ਹੁਸ਼ਿਆਰਪੁਰ( ਅਮਰਿੰਦਰ)— ਥਾਣਾ ਸਿਟੀ ਪੁਲਸ 'ਚ ਬਾਲੀਵੁੱਡ ਤੇ ਪਾਲੀਵੁੱਡ ਅਦਾਕਾਰਾ ਸੁਰਵੀਨ ਚਾਵਲਾ ਤੇ ਉਸ ਦੇ ਪਰਿਵਾਰ 'ਤੇ 40 ਲੱਖ ਰੁਪਏ ਦੀ ਧੋਖਾਧੜੀ ਮਾਮਲੇ 'ਚ ਬੀਤੇ ਦਿਨੀਂ ਉਸ ਸਮੇਂ ਨਵਾਂ ਮੋੜ ਆ ਗਿਆ ਜਦੋਂ ਸ਼ਿਕਾਇਤਕਰਤਾ ਸਤਪਾਲ ਗੁਪਤਾ ਨੇ ਆਪਣੇ ਵਕੀਲ ਐਡਵੋਕੇਟ ਨਵੀਨ ਜੈਰਥ ਨਾਲ ਪੱਤਰਕਾਰਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਦੋਸ਼ੀ ਚਾਵਲਾ ਪਰਿਵਾਰ ਪੁਲਸ ਜਾਂਚ 'ਚ ਸਹਿਯੋਗ ਨਹੀਂ ਬਲਕਿ ਗੁੰਮਰਾਹ ਕਰਨ 'ਤੇ ਤੁਲਿਆ ਹੋਇਆ ਹੈ। ਐਡਵੋਕੇਟ ਨਵੀਨ ਜੈਰਥ ਨੇ ਕਿਹਾ ਕਿ ਇਕ ਪਾਸੇ ਸੁਰਵੀਨ ਚਾਵਲਾ ਦੇ ਨਾਲ ਉਸਦਾ ਪਤੀ ਅਕਸ਼ੈ ਠੱਕਰ ਬੋਲ ਰਿਹਾ ਹੈ ਕਿ ਉਸਨੂੰ 40 ਲੱਖ ਰੁਪਏ 'ਚ ਬੇਵਜ੍ਹਾ ਸਾਜਿਸ਼ ਤਹਿਤ ਫਸਾਇਆ ਜਾ ਰਿਹਾ ਹੈ, ਕਿਉਂਕਿ ਉਹ ਸੈਲੀਬ੍ਰੇਟੀ ਹੈ। ਦੂਜੇ ਪਾਸੇ ਸੁਰਵੀਨ ਚਾਵਲਾ ਦੇ ਭਰਾ ਮਨਵਿੰਦਰ ਚਾਵਲਾ 'ਤੇ ਪਟਿਆਲਾ ਥਾਣੇ 'ਚ ਪਹਿਲਾਂ ਵੀ ਵਿਦੇਸ਼ ਭੇਜਣ ਦੇ ਨਾਂ 'ਤੇ 10 ਲੱਖ ਰੁਪਏ ਦੀ ਧੋਖਾਧੜੀ ਦਾ ਮਾਮਲਾ ਦਰਜ ਹੈ।
ਦੁਬਈ ਕੁਨੈਕਸ਼ਨ ਦੀ ਵੀ ਹੋਵੇ ਉੱਚ ਪੱਧਰੀ ਜਾਂਚ
ਸ਼ਿਕਾਇਤਕਰਤਾ ਸਤਪਾਲ ਗੁਪਤਾ ਨਾਲ ਐਡਵੋਕੇਟ ਨਵੀਨ ਜੈਰਥ ਨੇ ਮੀਡੀਆ ਸਾਹਮਣੇ ਸ਼ਿਕਾਇਤਕਰਤਾ ਸਤਪਾਲ ਗੁਪਤਾ ਦੇ ਬੇਟੇ ਪੰਕਜ ਗੁਪਤਾ ਤੇ ਜਾਰ ਪਿਕਚਰ ਦੇ ਬੈਨਰ ਹੇਠ ਬਣੀ ਨੀਲ ਬੱਟੇ ਸਨਾਟਾ ਦੇ ਨਿਰਦੇਸ਼ਕ ਅਜੇ ਜੀ. ਰਾਏ ਵਿਚਕਾਰ ਹੋਈ ਆਡੀਓ ਟੈਪ ਸੁਣਾ ਕੇ ਦੋਸ਼ ਲਗਾਇਆ ਕਿ ਟੈਪ 'ਚ ਸਪੱਸ਼ਟ ਤੌਰ 'ਤੇ ਨਿਰਦੇਸ਼ਕ ਕਹਿੰਦਾ ਹੈ ਕਿ ਸਤਪਾਲ ਗੁਪਤਾ ਦਾ ਜਾਰ ਪਿਕਚਰ ਨਾਲ ਕਦੇ ਵੀ ਸਿੱਧਾ ਸੰਪਰਕ ਨਹੀਂ ਹੋਇਆ। ਗੱਲਬਾਤ 'ਚ ਇਕ ਜਗ੍ਹਾ ਦੱਸਿਆ ਗਿਆ ਹੈ ਕਿ ਅਕਸ਼ੈ ਠੱਕਰ ਦੇ ਖਾਤੇ 'ਚ ਕੁੱਲ 1 ਕਰੋੜ 10 ਲੱਖ ਰੁਪਏ ਜਾਰੀ ਪਿਕਚਰ ਵੱਲੋਂ ਦਿਖਾਇਆ ਗਿਆ ਹੈ। ਇਸ ਰਾਸ਼ੀ ਵਿਚੋਂ 50 ਲੱਖ ਰੁਪਏ ਕਿਸੇ ਹੋਰ ਖਾਤੇ ਵਿਚ ਦੁਬਈ ਤੋਂ ਜਮ੍ਹਾ ਹੋਏ ਹਨ। ਉਨ੍ਹਾਂ ਪੁਲਸ ਅਧਿਕਾਰੀਆਂ ਨੂੰ ਅਪੀਲ ਕੀਤੀ ਕਿ ਇਸ ਮਾਮਲੇ ਦੀ ਗੰਭੀਰਤਾ ਨਾਂਲ ਜਾਂਚ ਕੀਤੀ ਜਾਵੇ ਕਿ ਦੁਬਈ ਤੋਂ ਕਿਸਨੇ ਫੰਡਿੰਗ ਕੀਤੀ ਹੈ।
ਕੱਲ ਅਦਾਲਤ 'ਚ ਹੋਵੇਗੀ ਰੈਗੂਲਰ ਬੇਲ ਦੀ ਸੁਣਵਾਈ
ਦੱਸਣਯੋਗ ਹੈ ਕਿ ਥਾਣਾ ਸਿਟੀ ਵਿਖੇ ਦਰਜ ਸ਼ਿਕਾਇਤ 'ਚ ਜਾਂਚ ਪ੍ਰਕਿਰਿਆ 'ਚ ਸ਼ਾਮਲ ਹੋਣ ਲਈ 31 ਮਈ ਨੂੰ 4 ਜੂਨ ਤੱਕ ਅੰਤਰਿਮ ਜਮਾਨਤ 'ਤੇ ਚੱਲ ਰਹੀ ਸੁਰਵੀਨ ਚਾਵਲਾ ਆਪਣੇ ਪਤੀ ਅਕਸ਼ੈ ਠੱਕਰ ਤੇ ਭਰਾ ਮਨਵਿੰਦਰ ਚਾਵਲਾ ਨਾਲ ਪਹੁੰਚੀ ਸੀ। ਹੁਣ 4 ਜੂਨ ਨੂੰ ਜ਼ਿਲਾ ਤੇ ਸੈਸ਼ਨ ਜੱਜ ਸੁਨੀਲ ਕੁਮਾਰ ਅਰੋੜਾ ਦੀ ਅਦਾਲਤ 'ਚ ਰੈਗੂਲਰ ਜਮਾਨਤ ਦੀ ਸੁਣਵਾਈ ਹੋਣੀ ਹੈ। ਸੰਪਰਕ ਕਰਨ 'ਤੇ ਅਕਸ਼ੈ ਠੱਕਰ ਦੇ ਨਾਲ ਚਾਵਲਾ ਪਰਿਵਾਰ ਨੇ ਸਾਫ਼ ਕਰ ਦਿੱਤਾ ਕਿ ਮਾਮਲੇ ਦੀ ਜਾਂਚ ਚੱਲ ਰਹੀ ਹੈ, ਇੰਤਜਾਰ ਕਰੋ, ਜਲਦ ਹੀ ਸਚਾਈ ਸਾਰਿਆਂ ਦੇ ਸਾਹਮਣੇ ਆ ਜਾਵੇਗੀ ਕਿ ਇਸ ਮਾਮਲੇ ਵਿਚ ਸਾਡਾ ਕੋਈ ਸਿੱਧਾ ਸਬੰਧ ਨਹੀਂ ਹੈ।