ਨਵੀਂ ਦਿੱਲੀ(ਬਿਊਰੋ)— ਅੱਜ ਭਾਰਤੀ ਸਾਬਕਾ ਕ੍ਰਿਕਟਰ ਤੇ ਫਾਸਟ ਗੇਂਦਬਾਜ਼ ਜਹੀਰ ਖਾਨ ਦੀ ਪਤਨੀ ਅਤੇ ਬਾਲੀਵੁੱਡ ਅਦਾਕਾਰਾ ਸਾਗਰਿਕਾ ਘਾਟਗੇ ਦਾ 31ਵਾਂ ਜਨਮਦਿਨ ਹੈ। ਸਾਗਰਿਕਾ ਨੇ ਬਾਲੀਵੁੱਡ ਦੀਆਂ ਕਈ ਫਿਲਮਾਂ 'ਚ ਕੰਮ ਕੀਤਾ ਹੈ ਪਰ ਉਨ੍ਹਾਂ ਨੂੰ ਅਸਲੀ ਪਛਾਣ 2007 'ਚ ਆਈ 'ਚੱਕ ਦੇ ਇੰਡੀਆ' ਨਾਲ ਮਿਲੀ।
ਇਸ ਫਿਲਮ 'ਚ ਉਹ ਨੈਸ਼ਨਲ ਲੈਵਲ ਦੀ ਹਾਕੀ ਖਿਡਾਰਣ ਦੇ ਕਿਰਦਾਰ 'ਚ ਸੀ ਤੇ ਉਸ ਕਿਰਦਾਰ ਲਈ ਉਨ੍ਹਾਂ ਨੂੰ ਨਾ ਸਿਰਫ ਸਰਾਹਨਾ ਮਿਲੀ ਬਲਕਿ ਘਰ-ਘਰ 'ਚ ਪਛਾਣ ਵੀ ਮਿਲੀ।
ਸਾਗਰਿਕਾ ਨੇ ਬਾਲੀਵੁੱਡ ਤੋਂ ਇਲਾਵਾ ਹੋਰ ਕਈ ਭਾਸ਼ਾਵਾਂ ਦੀਆਂ ਫਿਲਮਾਂ 'ਚ ਵੀ ਕੰਮ ਕੀਤਾ ਹੈ। ਸਾਗਰਿਕਾ ਨੇ 23 ਨਵੰਬਰ 2017 ਨੂੰ ਜ਼ਹੀਰ ਖਾਨ ਨਾਲ ਕੋਰਟ ਮੈਰਿਜ ਕੀਤੀ ਸੀ ਤੇ ਬਾਅਦ 'ਚ ਗ੍ਰੈਂਡ ਰਿਸੈਪਸ਼ਨ ਦਿੱਤਾ ਸੀ।
ਅੱਜ ਉਨ੍ਹਾਂ ਦੇ ਜਨਮਦਿਨ 'ਤੇ ਅਸੀਂ ਤੁਹਾਨੂੰ ਉਨ੍ਹਾਂ ਦੇ ਜੀਵਨ ਨਾਲ ਜੁੜੀਆਂ ਕੁਝ ਖਾਸ ਗੱਲਾਂ ਦੱਸ ਰਹੇ ਹਾਂ, ਜੋ ਸ਼ਾਇਦ ਹੀ ਤੁਸੀਂ ਜਾਣਦੇ ਹੋਵੋਗੇ।
ਨੈਸ਼ਨਲ ਲੈਵਲ ਪਲੇਅਰ
'ਚੱਕ ਦੇ ਇੰਡੀਆ' 'ਚ ਹਾਕੀ ਪਲੇਅਰ ਦਾ ਰੋਲ ਅਦਾ ਕਰਨ ਵਾਲੀ ਸਾਗਰਿਕਾ ਅਸਲ ਜੀਵਨ 'ਚ ਵੀ ਨੈਸ਼ਨਲ ਲੈਵਲ ਦੀ ਪਲੇਅਰ ਰਹਿ ਚੁੱਕੀ ਹੈ। ਬਹੁਤ ਘੱਟ ਲੋਕ ਜਾਣਦੇ ਹਨ ਕਿ ਉਹ ਅਸਲ ਜ਼ਿੰਦਗੀ 'ਚ ਵੀ ਹਾਕੀ ਖੇਡਣਾ ਜਾਣਦੀ ਹੈ। ਮੰਨਿਆ ਜਾਂਦਾ ਹੈ ਕਿ ਫਿਲਮ 'ਚ ਰੋਲ ਮਿਲਣ ਦੀ ਇਕ ਵਜ੍ਹਾ ਇਹ ਵੀ ਸੀ ਕਿ ਉਹ ਹਾਕੀ ਖੇਡਣਾ ਬਹੁਤ ਚੰਗੀ ਤਰ੍ਹਾਂ ਜਾਣਦੀ ਹੈ।
ਇਸ ਫਿਲਮ 'ਚ ਸ਼ਾਹਰੁਖ ਖਾਨ ਹਾਕੀ ਕੋਚ ਦੀ ਭੂਮਿਕਾ 'ਚ ਸਨ ਤੇ ਫਿਲਮ ਨੇ ਖੂਬ ਸੁਰਖੀਆਂ ਬਟੋਰੀਆਂ ਸਨ। ਹਾਕੀ ਪਲੇਅਰ ਤੋਂ ਇਲਾਵਾ ਸਾਗਰਿਕਾ ਦੇ ਬਾਰੇ 'ਚ ਬੇਹੱਦ ਘੱਟ ਲੋਕਾਂ ਨੂੰ ਪਤਾ ਹੈ ਕਿ ਉਨ੍ਹਾਂ ਦਾ ਸੰਬੰਧ ਰਾਜ ਘਰਾਣੇ ਨਾਲ ਹੈ।
ਸਾਗਰਿਕਾ ਦਾ ਜਨਮ ਮਹਾਰਾਸ਼ਟਰ ਦੇ ਕੋਲ੍ਹਾਪੁਰ 'ਚ ਹੋਇਆ ਸੀ ਤੇ ਕਰੀਬ 8 ਸਾਲ ਦੀ ਉਮਰ ਤੱਕ ਉਹ ਉੱਥੇ ਰਹੀ।
ਸਾਗਰਿਕਾ ਦਾ ਸੰਬੰਧ ਕੋਲ੍ਹਾਪੁਰ ਦੇ ਸ਼ਾਹੀ ਪਰਿਵਾਰ ਨਾਲ ਹੈ। ਸਾਗਰਿਕਾ ਦੇ ਪਰਦਾਦਾ ਸ਼ਾਹੋ ਮਹਾਰਾਜ ਕੋਲ੍ਹਾਪੁਰ ਦੇ ਮਹਾਰਾਜ ਸਨ। ਉੱਥੇ ਸਾਗਰਿਕਾ ਦੀ ਦਾਦੀ ਵੀ ਇਕ ਸ਼ਾਹੀ ਪਰਿਵਾਰ ਨਾਲ ਸੰਬੰਧ ਰੱਖਦੀ ਸੀ। ਸਾਗਰਿਕਾ ਦੀ ਦਾਦੀ ਸੀਤਾ ਰਾਜੇ ਘਾਟਗੇ ਇੰਦੌਰ ਦੇ ਤੀਜੇ ਮਹਾਰਾਜਾ ਤੁਕੋਜੀਰਾਓ ਹੋਲਕਰ ਦੀ ਬੇਟੀ ਸੀ।
ਮਸ਼ਹੂਰ ਐਕਟਰ ਦੀ ਬੇਟੀ ਹੈ ਸਾਗਰਿਕਾ
ਬਹੁਤ ਘੱਟ ਲੋਕ ਜਾਣਦੇ ਹਨ ਕਿ ਰਾਜ ਘਰਾਣੇ ਤੋਂ ਇਲਾਵਾ ਸਾਗਰਿਕਾ ਦਾ ਸੰਬੰਧ ਬਾਲੀਵੁੱਡ ਦੇ ਮਸ਼ਹੂਰ ਐਕਟਰ ਵਿਜੇਂਦਰ ਘਾਟਗੇ ਨਾਲ ਵੀ ਹੈ।
ਅਸਲ 'ਚ ਸਾਗਰਿਕਾ ਮਸ਼ਹੂਰ ਐਕਟਰ ਵਿਜੇਂਦਰ ਘਾਟਗੇ ਦੀ ਬੇਟੀ ਹੈ। ਵਿਜੇਂਦਰ ਲੀਡ ਹੀਰੋ ਤਾਂ ਨਹੀਂ ਪਰ ਬਤੌਰ ਸਹਾਇਕ ਕਲਾਕਾਰ ਕਈ ਫਿਲਮਾਂ 'ਚ ਕੰਮ ਕੀਤਾ ਹੈ ਤੇ ਆਪਣੀ ਇਕ ਵੱਖਰੀ ਪਛਾਣ ਬਣਾਈ ਹੈ।
ਹਾਲਾਂਕਿ ਉਹ ਸਾਗਰਿਕਾ ਦੇ ਫਿਲਮਾਂ 'ਚ ਕਦਮ ਰੱਖਣ ਤੋਂ ਵਧੇਰੇ ਖੁਸ਼ ਨਹੀਂ ਸਨ।
