ਮੁੰਬਈ (ਬਿਊਰੋ)— ਅੱਜ ਪੂਰੀ ਦੁਨੀਆ ਦੀਆਂ ਨਜ਼ਰਾਂ ਬ੍ਰਿਟੇਨ ਦੇ ਸ਼ਾਹੀ ਵਿਆਹ 'ਤੇ ਹਨ ਪਰ ਭਾਰਤੀਆਂ ਦੀ ਦਿਲਚਸਪੀ ਪ੍ਰਿੰਸ ਹੈਰੀ ਅਤੇ ਮੇਘਨ ਮਾਰਕਲ ਦੀ ਰਾਇਲ ਵੈਡਿੰਗ ਤੋਂ ਜ਼ਿਆਦਾ ਪ੍ਰਿਯੰਕਾ ਚੋਪੜਾ 'ਚ ਹੈ।
ਸਾਬਕਾ ਮਿਸ ਵਰਲਡ ਪ੍ਰਿਯੰਕਾ ਚੋਪੜਾ ਬਾਲੀਵੁੱਡ ਦੀ ਇਕੱਲੀ ਅਜਿਹੀ ਅਦਾਕਾਰਾ ਹੈ, ਜੋ ਇਸ ਇਤਿਹਾਸਕ ਵਿਆਹ ਦੀ ਗਵਾਹ ਬਣੇਗੀ। ਉਨ੍ਹਾਂ ਨੂੰ ਇਸ ਵਿਆਹ ਦਾ ਖਾਸ ਸੱਦਾ ਮਿਲਿਆ ਹੈ ਅਤੇ ਉਹ ਲੰਡਨ ਪਹੁੰਚ ਵੀ ਚੁੱਕੀ ਹੈ। ਵਿਆਹ ਵਾਲੇ ਘਰ 'ਚ ਪ੍ਰਿਯੰਕਾ ਚੋਪੜਾ ਖੂਬ ਮਸਤੀ ਵੀ ਕਰ ਰਹੀ ਹੈ।
ਉਨ੍ਹਾਂ ਨੇ ਇੰਸਟਾਗਰਾਮ 'ਤੇ ਤਸਵੀਰ ਵੀ ਸ਼ੇਅਰ ਕੀਤੀ ਹੈ, ਜਿਸ 'ਚ ਉਹ ਲਾੜੀ ਦੀਆਂ ਸਹੇਲੀਆਂ ਨਾਲ ਹਾਸਾ-ਮਖੌਲ ਕਰਦੀ ਦਿਖ ਰਹੀ ਹੈ। ਅਸਲ 'ਚ ਪ੍ਰਿਯੰਕਾ ਚੋਪੜਾ ਮੇਘਨ ਮਾਰਕਲ ਦੀ ਦੋਸਤ ਹੈ।
ਇਹੀ ਵਜ੍ਹਾ ਹੈ ਕਿ ਹੁਣ ਜਦੋਂ ਅਦਾਕਾਰਾ ਮੇਘਨ ਮਾਰਕਲ ਬ੍ਰਿਟੇਨ ਦੇ ਪ੍ਰਿੰਸ ਹੈਰੀ ਨਾਲ ਵਿਆਹ ਦੇ ਬੰਧਨ 'ਚ ਬੱਝਣ ਜਾ ਰਹੀ ਹੈ ਤਾਂ ਉਨ੍ਹਾਂ ਨੇ ਆਪਣੀ ਭਾਰਤੀ ਸਹੇਲੀ ਨੂੰ ਵੀ ਇਨਵਾਈਟ ਕੀਤਾ ਹੈ। ਪ੍ਰਿਯੰਕਾ ਅਤੇ ਮੇਘਨ ਦੀ ਪਹਿਲੀ ਮੁਲਾਕਾਤ ਜਨਵਰੀ 2016 'ਚ ਇਕ ਇਵੈਂਟ ਦੌਰਾਨ ਹੋਈ ਸੀ।
ਇਸ ਫੰਕਸ਼ਨ 'ਚ ਟੀ. ਵੀ. ਅਭਿਨੇਤਰੀਆਂ ਸ਼ਾਮਲ ਹੋਈਆਂ ਸਨ। ਉਸ ਸਮੇਂ ਪ੍ਰਿਯੰਕਾ 'ਕਵਾਂਟਿਕੋ' 'ਚ ਕੰਮ ਕਰ ਰਹੀ ਸੀ। ਇਸ ਇਵੈਂਟ 'ਚ ਹੋਈ ਮੁਲਾਕਾਤ ਤੋਂ ਬਾਅਦ ਮੇਘਨ ਨੇ ਆਪਣੇ ਲਾਈਫਸਟਾਈਲ ਬਲਾਗ ਲਈ ਪ੍ਰਿਯੰਕਾ ਚੋਪੜਾ ਦਾ ਇੰਟਰਵਿਊ ਲਿਆ। ਇਸ ਤੋਂ ਬਾਅਦ ਦੋਹਾਂ ਨੇ ਕਈ ਜਗ੍ਹਾ ਦੀ ਸੈਰ ਕੀਤੀ, ਸੈਲਫੀ ਲਈ, ਚੰਗਾ ਸਮਾਂ ਬਿਤਾਇਆ।
ਦੋਹਾਂ ਨੇ ਇੰਸਟਾਗਰਾਮ 'ਤੇ ਆਪਣੀ ਤਸਵੀਰਾਂ ਵੀ ਪੋਸਟ ਕੀਤੀਆਂ। ਦੋਹਾਂ ਦੀ ਦੋਸਤੀ ਦੀਆਂ ਖਬਰਾਂ ਮੀਡੀਆ 'ਚ ਵੀ ਛਾਈ। ਇਸ ਤੋਂ ਪਹਿਲਾਂ ਪ੍ਰਿੰਸ ਹੈਰੀ ਅਤੇ ਮੇਘਨ ਮਾਰਕਲ ਅਧਿਕਾਰਤ ਰੂਪ ਨਾਲ ਆਪਣੇ ਰਿਸ਼ਤੇ ਦਾ ਐਲਾਨ ਕਰਦੇ, ਲੋਕ ਪ੍ਰਿਯੰਕਾ ਚੋਪੜਾ ਤੋਂ ਹੀ ਦੋਹਾਂ ਦੇ ਰਿਸ਼ਤੇ ਦੇ ਬਾਰੇ 'ਚ ਸਵਾਲ ਕਰਨ ਲੱਗੇ ਸਨ। ਹਾਲ ਹੀ 'ਚ ਪ੍ਰਿਯੰਕਾ ਚੋਪੜਾ ਨੇ ਟਾਈਮ ਮੈਗਜ਼ੀਨ 'ਚ ਮੇਘਨ ਮਾਰਕਲ ਲਈ ਇਕ ਇਮੋਸ਼ਨਲ ਲੇਖ ਵੀ ਲਿਖਿਆ।