ਮੁੰਬਈ (ਬਿਊਰੋ)— ਬਾਲੀਵੁੱਡ ਅਭਿਨੇਤਾ ਰਿਤੇਸ਼ ਦੇਸ਼ਮੁੱਖ ਅੱਜ ਆਪਣਾ 39ਵਾਂ ਜਨਮਦਿਨ ਮਨਾ ਰਹੇ ਹਨ। 17 ਦਸੰਬਰ, 1978 ਨੂੰ ਜਨਮੇ ਰਿਤੇਸ਼ ਦੇਸ਼ਮੁੱਖ ਇਕ ਰਾਜਨੀਤੀਕ ਪਰਿਵਾਰ ਨਾਲ ਨਾਤਾ ਰੱਖਦੇ ਹਨ। ਉਨ੍ਹਾਂ ਦੇ ਪਿਤਾ ਵਿਲਾਸ ਰਾਓ ਦੇਸ਼ਮੁੱਖ ਮਹਾਰਾਸ਼ਟਰ ਦੇ ਮੰਤਰੀ ਰਹਿ ਚੁੱਕੇ ਸਨ। ਬਾਲੀਵੁੱਡ ਦੀ ਸਭ ਤੋਂ ਕਿਊਟ ਲਵ ਸਟੋਰੀ ਦੀ ਗੱਲ ਕਰੀਏ ਤਾਂ ਰਿਤੇਸ਼-ਜੇਨੇਲੀਆ ਦਾ ਨਾਂ ਪਹਿਲਾਂ ਦਿਮਾਗ 'ਚ ਆਉਂਦਾ ਹੈ। ਅੱਜ ਉਨ੍ਹਾਂ ਦੇ ਜਨਮਦਿਨ ਮੌਕੇ ਅਸੀਂ ਤੁਹਾਨੂੰ ਉਨ੍ਹਾਂ ਦੀ ਜ਼ਿੰਦਗੀ ਨਾਲ ਜੁੜੀਆਂ ਕਈ ਗੱਲਾਂ ਦੱਸਣ ਜਾ ਰਹੇ ਹਾਂ।
ਫਿਲਮੀ ਕਰੀਅਰ ਦੌਰਾਨ ਰਿਤੇਸ਼ ਕਈ ਹਿੱਟ ਫਿਲਮਾਂ 'ਚ ਕੰਮ ਕਰ ਚੁੱਕੇ ਹਨ। 'ਕਿਆ ਕੂਲ ਹੈ ਹਮ', 'ਮਾਲਾ ਮਾਲ ਵੀਕਲੀ', 'ਗਰੈਂਡ ਮਸਤੀ', 'ਏਕ ਵਿਲੇਨ', 'ਤੇਰੇ ਨਾਲ ਲਵ ਹੋ ਗਿਆ', 'ਹੇ ਬੇਬੀ' ਅਤੇ 'ਮਸਤੀ' ਜੋ ਕਿ ਬਾਲੀਵੁੱਡ ਦੀਆਂ ਸਫਲ ਫਿਲਮਾਂ 'ਚੋਂ ਇਕ ਹਨ। ਰਿਤੇਸ਼ ਨੇ ਬਾਲੀਵੁੱਡ ਕਰੀਅਰ ਦੀ ਸ਼ੁਰੂਆਤ 2003 'ਚ ਆਈ ਫਿਲਮ 'ਤੇਰੀ ਮੇਰੀ ਕਸਮ' ਨਾਲ ਕੀਤੀ। ਇਸ ਫਿਲਮ 'ਚ ਉਨ੍ਹਾਂ ਨਾਲ ਜੇਨੇਲੀਆ ਡਿਸੂਜ਼ਾ ਲੀਡ ਅਭਿਨੇਤਰੀ ਦੇ ਤੌਰ 'ਤੇ ਨਜ਼ਰ ਆਈ।
ਜੇਨੇਲੀਆ ਅਤੇ ਰਿਤੇਸ਼ ਦੋਵਾਂ ਦੀ ਇਹ ਪਹਿਲੀ ਫਿਲਮ ਸੀ। ਇਸ ਫਿਲਮ ਨਾਲ ਹੀ ਦੋਵਾਂ ਦੀ ਲਵਸਟੋਰੀ ਦੀ ਸ਼ੁਰੂਆਤ ਹੋਈ। ਕਰੀਬ 9 ਸਾਲ ਦੀ ਦੋਸਤੀ ਤੋਂ ਬਾਅਦ ਦੋਵਾਂ ਨੇ ਵਿਆਹ ਕਰ ਲਿਆ। ਅੱਜ ਉਨ੍ਹਾਂ ਦੇ ਦੋ ਬੇਟੇ ਰਾਹਿਲ ਅਤੇ ਰਿਹਾਨ ਹਨ।
ਰਿਤੇਸ਼ ਨੇ ਸਾਲ 2013 'ਚ ਆਪਣੀ ਪ੍ਰੋਡਕਸ਼ਨ ਹਾਊਸ ਦੀ ਸ਼ੁਰੂਆਤ ਕੀਤੀ ਸੀ ਅਤੇ ਸਭ ਤੋਂ ਪਹਿਲੀ ਮਰਾਠੀ ਫਿਲਮ 'ਬਲਕ ਪਲਕ' ਪ੍ਰਡਿਊਸ ਕੀਤੀ। ਇਸ ਫਿਲਮ ਨਾਲ ਉਨ੍ਹਾਂ ਨੂੰ ਕਾਫੀ ਸਰਾਹਣਾ ਮਿਲੀ ਅਤੇ ਇਸ ਫਿਲਮ ਨੇ ਕਈ ਐਵਾਰਡ ਜਿੱਤੇ ਸਨ।