ਜਲੰਧਰ (ਬਿਊਰੋ)— ਪਿਛਲੇ ਤਿੰਨ ਦਹਾਕਿਆਂ ਤੋਂ ਪੰਜਾਬੀ ਸਿਨੇਮਾ 'ਚ ਅਦਾਕਾਰੀ ਦਾ ਲੋਹਾ ਮਨਵਾਉਣ ਵਾਲੇ ਅਤੇ ਮਿਲਾਪੜੇ ਸੁਭਾਅ ਵਾਲੇ ਅਭਿਨੇਤਾ ਸਰਦਾਰ ਸੋਹੀ ਅੱਜ ਆਪਣਾ ਜਨਮਦਿਨ ਮਨਾ ਰਹੇ ਹਨ। ਪਿਤਾ ਡਾ: ਸ਼ਿਵਦੇਵ ਸਿੰਘ ਤੇ ਮਾਤਾ ਸਰੂਪ ਕੌਰ ਦਾ ਜਾਇਆ ਸਰਦਾਰ ਸੋਹੀ ਜਿਨ੍ਹਾਂ ਦਾ ਅਸਲੀ ਨਾਂ ਪਰਮਜੀਤ ਸਿੰਘ ਹੈ।
ਉਨ੍ਹਾਂ ਆਪਣੇ ਫਿਲਮੀ ਸਫਰ ਦੀ ਸ਼ੁਰੂਆਤ ਹਰਪਾਲ ਟਿਵਾਣਾ ਰਾਹੀਂ ਥੀਏਟਰ ਨਾਲ ਸ਼ੁਰੂ ਕੀਤੀ। ਉਨ੍ਹਾਂ ਦੇ ਗੁਰੂ ਭਾਈ ਰਹੇ ਰਾਜ ਬੱਬਰ ਤੇ ਓਮਪੂਰੀ ਨਾਲ ਫਿਲਮ 'ਲੌਂਗ ਦਾ ਲਿਸ਼ਕਾਰਾ' (1986) ਨਾਲ ਆਪਣੇ ਫਿਲਮੀ ਕਰੀਅਰ ਦੀ ਸ਼ੁਰੂਆਤ ਕੀਤੀ। ਇਸ ਫਿਲਮ 'ਚ ਉਨ੍ਹਾਂ ਦੀ ਅਦਾਕਾਰੀ ਨੂੰ ਪ੍ਰਸ਼ੰਸਕਾਂ ਵਲੋਂ ਕਾਫੀ ਪਸੰਦ ਕੀਤਾ ਜਾਣ ਲੱਗਾ, ਜਿਸ ਤੋਂ ਬਾਅਦ ਉਨ੍ਹਾਂ ਕਈ ਮਸ਼ਹੂਰ ਪੰਜਾਬੀ ਫਿਲਮਾਂ ਕੰਮ ਕਰਨਾ ਸ਼ੁਰੂ ਕੀਤਾ।
ਪਾਲੀਵੁੱਡ ਦੀਆਂ ਕਈ ਮਸ਼ਹੂਰ ਫਿਲਮਾਂ 'ਚ ਆਪਣੀ ਅਦਾਕਾਰੀ ਨਾਲ ਸਰਦਾਰ ਸੋਹੀ ਨੇ ਵੱਖਰੀ ਪਛਾਣ ਬਣਾ ਲਈ ਹੈ। ਆਪਣੇ ਫਿਲਮੀ ਕਰੀਅਰ ਦੌਰਾਨ ਉਨ੍ਹਾਂ ਪਾਲੀਵੁੱਡ ਦੀਆਂ ਸੁਪਰਹਿੱਟ ਫਿਲਮਾਂ 'ਕੈਰੀ ਆਨ ਜੱਟਾ', 'ਜੱਟ ਜੇਮਸ ਬਾਂਡ', 'ਅੰਗ੍ਰੇਜ', 'ਅਰਦਾਸ', 'ਸਰਦਾਰ ਸਾਬ੍ਹ', 'ਮੰਜ਼ੇ ਬਿਸਤਰੇ', 'ਖੇਡ ਤਕਦੀਰਾਂ ਦੇ', 'ਬਾਗੀ', 'ਮਿੱਟੀ' ਵਰਗੀਆਂ ਫਿਲਮਾਂ 'ਚ ਕੰਮ ਕਰ ਚੁੱਕੇ ਹਨ। ਆਪਣੇ ਫਿਲਮੀ ਕਰੀਅਰ ਦੌਰਾਨ ਇਹ ਕਰੀਬ 44 ਫਿਲਮਾਂ 'ਚ ਕੰਮ ਕਰ ਚੁੱਕੇ ਹਨ।
ਇਸ ਤੋਂ ਇਲਾਵਾ ਉਹ ਜਲਦ ਹੀ ਪਾਲੀਵੁੱਡ ਗਾਇਕ ਤੇ ਅਭਿਨੇਤਾ ਐਮੀ ਵਿਰਕ ਦੀ ਆਉਣ ਵਾਲੀ ਫਿਲਮ 'ਸਤਿ ਸ੍ਰੀ ਅਕਾਲ ਇੰਗਲੈਂਡ' 'ਚ ਨਜ਼ਰ ਆਉਣਗੇ।