ਮੁੰਬਈ (ਬਿਊਰੋ)— ਹਿੰਦੀ ਤੇ ਬੰਗਾਲੀ ਫਿਲਮਾਂ ਦੀ ਮਸ਼ਹੂਰ ਅਭਿਨੇਤਰੀ ਰਿਆ ਸੇਨ ਅੱਜ ਆਪਣਾ 36ਵਾਂ ਜਨਮਦਿਨ ਮਨਾ ਰਹੀ ਹੈ। 24 ਜਨਵਰੀ, 1981 ਨੂੰ ਕੋਲਕਾਤਾ 'ਚ ਜਨਮੀ ਰਿਆ ਨੂੰ ਫਿਲਮਾਂ 'ਚ ਜ਼ਿਆਦਾ ਪ੍ਰਸਿੱਧੀ ਹਾਸਲ ਨਹੀਂ ਹੋਈ ਪਰ ਵਿਵਾਦਾਂ ਨਾਲ ਉਹ ਅਕਸਰ ਜੁੜੀ ਰਹੀ। ਰਿਆ ਨੇ ਸਾਲ 2011 'ਚ ਆਈ ਫਿਲਮ 'ਸਟਾਈਲ' ਨਾਲ ਬਾਲੀਵੁੱਡ 'ਚ ਡੈਬਿਊ ਕੀਤਾ ਸੀ। ਫਿਲਮੀ ਕਰੀਅਰ ਦੌਰਾਨ ਰਿਆ ਕਰੀਬ 30 ਫਿਲਮਾਂ 'ਚ ਨਜ਼ਰ ਆ ਚੁੱਕੀ ਹੈ।
ਰਿਆ ਨਾਲ ਜੁੜੇ ਵਿਵਾਦਾਂ ਦੀ ਲਿਸਟ 'ਚ ਉਨ੍ਹਾਂ ਦੇ ਐੱਮ. ਐੱਮ. ਐੱਸ. ਨਾਲ ਜੁੜੀਆਂ ਖਬਰਾਂ ਤੋਂ ਲੈ ਕੇ ਰੇਵ ਪਾਰਟੀ ਤੱਕ ਦੇ ਕਿੱਸੇ ਸ਼ਾਮਿਲ ਹਨ। ਰਿਆ ਬਾਲੀਵੁੱਡ ਅਭਿਨੇਤਰੀ ਮੂਨਮੂਨ ਸੇਨ ਦੀ ਬੇਟੀ ਹੈ ਅਤੇ ਇਕ ਸਟਾਰ ਕਿੱਡ ਹੋਣ ਦੇ ਬਾਵਜੂਦ ਵੀ ਬਾਲੀਵੁੱਡ 'ਚ ਉਹ ਸਫਲ ਅਭਿਨੇਤਰੀ ਦੇ ਤੌਰ 'ਤੇ ਨਹੀਂ ਟਿੱਕ ਸਕੀ।
ਰਿਆ ਦੇ ਬਾਰੇ ਕਿਹਾ ਜਾਂਦਾ ਹੈ ਕਿ ਉਸਦੇ ਬੁਰੇ ਵਰਤਾਓ ਨੂੰ ਲੈ ਕੇ ਹਰ ਕੋਈ ਪ੍ਰੇਸ਼ਾਨ ਰਹਿੰਦਾ ਸੀ। ਉਨ੍ਹਾਂ ਬਾਰੇ ਇਹ ਮਸ਼ਹੂਰ ਹੈ ਕਿ ਉਹ ਨਿਰਦੇਸ਼ਕ ਤੋਂ ਲੈ ਕੇ ਸਪਾਟਬੁਆਏ ਤੱਕ ਕਿਸੇ ਨਾਲ ਸਹੀ ਢੰਗ ਨਾਲ ਗੱਲ ਨਹੀਂ ਕਰਦੀ ਅਤੇ ਛੋਟੀਆਂ-ਛੋਟੀਆਂ ਗੱਲਾਂ 'ਤੇ ਨਾਰਾਜ਼ ਹੋ ਜਾਂਦੀ ਸੀ।
ਰਿਆ ਇੰਡਸਟਰੀ 'ਚ ਅਫੇਅਰਜ਼ ਕਰਕੇ ਵੀ ਸੁਰਖੀਆਂ 'ਚ ਰਹੀ। ਬਾਲੀਵੁੱਡ ਅਭਿਨੇਤਾ ਅਕਸ਼ੇ ਖੰਨਾ ਤੋਂ ਲੈ ਕੇ ਸਲਮਾਨ ਰਸ਼ਦੀ ਤੱਕ ਦਾ ਨਾਂ ਉਨ੍ਹਾਂ ਨਾਲ ਜੁੜ ਚੁੱਕਿਆ ਹੈ। ਸਲਮਾਨ ਰਸ਼ਦੀ, ਰਿਆ ਨਾਲੋਂ ਦੋਗੁਣੀ ਉਮਰ ਦੇ ਹਨ। ਹਾਲਾਂਕਿ ਇਸ ਬਾਰੇ ਅਧਿਕਾਰਤ ਤੌਰ 'ਤੇ ਕੁਝ ਸਾਹਮਣੇ ਨਹੀਂ ਆਇਆ।
ਰਿਆ ਨੇ ਅਕਸ਼ੇ ਖੰਨਾ ਨਾਲ ਫਿਲਮ 'ਲਵ ਯੂ ਹਮੇਸ਼ਾ' 'ਚ ਕੰਮ ਕੀਤਾ ਸੀ ਅਤੇ ਇਸ ਦੌਰਾਨ ਹੀ ਦੋਵਾਂ ਦੀਆਂ ਨਜ਼ਦੀਕੀਆਂ ਵੱਧਣ ਲੱਗੀਆਂ ਅਤੇ ਫਿਰ ਦੋਵੇਂ ਇਕ ਦੂਜੇ ਨੂੰ ਡੇਟ ਕਰਨ ਲੱਗੇ। ਕੁਝ ਸਮੇਂ ਬਾਅਦ ਰਿਆ ਤੇ ਅਕਸ਼ੇ ਦਾ ਰਿਲੇਸ਼ਨ ਖਤਮ ਹੋ ਗਿਆ ਅਤੇ ਫਿਰ ਦੋਹਾਂ ਵਿਚਕਾਰ ਅਭਿਨੇਤਾ ਜੌਨ ਅਬ੍ਰਾਹਮ ਆ ਗਏ।
ਇਸ ਤੋਂ ਇਲਾਵਾ ਰਿਆ ਦਾ ਨਾਂ ਭਾਰਤੀ ਕ੍ਰਿਕਟ ਟੀਮ ਦੇ ਖਿਡਾਰੀ ਸ੍ਰੀਸੰਤ ਨਾਲ ਵੀ ਜੁੜ ਚੁੱਕਿਆ ਹੈ। 2011 'ਚ ਰਿਆ ਕਈ ਵਾਰ ਸਟੇਡੀਅਮ 'ਚ ਸ੍ਰੀਸੰਤ ਨੂੰ ਚੀਅਰ ਕਰਦੀ ਦੇਖੀ ਗਈ। ਦੋਹਾਂ ਨੂੰ ਰੈਸਟੋਰੈਂਟ 'ਚ ਕਈ ਵਾਰ ਇਕੱਠੇ ਘੁੰਮਦੇ ਦੇਖਿਆ ਗਿਆ ਸੀ।
