ਮੁੰਬਈ(ਬਿਊਰੋ)— ਬਾਲੀਵੁੱਡ ਦੇ ਨਾਮੀ ਅਭਿਨੇਤਾ ਸ਼ਤਰੂਘਨ ਸਿਨਹਾ ਅੱਜ ਆਪਣਾ 72ਵਾਂ ਜਨਮਦਿਨ ਮਨਾ ਰਹੇ ਹਨ। 9 ਦਸੰਬਰ 1945 ਨੂੰ ਬਿਹਾਰ ਦੇ ਪਟਨਾ ਸ਼ਹਿਰ ਦੇ ਜਨਮੇ ਸ਼ਤਰੂਘਨ ਸਿਨਹਾ ਨੇ ਦੇਵ ਆਨੰਦ ਦੀ ਫਿਲਮ 'ਪ੍ਰੇਮ-ਪੁਜਾਰੀ' ਨਾਲ ਬਾਲੀਵੁੱਡ 'ਚ ਐਂਟਰੀ ਕੀਤੀ ਸੀ। ਸ਼ਤਰੂਘਨ ਸਿਨਹਾ 'ਪਾਰਸ' (1971), 'ਦੋਸਤਾਨਾ' (1974), 'ਕਾਲਾ ਪੱਥਰ' (1980) ਵਰਗੀਆਂ ਫਿਲਮਾਂ 'ਚ ਆਪਣੀ ਐਕਟਿੰਗ ਦਾ ਲੋਹਾ ਮੰਨਵਾ ਚੁੱਕੇ ਹਨ।
ਉਂਝ ਉਨ੍ਹਾਂ ਦੀ ਨਿੱਜੀ ਜ਼ਿੰਦਗੀ ਵੀ ਕਿਸੇ ਫਿਲਮ ਦੀ ਕਹਾਣੀ ਤੋਂ ਘੱਟ ਚਰਚਿਤ ਨਹੀਂ ਰਹੀ। ਖਾਸ ਕਰਕੇ ਪੂਨਮ ਨਾਲ ਵਿਆਹ ਕਰਨ ਤੋਂ ਬਾਅਦ ਵੀ ਉਨ੍ਹਾਂ ਦਾ ਆਪਣੇ ਸਮੇਂ ਦੀ ਖੂਬਸੂਰਤ ਅਭਿਨੇਤਰੀ ਰਹਿ ਚੁੱਕੀ ਰੀਨਾ ਰਾਏ ਨਾਲ ਅਫੇਅਰ ਕਾਫੀ ਚਰਚਾ 'ਚ ਰਿਹਾ ਸੀ।
1980 'ਚ ਉਨ੍ਹਾਂ ਨੇ ਸਾਬਕਾ ਮਿਸ ਯੰਗ ਇੰਡੀਆ ਪੂਨਮ ਚੰਡੀਰਾਮਣੀ ਨਾਲ ਵਿਆਹ ਕੀਤਾ। ਇਹ ਉਹ ਸਮਾਂ ਸੀ ਜਦੋਂ ਸ਼ਤਰੂਘਨ ਅਤੇ ਰੀਨਾ ਰਾਏ ਦੇ ਅਫੇਅਰ ਦੀਆਂ ਖ਼ਬਰਾਂ ਪੂਰੀਆਂ ਜ਼ੋਰਾ-ਸ਼ੋਰਾ 'ਤੇ ਸਨ। ਇਕ ਇੰਟਰਵਿਊ 'ਚ ਉਨ੍ਹਾਂ ਨੇ ਦੱਸਿਆ ਸੀ ਕਿ ਉਨ੍ਹਾਂ ਦਾ ਰਿਸ਼ਤਾ 7 ਸਾਲਾਂ ਤੱਕ ਚੱਲਿਆ।
ਦਿਲਚਸਪ ਗੱਲ ਇਹ ਸੀ ਕਿ ਇਕ ਹੋਰ ਇੰਟਰਵਿਊ 'ਚ ਉਨ੍ਹਾਂ ਦੀ ਪਤਨੀ ਪੂਨਮ ਨੇ ਇਸ ਗੱਲ ਦਾ ਖੁਲਾਸਾ ਕੀਤਾ ਸੀ ਕਿ ਉਹ ਆਪਣੇ ਪਤੀ ਅਤੇ ਰੀਨਾ ਦੇ ਅਫੇਅਰ ਬਾਰੇ ਸਭ ਕੁਝ ਜਾਣਦੀ ਸੀ।
