ਜਲੰਧਰ— ਸਰਬਜੀਤ ਚੀਮਾ ਪੰਜਾਬੀ ਗਾਇਕੀ ਦੇ ਖੇਤਰ 'ਚ ਵੱਖਰੀ ਪਛਾਣ ਰੱਖਦਾ ਹੈ। ਅੱਜ ਉਨ੍ਹਾਂ ਦਾ ਜਨਮਦਿਨ ਹੈ। ਦਾ ਜਨਮ 14 ਜੂਨ 1968 ਨੂੰ ਜਲੰਧਰ 'ਚ ਹੋਇਆ। ਉਨ੍ਹਾਂ ਨੇ ਪੰਜਾਬ, ਪੰਜਾਬੀ ਤੇ ਪੰਜਾਬੀਅਤ ਦਾ ਝੰਡਾ ਬੁਲੰਦ ਕਰਨ ਲਈ ਹਮੇਸ਼ਾਂ ਸਿਰੜ ਕਾਇਮ ਰੱਖਿਆ ਹੈ।
ਉਨ੍ਹਾਂ ਦੀਆਂ ਕੈਸਿਟਾਂ ਤੇ ਫ਼ਿਲਮਾਂ ਦੇ ਸਿਰਲੇਖ ਹੀ ਵੇਖ ਲਏ ਜਾਣ ਤਾਂ ਉਸ ਦੀ ਜ਼ਹਿਨੀਅਤ ਭਲੀਭਾਂਤ ਸਮਝ ਆ ਜਾਂਦੀ ਹੈ। 'ਰੰਗਲਾ ਪੰਜਾਬ', 'ਪਿੰਡ ਦੀ ਕੁੜੀ', 'ਪੰਜਾਬ ਬੋਲਦਾ', 'ਆਪਣੀ ਬੋਲੀ ਆਪਣਾ ਦੇਸ' ਤੇ 'ਵੈਲਕਮ ਟੂ ਪੰਜਾਬ' ਆਦਿ ਉਸ ਦੀਆਂ ਫ਼ਿਲਮਾਂ ਤੇ ਐਲਬਮਾਂ ਉਸ ਨੂੰ ਤਮਾਮ ਫ਼ਨਕਾਰਾਂ ਵਿੱਚੋਂ ਵੱਖਰਾ ਸਾਬਤ ਕਰਦੀਆਂ ਹਨ।
ਸਰਬਜੀਤ ਦੇ ਹਿੱਟ ਗੀਤਾਂ ਦੀ ਸੂਚੀ ਬੜੀ ਲੰਮੀ ਹੈ ਪਰ 'ਮੇਲਾ ਵੇਖਦੀਏ ਮੁਟਿਆਰੇ', 'ਰੰਗਲਾ ਪੰਜਾਬ', 'ਤੇਰੇ ਲੱਕ ਦਾ ਹੁਲਾਰਾ ਰੰਗ ਰਾਰਾ ਰੀਰੀ ਰਾਰਾ', 'ਤੇਰੀ ਤੋਰ ਵੇਖ ਕੇ', 'ਚੰਡੀਗੜ੍ਹ ਸ਼ਹਿਰ ਦੀ ਕੁੜੀ', 'ਜੱਗਾ ਮਾਰਦਾ ਸ਼ੇਰ ਵਾਂਗੂ ਛਾਲਾਂ', 'ਸਾਂਝਾ ਏ ਪੰਜਾਬ' ਆਦਿ ਉਸ ਦੇ ਅਜਿਹੇ ਗੀਤ ਹਨ, ਜਿਨ੍ਹਾਂ ਦੀ ਧਮਾਲ ਹਰ ਸਮਾਗਮ 'ਚ ਪੈਂਦੀ ਸੁਣੀ ਜਾ ਸਕਦੀ ਹੈ।
