ਮੁੰਬਈ(ਬਿਊਰੋ)— ਲੰਬੀ ਬੀਮਾਰੀ ਤੋਂ ਬਾਅਦ ਮਰਹੂਮ ਸ਼ਸ਼ੀ ਕਪੂਰ ਦੀ 79 ਸਾਲ ਦੀ ਉਮਰ 'ਚ ਦਿਹਾਂਤ (4 ਦਸੰਬਰ) ਹੋ ਗਿਆ। ਜਾਣਕਾਰੀ ਮੁਤਾਬਕ ਸ਼ਸ਼ੀ ਕਪੂਰ ਨੇ ਕਈ ਸੁਪਰਹਿੱਟ ਫਿਲਮਾਂ 'ਚ ਕੰਮ ਕੀਤਾ ਹੈ। ਇਨ੍ਹਾਂ 'ਚੋਂ ਕੁਝ ਫਿਲਮਾਂ ਅਜਿਹੀਆਂ ਵੀ ਹਨ, ਜਿਸ 'ਚ ਉਨ੍ਹਾਂ ਨੇ ਅਮਿਤਾਭ ਬੱਚਨ ਨਾਲ ਕੰਮ ਕੀਤਾ ਹੈ। ਦੋਹਾਂ ਨੇ ਕਰੀਬ 12 ਫਿਲਮਾਂ 'ਚ ਕੰਮ ਕੀਤਾ ਹੈ।
ਦੋਵੇਂ ਪਹਿਲੀ ਫਿਲਮ 'ਰੋਟੀ ਕਪੜਾ ਔਰ ਮਕਾਨ' (1974) 'ਚ ਨਜ਼ਰ ਆਏ ਸਨ ਪਰ ਕੁਝ ਸਾਲਾਂ ਬਾਅਦ ਇਕ ਫਿਲਮ ਅਜਿਹੀ ਵੀ ਆਈ ਸੀ, ਜਿਸ ਤੋਂ ਬਾਅਦ ਅਮਿਤਾਭ ਨੇ ਆਪਣੇ ਕਾਂਟ੍ਰੈਕਟ 'ਚ ਇਕ ਕਲਾਜ ਜੋੜ ਦਿੱਤਾ ਸੀ ਕਿ ਉਹ ਡਬਲ ਹੀਰੋ ਫਿਲਮ 'ਚ ਸ਼ਸ਼ੀ ਕਪੂਰ ਨਾਲ ਹੀ ਕੰਮ ਕਰਨਗੇ। ਇੱਥੇ ਅਸੀਂ ਗੱਲ ਕਰ ਰਹੇ ਹਾਂ ਨਿਰਦੇਸ਼ਕ ਰਾਕੇਸ਼ ਕੁਮਾਰ ਦੀ ਫਿਲਮ 'ਦੋ ਔਰ ਦੋ ਪਾਂਚ' ਦੀ, ਜੋ 1980 'ਚ ਰਿਲੀਜ਼ ਹੋਈ ਸੀ।
ਜ਼ਿਕਰਯੋਗ ਹੈ ਕਿ ਫਿਲਮ ਦਾ ਇਕ ਸੀਨ ਮੁੰਬਈ 'ਚ ਸੀ-ਰਾਕ ਹੋਟਲ 'ਚ ਫਿਲਮਾਇਆ ਜਾਣਾ ਸੀ। ਉਸ ਸਮੇਂ ਅਮਿਤਾਭ ਅਸਥਮਾ ਨਾਲ ਜੂਝ ਰਹੇ ਸਨ। ਸ਼ੂਟਿੰਗ ਦੌਰਾਨ ਅਚਾਨਕ ਅਮਿਤਾਬ ਨੂੰ ਅਸਥਮਾ ਦਾ ਅਟੈਕ ਆਇਆ, ਜਿਸ ਨੂੰ ਉਹ ਸਹਿਨ ਨਹੀਂ ਕਰ ਪਾ ਰਹੇ ਸਨ। ਕਿਹਾ ਜਾਂਦਾ ਹੈ ਕਿ ਉਸ ਸਮੇਂ ਜੇਕਰ ਸ਼ਸ਼ੀ ਕਪੂਰ ਮਦਦ ਲਈ ਅੱਗੇ ਨਾ ਆਉਂਦੇ ਤਾਂ ਕੁਝ ਵੀ ਹੋ ਸਕਦਾ ਸੀ।
ਇਸ ਘਟਨਾ ਤੋਂ ਬਾਅਦ ਅਮਿਤਾਭ ਬੱਚਨ ਨੇ ਇਹ ਤੈਅ ਕਰ ਲਿਆ ਕਿ ਦੋ ਹੀਰੋ ਵਾਲੀ ਫਿਲਮ 'ਚ ਉਨ੍ਹਾਂ ਨਾਲ ਸ਼ਸ਼ੀ ਕਪੂਰ ਹੀ ਹੋਣਗੇ। ਖਾਸ ਗੱਲ ਇਹ ਹੈ ਕਿ ਮੇਕਰਸ ਨੇ ਵੀ ਉਨ੍ਹਾਂ ਦੀ ਇਸ ਡਿਮਾਂਡ ਨੂੰ ਮੰਨਿਆ। ਕਥਿਤ ਤੌਰ 'ਤੇ ਅਮਿਤਾਭ ਇਸ ਲਈ ਇਕ ਲੈਟਰ ਫਿਲਮਕਾਰ ਤੋਂ ਸਾਈਨ ਕਰਾਉਂਦੇ ਸਨ। 'ਦੋ ਔਰ ਦੋ ਪਾਂਚ' ਤੋਂ ਬਾਅਦ ਅਮਿਤਾਭ ਤੇ ਸ਼ਸ਼ੀ ਨਾਲ 'ਸ਼ਾਨ' (1980), 'ਸਿਲਸਿਲਾ' (1981) ਤੋ 'ਨਮਕ ਹਲਾਲ' (1982) ਵਰਗੀਆਂ ਫਿਲਮਾਂ 'ਚ ਇੱਕਠੇ ਕੰਮ ਕੀਤਾ।