ਮੁੰਬਈ(ਬਿਊਰੋ)— ਬਾਲੀਵੁੱਡ ਦੀ ਮਸ਼ਹੂਰ ਅਦਾਕਾਰਾ ਸ਼੍ਰੀਦੇਵੀ ਦਾ ਦਿਹਾਂਤ ਹੋ ਗਿਆ ਹੈ। 54 ਸਾਲਾ ਸ਼੍ਰੀਦੇਵੀ ਨੇ ਦੁਬਈ 'ਚ ਆਖਰੀ ਸਾਹ ਲਿਆ। ਉਹ ਕੁਝ ਦਿਨ ਪਹਿਲਾਂ ਹੀ ਉਹ ਇਕ ਵਿਆਹ ਸਮਾਗਮ 'ਚ ਸ਼ਾਮਲ ਹੋਣ ਲਈ ਦੁਬਈ ਪੁੱਜੀ ਸੀ, ਜਿੱਥੇ ਹਾਰਟ ਅਟੈਕ ਆਉਣ ਕਾਰਨ ਉਨ੍ਹਾਂ ਦੀ ਮੌਤ ਹੋ ਗਈ। ਇਸ ਦੌਰਾਨ ਉਨ੍ਹਾਂ ਨਾਲ ਉਨ੍ਹਾਂ ਦੀ ਵੱਡੀ ਬੇਟੀ ਜਾਹਨਵੀ ਕਪੂਰ ਫਿਲਮ ਦੀ ਸ਼ੂਟਿੰਗ 'ਚ ਰੁੱਝੀ ਹੋਈ ਹੋਣ ਕਾਰਨ ਮੌਜੂਦ ਨਹੀਂ ਸੀ। ਪਰ ਇਸ ਘਟਨਾ ਨਾਲ ਕੁਦਰਤ ਨੇ ਇਕ ਵਾਰ ਫਿਰ ਖੁਦ ਨੂੰ ਦੁਹਰਾਇਆ ਹੈ। ਅਸਲ 'ਚ ਅਜਿਹਾ ਹੀ ਬੋਨੀ ਕਪੂਰ ਦੀ ਪਹਿਲੀ ਪਤਨੀ ਮੋਨਾ ਨਾਲ ਵੀ ਹੋ ਚੁੱਕਾ ਹੈ।
ਬੀਮਾਰੀ ਕਾਰਨ ਉਨ੍ਹਾਂ ਦੀ 48 ਸਾਲ ਦੀ ਉਮਰ 'ਚ ਮੌਤ ਹੋ ਗਈ ਸੀ। ਉਸ ਦੌਰਾਨ ਅਰਜੂਨ ਕਪੂਰ ਬਾਲੀਵੁੱਡ 'ਚ ਡੈਬਿਊ ਕਰਨ ਜਾ ਰਹੇ ਸਨ। ਮੋਨਾ ਦੀ ਮੌਤ 25 ਮਾਰਚ 2012 ਨੂੰ ਹੋਈ ਸੀ। ਇਸ ਦੇ ਕੁਝ ਮਹੀਨਿਆਂ ਬਾਅਦ ਹੀ ਮਈ 2012 'ਚ ਅਰਜੂਨ ਦੀ ਫਿਲਮ 'ਇਸ਼ਕਜ਼ਾਦੇ' ਨੂੰ ਰਿਲੀਜ਼ ਹੋਣੀ ਸੀ। ਮੋਨਾ ਆਪਣੇ ਬੇਟੇ ਦੀ ਡੈਬਿਊ ਫਿਲਮ ਨੂੰ ਦੇਖੇ ਬਗੈਰ ਹੀ ਦੁਨੀਆ ਨੂੰ ਅਲਵਿਦਾ ਕਹਿ ਗਈ ਸੀ।
ਠੀਕ ਉਸੇ ਤਰ੍ਹਾਂ ਹੀ ਸ਼੍ਰੀਦੇਵੀ ਆਪਣੀ ਵੱਡੀ ਬੇਟੀ ਦੀ ਡੈਬਿਊ ਫਿਲਮ ਦੇ ਕੁਝ ਮਹੀਨੇ ਪਹਿਲਾਂ ਹੀ ਦੁਨੀਆ ਨੂੰ ਅਲਵਿਦਾ ਕਹਿ ਗਈ। ਉਨ੍ਹਾਂ ਦੀ ਬੇਟੀ ਜਾਹਨਵੀ ਕਪੂਰ ਦੀ ਪਹਿਲੀ ਫਿਲਮ 'ਧੜਕ' ਜਲਦ ਵੱਡੇ ਪਰਦੇ 'ਤੇ ਜੁਲਾਈ 'ਚ ਰਿਲੀਜ਼ ਹੋਣੀ ਹੈ। ਸ਼੍ਰੀਦੇਵੀ ਆਪਣੀ ਬੇਟੀਆਂ ਦੇ ਬੇਹੱਦ ਕਰੀਬ ਸੀ। ਉਨ੍ਹਾਂ ਨਾਲ ਸ਼ੂਟਿੰਗ 'ਤੇ ਜਾਣ ਤੋਂ ਲੈ ਕੇ ਕਰੀਅਰ ਦੇ ਸਾਰੇ ਵੱਡੇ ਫੈਸਲੇ ਉਹ ਖੁਦ ਹੀ ਲੈਂਦੀ ਸੀ। ਜਾਹਨਵੀ ਨੂੰ ਬਤੌਰ ਅਦਾਕਾਰਾ ਪਰਦੇ 'ਤੇ ਦੇਖਣਾ ਉਨ੍ਹਾਂ ਦਾ ਵੱਡਾ ਸੁਪਨਾ ਸੀ।
ਜ਼ਿਕਰਯੋਗ ਹੈ ਕਿ ਸ਼੍ਰੀਦੇਵੀ ਦੀ ਮੌਤ ਨਾਲ ਪੂਰਾ ਫਿਲਮ ਜਗਤ ਸਦਮੇ 'ਚ ਹੈ। ਪ੍ਰਧਾਨ ਮੰਤਰੀ ਤੋਂ ਲੈ ਕੇ ਰਾਸ਼ਟਰਪਤੀ ਤੱਕ ਸਾਰਿਆ ਨੇ ਦੁੱਖ ਜਤਾਇਆ ਹੈ। ਬਾਲੀਵੁੱਡ ਦੇ ਸਾਰੇ ਸਟਾਰਜ਼ ਦੇਰ ਰਾਤ ਤੋਂ ਹੀ ਟਵੀਟ ਕਰ ਕੇ ਸ਼੍ਰੀਦੇਵੀ ਦੀ ਮੌਤ 'ਤੇ ਦੁੱਖ ਜ਼ਾਹਰ ਕਰ ਰਹੇ ਹਨ।
