ਨਵੀਂ ਦਿੱਲੀ(ਬਿਊਰੋ)— ਮਸ਼ਹੂਰ ਪਾਕਿਸਤਾਨੀ ਗਾਇਕਾ ਮੀਸ਼ਾ ਸ਼ਫੀ ਵੱਲੋਂ ਲਾਏ ਗਏ ਸਰੀਰਕ ਸੋਸ਼ਣ ਦੇ ਇਲਜ਼ਾਮਾਂ ਤੋਂ ਬਾਅਦ ਪਾਕਿਸਤਾਨੀ ਕਲਾਕਾਰ ਅਲੀ ਜ਼ਫਰ 'ਤੇ ਤਿੰਨ ਹੋਰ ਔਰਤਾਂ ਨੇ ਜਿਨਸੀ ਸ਼ੋਸ਼ਣ ਦੇ ਇਲਜ਼ਾਮ ਲਾਏ ਹਨ। ਹਾਲਾਂਕਿ ਅਲੀ ਜ਼ਫ਼ਰ ਨੇ ਮੀਸ਼ਾ ਵੱਲੋਂ ਲਾਏ ਦੋਸ਼ਾਂ ਨੂੰ ਰੱਦ ਕਰ ਦਿੱਤਾ ਹੈ। ਹੁਣ ਇਨ੍ਹਾਂ ਤਿੰਨਾਂ ਮਹਿਲਾਵਾਂ ਦੇ ਇਲਜ਼ਾਮਾਂ ਨੇ ਅਲੀ ਨੂੰ ਮੁਸ਼ਕਲਿ 'ਚ ਪਾ ਦਿੱਤਾ ਹੈ।
ਮੇਕਅੱਪ ਆਰਟਿਸਟ ਲੀਨਾ ਗਨੀ ਨੇ ਦੋਸ਼ ਲਾਇਆ ਹੈ ਕਿ ਅਲੀ ਜ਼ਫਰ ਨੇ ਉਸ ਨੂੰ ਅਸ਼ਲੀਲ ਗੱਲਾਂ ਆਖੀਆਂ ਸਨ। ਇਸ ਤੋਂ ਇਲਾਵਾ ਬਲਾਗਰ ਹੁਮਨਾ ਰਜ਼ਾ ਨੇ ਦੋਸ਼ ਲਾਇਆ ਹੈ ਕਿ ਅਲੀ ਨੇ ਇਕ ਵਾਰ ਮੈਨੂੰ ਗਲਤ ਢੰਗ ਨਾਲ ਛੂਹਿਆ ਸੀ। ਮਹਿਲਾ ਪੱਤਰਕਾਰ ਮਹਿਮ ਜਾਵੇਗ ਨੇ ਅਲੀ 'ਤੇ ਇਲਜ਼ਾਮ ਲਾਉਂਦਿਆਂ ਕਿਹਾ ਕਿ ਉਸ ਨੇ ਮੇਰੀ ਭੈਣ (ਕਜ਼ਨ) ਦਾ ਚੁੰਮਣ ਲੈਣ ਦੀ ਕੋਸ਼ਿਸ਼ ਸੀ ਤੇ ਉਸ ਨੂੰ ਬਾਥਰੂਮ 'ਚ ਖਿੱਚ ਕੇ ਲੈ ਗਿਆ ਸੀ।
ਪਾਕਿਸਤਾਨੀ ਗਾਇਕਾ ਮੀਸ਼ਾ ਸ਼ਫੀ ਨੇ ਵੀਰਵਾਰ ਨੂੰ ਗਾਇਕ ਤੇ ਅਦਾਕਾਰ ਅਲੀ ਜ਼ਫਰ 'ਤੇ ਸਰੀਰਕ ਸ਼ੋਸ਼ਣ ਦੇ ਦੋਸ਼ ਲਾਏ ਸਨ। ਅਲੀ ਜ਼ਫਰ ਨਾ ਸਿਰਫ ਪਾਕਿਸਤਾਨ ਸਗੋਂ ਬਾਲੀਵੁੱਡ 'ਚ ਵੀ ਇਕ ਵੱਡਾ ਨਾਂ ਹੈ। ਮੀਸ਼ਾ ਨੇ ਸੋਸ਼ਲ ਮੀਡੀਆ 'ਤੇ ਪੋਸਟ ਪਾ ਕੇ ਲਿਖਿਆ, ''36 ਸਾਲਾ ਜ਼ਫਰ ਨੇ ਉਸ ਦਾ ਕਈ ਵਾਰ ਸ਼ੋਸ਼ਣ ਕੀਤਾ ਤੇ ਲਿਖਿਆ ਕਿ ਉਹ ਹੁਣ ਹੋਰ ਚੁੱਪ ਨਹੀਂ ਰਹਿ ਸਕਦੀ। ਉਸ ਨੇ ਜਿਨਸੀ ਸ਼ੋਸ਼ਣ ਵਿਰੁੱਧ ਚਲੀ ਵਿਸ਼ਵ ਵਿਆਪੀ ਹੈਸ਼ਟੈਗ ਕੰਪੇਨ #MeToo ਵੀ ਲਿਖਿਆ ਸੀ।