ਸਰਬਜੀਤ ਦੇ ਜ਼ਿੰਦਗੀ ਦੇ ਮਾਪਦੰਡ ਵੀ ਆਪਣੇ ਹੀ ਹਨ। ਉਹ ਸ਼ੋਹਰਤ ਲਈ ਜੁਗਾੜਬਾਜ਼ੀ ਨਹੀਂ ਕਰਦਾ। ਵਕਤ ਦਾ ਉਹ ਬਹੁਤ ਕਦਰਦਾਨ ਹੈ ਅਤੇ ਉਸ ਦਾ ਮੁਕਾਬਲਾ ਸਿਰਫ਼ ਆਪਣੇ ਆਪ ਨਾਲ ਹੀ ਹੈ। ਉਹ ਆਪਣੀਆਂ ਖਾਮੀਆਂ ਖ਼ੁਦ ਲੱਭਣ ਅਤੇ ਉਨ੍ਹਾਂ ਨੂੰ ਦਰੁਸਤ ਕਰਨ ਦਾ ਹਾਮੀ ਹੈ। ਫੁਰਸਤ ਦਾ ਸਮਾਂ ਉਸ ਕੋਲ ਘੱਟ ਹੀ ਹੁੰਦਾ ਹੈ ਕਿਉਂਕਿ ਉਸ ਨੇ ਅਨੇਕ ਸਿਰਜਣਾਤਮਕ ਕੰਮਾਂ ਨੂੰ ਨੇਪਰੇ ਚਾੜ੍ਹਨ ਦਾ ਤਹੱਈਆ ਕੀਤਾ ਹੋਇਆ ਹੈ।
ਗਾਇਕੀ ਦੇ ਨਾਲ-ਨਾਲ ਉਸ ਦੀ ਸਟੇਜ ਅਦਾਇਗੀ ਵੀ ਖ਼ਾਸ ਤੌਰ 'ਤੇ ਲੋਕਾਂ ਦਾ ਧਿਆਨ ਖਿੱਚਦੀ ਹੈ। ਉਹ ਸਿਰਫ਼ ਪੈਸੇ ਕਮਾਉਣ ਲਈ ਨਹੀਂ ਗਾਉਂਦਾ ਸਗੋਂ ਹਰ ਸ਼ੋਅ 'ਚ ਪੰਜਾਬੀਆਂ ਨੂੰ ਚੜ੍ਹਦੀ ਕਲਾ 'ਚ ਰਹਿਣ ਅਤੇ ਨਸ਼ਿਆਂ ਤੋਂ ਦੂਰ ਰਹਿਣ ਦਾ ਸੁਨੇਹਾ ਦਿੰਦਾ ਹੈ। ਵਪਾਰਕ ਗਾਣਿਆਂ ਦੇ ਮੁਕਾਬਲੇ 'ਚ ਉਹ 'ਨਾ ਮਾਰੀਂ ਨਾ ਮਾਰੀਂ ਨੀ ਮਾਂ' ਵਰਗੇ ਗੀਤ ਤੇ ਮਹਿੰਗੇ ਵੀਡੀਓ ਰਾਹੀਂ ਭਰੂਣ ਹੱਤਿਆ ਸਬੰਧੀ ਲੋਕਾਂ ਨੂੰ ਹਲੂਣਦਾ ਵੀ ਨਜ਼ਰ ਆਇਆ। ਕਦੇ ਕਿਸੇ ਹੋਰ ਬੰਦੇ ਦੀ ਚੰਗੀ-ਮਾੜੀ ਗੱਲ ਕਰਦੇ ਵੀ ਉਸ ਨੂੰ ਕਿਸੇ ਨਹੀਂ ਸੁਣਿਆ ਹੋਣਾ।
