ਮੁੰਬਈ (ਬਿਊਰੋ)— ਸਾਊਥ ਦੀਆਂ ਫਿਲਮਾਂ ਹੋਣ ਤੇ ਉਨ੍ਹਾਂ 'ਚ ਐਕਸ਼ਨ ਸੀਨ ਨਾ ਹੋਣ ਅਜਿਹਾ ਤਾਂ ਹੋ ਹੀ ਨਹੀਂ ਸਕਦਾ। ਪ੍ਰਭਾਸ ਦੀ 'ਬਾਹੂਬਲੀ' ਤੋਂ ਬਾਅਦ ਹੁਣ ਉਡੀਕ ਹੈ ਉਨ੍ਹਾਂ ਦੀ ਫਿਲਮ 'ਸਾਹੋ' ਦੀ।
ਇਸ 'ਚ ਐਕਸ਼ਨ ਸੀਨਜ਼ ਦੀ ਭਰਮਾਰ ਹੈ। ਪ੍ਰਭਾਸ ਇਨ੍ਹੀਂ ਦਿਨੀਂ ਆਪਣੀ ਫਿਲਮ 'ਸਾਹੋ' ਦੀ ਸ਼ੂਟਿੰਗ ਖਤਮ ਕਰਨ 'ਚ ਲੱਗੇ ਹੋਏ ਹਨ। ਫਿਲਮ ਦੇ ਸੀਕਵੈਂਸ ਸੀਨ ਦੀ ਸ਼ੂਟਿੰਗ ਯੂ. ਏ. ਈ. 'ਚ ਹੋ ਰਹੀ ਹੈ।
ਫਿਲਮ ਨਾਲ ਜੁੜੀ ਵੱਡੀ ਖਬਰ ਸਾਹਮਣੇ ਆਈ ਹੈ ਕਿ ਇਸ ਫਿਲਮ ਦੇ ਸੀਕਵੈਂਸ ਸੀਨ ਦੀ ਸ਼ੂਟਿੰਗ ਲਈ ਘੱਟੋ-ਘੱਟ 90 ਕਰੋੜ ਖਰਚ ਕੀਤੇ ਗਏ ਹਨ। ਐਕਸ਼ਨ ਸੀਨ ਲਈ ਲਗਜ਼ਰੀ ਕਾਰਾਂ ਦਾ ਯੂਜ਼ ਕੀਤਾ ਗਿਆ ਹੈ। ਇਹ ਐਕਸ਼ਨ ਸੀਨਜ਼ ਇੰਟਰਨੈਸ਼ਨਲ ਸਟੰਟ ਕੋਰੀਓਗ੍ਰਾਫਰ ਕੇਨੀ ਬੇਟਸ ਨੇ ਡਾਇਰੈਕਟ ਕੀਤੇ ਹਨ।
ਇਸ ਫਿਲਮ ਨੂੰ ਅਸਲੀ ਦਿਖਾਉਣ ਲਈ 37 ਕਾਰਾਂ ਤੇ 5 ਟਰੱਕਾਂ ਦਾ ਇਸਤੇਮਾਲ ਕੀਤਾ ਗਿਆ ਹੈ, ਜਿਨ੍ਹਾਂ ਨੂੰ ਤਬਾਹ ਕੀਤਾ ਹੈ ਪ੍ਰਭਾਸ ਨੇ। ਇਨ੍ਹਾਂ ਸਭ ਦੀ ਵਰਤੋਂ ਇਸ ਲਈ ਕੀਤੀ ਗਈ ਤਾਂ ਜੋ ਲੋਕਾਂ ਨੂੰ ਦੇਖ ਕੇ ਇਹ ਨਕਲੀ ਨਾ ਲੱਗੇ।
ਪ੍ਰਭਾਸ ਦੀ 'ਸਾਹੋ' 'ਚ ਸ਼ਰਧਾ ਕਪੂਰ ਲੀਡ ਰੋਲ 'ਚ ਨਜ਼ਰ ਆਵੇਗੀ।
ਦੋਹਾਂ ਦੀ ਜੋੜੀ ਪਹਿਲੀ ਵਾਰ ਸਕ੍ਰੀਨ 'ਤੇ ਨਜ਼ਰ ਆਵੇਗੀ। ਫਿਲਮ 'ਚ ਇਨ੍ਹਾਂ ਦੋਹਾਂ ਤੋਂ ਇਲਾਵਾ ਨੀਲ ਨੀਤੀਨ ਮੁਕੇਸ਼, ਮਹੇਸ਼ ਮਾਂਜਰੇਕਰ, ਜੈਕੀ ਸ਼ਰਾਫ ਵੀ ਨਜ਼ਰ ਆਉਣਗੇ। ਪ੍ਰਭਾਸ ਇਸ ਫਿਲਮ 'ਚ ਕਾਫੀ ਵੱਖਰੇ ਅੰਦਾਜ਼ 'ਚ ਨਜ਼ਰ ਆਉਣਗੇ।