ਮੁੰਬਈ— ਬਾਲੀਵੁੱਡ ਫਿਲਮਾਂ 'ਚ ਵੱਖ-ਵੱਖ ਭੂਮਿਕਾਵਾਂ ਨਿਭਾਉਣ ਵਾਲੇ ਤੇ ਖਾਸ ਤੌਰ 'ਤੇ ਖਲਨਾਇਕ ਦੇ ਕਿਰਦਾਰ 'ਚ ਨਜ਼ਰ ਆਏ ਸ਼ਕਤੀ ਕਪੂਰ ਅੱਜ ਆਪਣਾ 59ਵਾਂ ਜਨਮਦਿਨ ਮਨਾ ਰਹੇ ਹਨ। ਦੱਸਣਯੋਗ ਹੈ ਕਿ ਸ਼ਕਤੀ ਪਤਨੀ ਸ਼ਿਵਾਂਗੀ ਤੇ ਦੋਵਾਂ ਬੱਚਿਆਂ ਸ਼ਰਧਾ ਤੇ ਸਿਧਾਂਤ ਕਪੂਰ ਨਾਲ ਮੁੰਬਈ ਦੇ ਪਾਮ ਬੀਚ ਸਥਿਤ ਰਿਹਾਇਸ਼ੀ ਕੰਪਲੈਕਸ 'ਚ ਰਹਿੰਦੇ ਹਨ। 1975 'ਚ ਜਦੋਂ ਉਹ ਪਹਿਲੀ ਵਾਰ ਮੁੰਬਈ ਆਏ ਸਨ, ਉਦੋਂ ਉਨ੍ਹਾਂ ਕੋਲ ਰਹਿਣ ਲਈ ਕੋਈ ਜਗ੍ਹਾ ਨਹੀਂ ਸੀ ਪਰ 700 ਤੋਂ ਵੀ ਜ਼ਿਆਦਾ ਫਿਲਮਾਂ 'ਚ ਕੰਮ ਕਰ ਚੁੱਕੇ ਸ਼ਕਤੀ ਅੱਜ ਇਸ ਅਪਾਰਟਮੈਂਟ 'ਚ ਇਕ ਪੂਰੇ ਫਲੋਰ ਦੇ ਮਾਲਕ ਹਨ। ਇਸ ਦੀਆਂ ਕੁਝ ਤਸਵੀਰਾਂ ਤੁਹਾਨੂੰ ਅੱਜ ਦਿਖਾਉਣ ਜਾ ਰਹੇ ਹਾਂ। ਜਤਿੰਦਰ ਦੀ ਸਲਾਹ 'ਤੇ ਸ਼ਕਤੀ ਕਪੂਰ ਨੇ ਪ੍ਰਾਪਰਟੀ 'ਚ ਇਨਵੈਸਟ ਕਰਨ ਦੀ ਸੋਚੀ। 7 ਲੱਖ ਦਾ ਲੋਨ ਲੈ ਕੇ ਉਨ੍ਹਾਂ ਨੇ ਇਸ ਬਿਲਡਿੰਗ 'ਚ 3 ਬੈੱਡਰੂਮ ਵਾਲਾ ਅਪਾਰਟਮੈਂਟ ਖਰੀਦਿਆ। 1982 'ਚ ਵਿਆਹ ਤੋਂ ਬਾਅਦ ਇਸ ਦੇ ਨਾਲ ਵਾਲਾ ਫਲੈਟ ਉਨ੍ਹਾਂ ਨੇ ਲਿਆ। ਹੁਣ ਉਹ ਇਸ ਪੂਰੇ ਫਲੋਰ ਦੇ ਮਾਲਕ ਹਨ। ਦੱਸਣਯੋਗ ਹੈ ਕਿ ਸ਼ਕਤੀ ਕਪੂਰ ਨੇ ਆਪਣੇ ਕਰੀਅਰ ਦੇ ਸ਼ੁਰੂਆਤੀ ਦੌਰ 'ਚ ਕੁਝ ਫਿਲਮਾਂ 'ਚ ਛੋਟੇ-ਮੋਟੇ ਰੋਲ ਕੀਤੇ ਪਰ ਉਨ੍ਹਾਂ ਨੂੰ ਪਛਾਣ 1980 'ਚ ਆਈ ਫਿਲਮ 'ਕੁਰਬਾਨੀ' ਨਾਲ ਮਿਲੀ। ਉਨ੍ਹਾਂ ਨੇ 'ਨਸੀਬ', 'ਰੌਕੀ', 'ਵਾਰਦਾਤ', 'ਸੱਤੇ ਪੇ ਸੱਤਾ', 'ਹੀਰੋ', 'ਜਾਨੀ ਦੋਸਤ', 'ਮਕਸਦ', 'ਕਰਿਸ਼ਮਾ ਕੁਦਰਤ ਕਾ', 'ਕਰਮਾ' ਤੇ 'ਗੁਰੂ' ਸਮੇਤ ਕਈ ਫਿਲਮਾਂ 'ਚ ਕੰਮ ਕੀਤਾ ਹੈ।