ਸਰਬਜੀਤ ਦੀ ਕਾਬਲੀਅਤ ਦਾ ਸਬੂਤ ਇਹ ਹੈ ਕਿ ਉਹ ਦੋ ਦਹਾਕਿਆਂ ਤੋਂ ਬਤੌਰ ਫ਼ਨਕਾਰ ਆਪਣੀ ਹੋਂਦ ਬਰਕਰਾਰ ਰੱਖਣ ਦੇ ਨਾਲ ਆਪਣੇ ਅਕਸ ਨੂੰ ਨਿਰੰਤਰ ਵੱਡਾ ਕਰ ਰਿਹਾ ਹੈ। ਬੇਸ਼ੱਕ ਸਰਬਜੀਤ ਦੀਆਂ ਫ਼ਿਲਮਾਂ ਨੇ ਓਨਾ ਮੁਨਾਫ਼ਾ ਨਹੀਂ ਕਮਾਇਆ ਪਰ ਉਸ ਨੂੰ ਆਪਣੇ ਕੀਤੇ ਕੰਮ ਦੀ ਹਮੇਸ਼ਾਂ ਸੰਤੁਸ਼ਟੀ ਰਹੀ ਹੈ। ਉਹ ਜੋ ਲੋਕਾਂ ਨੂੰ ਨਜ਼ਰ ਆਉਂਦਾ ਹੈ, ਉਹੀ ਅਸਲ ਜ਼ਿੰਦਗੀ ਵਿੱਚ ਹੈ। ਫ਼ਿਲਮ 'ਹਾਣੀ' 'ਚ ਹਰਭਜਨ ਮਾਨ ਦੇ ਦੋਸਤ ਵਜੋਂ ਨਿਭਾਏ ਕਿਰਦਾਰ ਨੇ ਉਸ ਦੇ ਕੱਦ 'ਚ ਹੋਰ ਵਾਧਾ ਕੀਤਾ ਹੈ।
ਉਹ ਕਿਸੇ ਵੇਲੇ ਹਾਕੀ ਦਾ ਖਿਡਾਰੀ ਰਿਹਾ ਹੈ ਅਤੇ ਲਾਇਲਪੁਰ ਖ਼ਾਲਸਾ ਕਾਲਜ ਜਲੰਧਰ ਦਾ ਮੋਹਰੀ ਭੰਗੜਾ ਕਲਾਕਾਰ ਵੀ। ਅਜਿਹੀਆਂ ਗਤੀਵਿਧੀਆਂ ਸਦਕਾ ਚੀਮੇ ਦੀ ਸੋਚ ਤੇ ਸਰੀਰ 'ਚ ਖ਼ਾਸ ਕਿਸਮ ਦੀ ਉਡਾਨ ਤੇ ਫੁਰਤੀਲਾਪਣ ਹੈ।
ਜਲੰਧਰ ਜ਼ਿਲ੍ਹੇ ਦੇ ਪਿੰਡ ਚੀਮਾ ਕਲਾਂ 'ਚੋਂ ਉੱਠ ਕੇ ਦੋਆਬੇ ਦੀ ਬਹੁਗਿਣਤੀ ਲੋਕਾਂ ਦੀ ਤਰ੍ਹਾਂ ਉਹ ਵੀ ਕੈਨੇਡਾ ਦਾ ਵਸਨੀਕ ਬਣ ਗਿਆ ਸੀ ਪਰ ਕਲਾ ਦੇ ਖੇਤਰ ਦੇ ਮੋਹ ਨੇ ਉਸ ਨੂੰ ਮੁੜ ਪੰਜਾਬ ਨਾਲ ਜੋੜ ਦਿੱਤਾ। ਉਸ ਦਾ ਆਪਣੇ ਜੱਦੀ ਪਿੰਡ ਚੀਮਾ ਨਾਲ ਬਹੁਤ ਲਗਾਓ ਹੈ ਅਤੇ ਇੱਥੇ ਹਰ ਸਾਲ ਆਪਣੇ ਸਾਥੀਆਂ ਦੇ ਸਹਿਯੋਗ ਨਾਲ ਉਹ ਇੱਕ ਵੱਡਾ ਸੱਭਿਆਚਾਰਕ ਮੇਲਾ ਵੀ ਕਰਵਾਉਂਦਾ ਹੈ।