ਮੁੰਬਈ(ਬਿਊਰੋ)— ਬਾਲੀਵੁੱਡ ਐਕਟਰ ਆਮਿਰ ਖਾਨ ਤੇ ਅਮਿਤਾਭ ਬੱਚਨ ਦੀ ਫਿਲਮ 'ਠਗਸ ