ਜਲੰਧਰ(ਬਿਊਰੋ)— ਪੰਜਾਬੀ ਪਾਲੀਵੁੱਡ ਦੇ ਨਾਲ-ਨਾਲ ਬਾਲੀਵੁੱਡ ਇੰਡਸਟਰੀ 'ਚ ਵੀ ਆਪਣੀ ਅਦਾਕਾਰੀ ਨਾਲ ਧਾਕ ਜਮਾਉਣ ਵਾਲੀ ਖੂਬਸੂਰਤ ਅਦਾਕਾਰਾ ਕੁਲਰਾਜ ਰੰਧਾਵਾ ਅੱਜ ਆਪਣਾ 35ਵਾਂ ਜਨਮਦਿਨ ਮਨਾ ਰਹੀ ਹੈ। ਉਸ ਦਾ ਜਨਮ 16 ਮਈ, 1983 'ਚ ਦੇਹਰਾਦੂਨ, ਉਤਾਰਖੰਡ 'ਚ ਹੋਇਆ।
ਦੱਸ ਦੇਈਏ ਕਿ ਕੁਲਰਾਜ ਰੰਧਾਵਾ ਨੇ ਆਪਣੀ ਕਰੀਅਰ ਦੀ ਸ਼ੁਰੂਆਤ ਮਾਡਲਿੰਗ ਨਾਲ ਕੀਤੀ ਸੀ। ਕੁਲਰਾਜ ਰੰਧਾਵਾ ਨੇ ਪੰਜਾਬੀ ਫਿਲਮ 'ਮੰਨਤ' ਨਾਲ ਆਪਣੀ ਫਿਲਮੀ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ।
'ਮੰਨਤ' ਫਿਲਮ 'ਚ ਕੁਲਰਾਜ ਰੰਧਾਵਾ ਦੀ ਅਦਾਕਾਰੀ ਨੂੰ ਲੋਕਾਂ ਵਲੋਂ ਖੂਬ ਪਸੰਦ ਕੀਤਾ ਗਿਆ। ਇਸ ਫਿਲਮ ਨਾਲ ਉਨ੍ਹਾਂ ਦਾ ਪਾਲੀਵੁੱਡ ਇੰਡਸਟਰੀ 'ਚ ਬੋਲ-ਬੋਲਾ ਸ਼ੁਰੂ ਹੋਇਆ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਕਦੇ ਵੀ ਪਿੱਛੇ ਮੁੜ ਕੇ ਨਹੀਂ ਦੇਖਿਆ।
ਇਸ ਤੋਂ ਬਾਅਦ ਉਨ੍ਹਾਂ ਨੇ 'ਤੇਰਾ ਮੇਰਾ ਕੀ ਰਿਸ਼ਤਾ', 'ਡਬਲ ਦਿ ਟ੍ਰਬਲ' ਤੇ 'ਨਿਧੀ ਸਿੰਘ' ਵਰਗੀਆਂ ਫਿਲਮਾਂ 'ਚ ਕੰਮ ਕੀਤਾ। 'ਨਿਧੀ ਸਿੰਘ' 'ਚ ਉਨ੍ਹਾਂ ਨੇ ਇਕ ਅਜਿਹੀ ਲੜਕੀ ਦਾ ਕਿਰਦਾਰ ਨਿਭਾਇਆ ਸੀ, ਜੋ ਕਿ ਜੁਲਮ ਖਿਲਾਫ ਆਪਣੀ ਅਵਾਜ਼ ਉਠਾਉਂਦੀ ਹੈ। ਇਸ ਫਿਲਮ 'ਚ ਉਨ੍ਹਾਂ ਦਾ ਵੱਖਰਾ ਹੀ ਰੂਪ ਦੇਖਣ ਨੂੰ ਮਿਲਿਆ ਸੀ।
ਦੱਸਣਯੋਗ ਹੈ ਕਿ ਕੁਲਰਾਜ ਰੰਧਾਵਾ ਨੇ ਆਪਣੀ ਐਕਟਿੰਗ ਦੀ ਸ਼ੁਰੂਆਤ ਛੋਟੇ ਪਰਦੇ 'ਤੇ 'ਕਰੀਨਾ ਕਰੀਨਾ' ਨਾਲ ਕੀਤੀ ਸੀ। 'ਮੰਨਤ' ਫਿਲਮ 'ਚ ਕੁਲਰਾਜ ਰੰਧਾਵਾ ਨੇ ਪਿੰਡ ਦੀ ਸਿੱਧੀ ਸਾਧੀ ਸਾਧਾਰਨ ਲੜਕੀ ਦਾ ਕਿਰਦਾਰ ਨਿਭਾਇਆ ਹੈ। ਇਸ ਫਿਲਮ 'ਚ ਉਨ੍ਹਾਂ ਨਾਲ ਮੁੱਖ ਭੂਮਿਕਾ 'ਚ ਜ਼ਿੰਮੀ ਸ਼ੇਰਗਿੱਲ ਸਨ।
ਇਸ ਤੋਂ ਇਲਾਵਾ ਕੁਲਰਾਜ ਨੇ ਹਿੰਦੀ ਫਿਲਮਾਂ 'ਜਾਨੇ ਭੀ ਦੋ ਯਾਰੋ', 'ਚਾਰ ਦਿਨ ਕੀ ਚਾਂਦਨੀ', 'ਲੱਕੀ ਕਬੂਤਰ', 'ਯਮਲਾ ਪਗਲਾ ਦੀਵਾਨਾ' ਵਰਗੀਆਂ ਹਿੱਟ ਫਿਲਮਾਂ ਵੀ ਦਿੱਤੀਆਂ। ਉਨ੍ਹਾਂ ਨੇ ਫਿਲਮ 'ਚਿੰਟੂ ਜੀ' 'ਚ ਆਪਣੇ ਸਹਿ-ਕਲਾਕਰ ਰਿਸ਼ੀ ਕਪੂਰ ਨਾਲ ਕੰਮ ਕੀਤਾ।