੀ ਹੋਈ। ਫਿਲਮ ਦੇ ਨਾਲ-ਨਾਲ ਚਰਚਾ ਇਸ ਦੇ ਲੇਖਕ ਦੀ ਵੀ ਹੋਈ। ਫਿਲਮ ਦੀ ਕਹਾਣੀ ਐੱਮ. ਚੰਦਰਾ ਕੁਮਾਰ ਨੇ ਲਿਖੀ ਸੀ।
ਐੱਮ ਚੰਦਰਾ ਕੁਮਾਰ ਤਾਮਿਲਨਾਡੂ ਦੇ ਕੋਇੰਬਟੂਰ 'ਚ ਆਟੋ ਚਲਾਉਂਦੇ ਹਨ। ਅਸਲ 'ਚ ਐੱਮ. ਚੰਦਰਾ ਕੁਮਾਰ ਨੇ ਫਿਲਮ 'ਚ ਆਪਣੀ ਹੀ ਜ਼ਿੰਦਗੀ ਦੀ ਇਕ ਵੱਡੀ ਘਟਨਾ ਨੂੰ ਕਹਾਣੀ ਦੀ ਸ਼ਕਲ 'ਚ ਪਿਰੋ ਦਿੱਤਾ ਸੀ। ਸਾਲ 1983 'ਚ ਪੁਲਸ ਨੇ ਉਨ੍ਹਾਂ ਨੂੰ ਪੁੱਛਗਿਛ ਲਈ ਗ੍ਰਿਫਤਾਰ ਕੀਤਾ ਸੀ। ਗ੍ਰਿਫਤਾਰੀ ਤੋਂ ਬਾਅਦ ਪੁਲਸ ਨੇ ਉਨ੍ਹਾਂ 'ਤੇ ਬੇਹੱਦ ਅੱਤਿਆਚਾਰ ਕੀਤੇ।
ਪੁਲਸ ਦੀ ਬੇਰਹਿਮੀ ਤੋਂ ਬਚਣ ਲਈ ਉਨ੍ਹਾਂ ਨੇ ਗੁਨਾਹ ਕਬੂਲ ਕਰ ਲਏ। ਫਿਰ ਸਾਢੇ ਪੰਜ ਮਹੀਨਿਆਂ ਦੀ ਸਜ਼ਾ ਤੋਂ ਬਾਅਦ ਉਨ੍ਹਾਂ ਨੂੰ ਰਿਹਾਅ ਕਰ ਦਿੱਤਾ ਗਿਆ। ਆਪਣੀ ਜ਼ਿੰਦਗੀ ਦੀ ਇਸ ਘਟਨਾ ਤੇ ਪੁਲਸ ਵਲੋਂ ਦਿੱਤਾ ਗਈ ਮਾਨਸਿਕ ਤੇ ਸਰੀਰਕ ਦੁੱਖ ਉਨ੍ਹਾਂ ਦੇ ਦਿਮਾਗ 'ਚ ਘਰ ਕਰ ਗਈ ਸੀ। ਉਨ੍ਹਾਂ ਨੇ ਇਸ ਪੂਰੀ ਘਟਨਾ ਨੂੰ ਇਕ ਨਾਵਲ ਦੀ ਸ਼ਕਲ ਦੇ ਦਿੱਤੀ।
ਉਨ੍ਹਾਂ ਨੇ 'ਲਾਕ-ਅੱਪ' ਨਾਂ ਨਾਲ ਇਕ ਨਾਵਲ ਲਿਖਿਆ। ਆਸਕਰ 2017 ਲਈ ਨਾਮਜ਼ਦ ਹੋਈ ਫਿਲਮ 'ਵਿਸਾਰਨਾਈ' ਐੱਮ ਚੰਦਰਾ ਕੁਮਾਰ ਦੇ ਨਾਵਲ 'ਲਾਕ-ਅੱਪ 'ਤੇ ਹੀ ਆਧਾਰਿਤ ਹੈ। ਜ਼ਿੰਦਗੀ ਦੀ ਅਸਲੀ ਘਟਨਾ 'ਤੇ ਆਧਾਰਿਤ ਇਹ ਫਿਲਮ ਦਰਸ਼ਕਾਂ ਦੇ ਦਿਲ-ਦਿਮਾਗ 'ਤੇ ਡੂੰਘੀ ਛਾਪ ਛੱਡਣ 'ਚ ਸਫਲ ਹੋਈ। 'ਵਿਸਾਰਨਾਈ' ਦੇ ਲੇਖਕ ਐੱਮ ਚੰਦਰਾ ਕੁਮਾਰ, ਕੁਮਾਰ ਆਟੋ ਚੰਦਰਨ ਦੇ ਰੂਪ 'ਚ ਮਸ਼ਹੂਰ ਹੋ ਚੁੱਕੇ ਹਨ। ਉਹ ਹੁਣ ਤੱਕ 6 ਕਿਤਾਬਾਂ ਵੀ ਲਿਖ ਚੁੱਕੇ ਹਨ।
