ਮੁੰਬਈ(ਬਿਊਰੋ)— ਦੇਸ਼ ਦੇ ਸਭ ਤੋਂ ਵੱਡੇ ਘਪਲੇ 'ਚੋਂ ਇਕ ਪੰਜਾਬ ਨੈਸ਼ਨਲ ਬੈਂਕ ਦੇ ਮੁੱਖ ਸਾਜਿਸ਼ਕਰਤਾ ਨੀਰਵ ਮੋਦੀ ਨਾਲ ਕਈ ਬਾਲੀਵੁੱਡ ਹਸਤੀਆਂ ਦੇ ਨਾਂ ਜੁੜ ਰਹੇ ਹਨ। ਪ੍ਰਿਯੰਕਾ ਚੋਪੜਾ ਵੀ ਨੀਰਵ ਮੋਦੀ ਨਾਲ ਆਪਣੇ ਸੰਬੰਧਾਂ ਨੂੰ ਲੈ ਕੇ ਸਵਾਲਾਂ ਦੇ ਘੇਰੇ 'ਚ ਆ ਗਈ ਸੀ। ਹੁਣ ਪ੍ਰਿਯੰਕਾ ਚੋਪੜਾ ਦੀ ਅਦਾਕਾਰਾ ਭੈਣ ਪਰਿਣੀਤੀ ਚੋਪੜਾ ਉਨ੍ਹਾਂ ਦੇ ਬਚਾਅ 'ਚ ਆ ਗਈ ਹੈ।
ਹਾਲ ਹੀ 'ਚ ਇਕ ਸਟੋਰ ਦੇ ਲਾਂਚ ਦੌਰਾਨ ਪਰਿਣੀਤੀ ਨੇ ਦੱਸਿਆ ਕਿ ਕਿਸ ਤਰ੍ਹਾਂ ਕਲਾਕਾਰਾਂ ਨੂੰ ਗੈਰ ਜ਼ਰੂਰੀ ਢੰਗ ਨਾਲ ਵਿਵਾਦਾਂ 'ਚ ਘੜੀਸਿਆ ਜਾਂਦਾ ਹੈ। ਪਰਿਣੀਤੀ ਨੇ ਕਿਹਾ, ''ਕੋਈ ਕਲਾਕਾਰ ਜਦੋਂ ਕਿਸੇ ਬ੍ਰਾਂਡ ਨੂੰ ਪੇਸ਼ ਕਰ ਰਿਹਾ ਹੈ ਤਾਂ ਉਹ ਸਿਰਫ ਆਪਣਾ ਕੰਮ ਕਰ ਰਿਹਾ ਹੈ। ਅਸੀਂ ਉਸ ਉਤਪਾਦ ਨੂੰ ਬਣਾ ਨਹੀਂ ਰਹੇ ਤੇ ਨਾ ਹੀ ਮੈਨਿਊਫੈਕਚਰ ਕਰ ਰਹੇ ਹਾਂ।
ਅਸੀਂ ਸਿਰਫ ਆਪਣਾ ਕੰਮ ਕਰ ਰਹੇ ਹਾਂ। ਹਾਲਾਂਕਿ ਕਿਸੇ ਵੀ ਬਿਜ਼ਨੈੱਸ ਡੀਲ ਵਾਂਗ ਹੀ ਸਾਡੀ ਆਪਣੀ ਕਾਨੂੰਨੀ ਟੀਮ, ਬਿਜ਼ਨੈੱਸ ਟੀਮ ਤੇ ਪੀ. ਆਰ. ਟੀਮਸ ਹੁੰਦੀਆਂ ਹਨ।'' ਜ਼ਿਕਰਯੋਗ ਹੈ ਕਿ ਨੀਰਵ ਮੋਦੀ ਦੇ ਪੀ. ਐੱਨ. ਬੀ. ਫ੍ਰਾਡ ਕੇਸ ਨੇ ਹਾਲ ਹੀ 'ਚ ਦੇਸ਼ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ ਤੇ ਅਦਾਕਾਰਾ ਪ੍ਰਿਯੰਕਾ ਚੋਪੜਾ ਕਿਉਂਕਿ ਨੀਰਵ ਦੇ ਜਿਊਲਰੀ ਵਾਲੇ ਐਡ 'ਚ ਬ੍ਰਾਂਡ ਅੰਬੈਸਡਰ ਸੀ ਇਸ ਲਈ ਉਨ੍ਹਾਂ ਨੂੰ ਵੀ ਸਵਾਲਾਂ ਦੇ ਘੇਰੇ 'ਚ ਆਉਣਾ ਪਿਆ।
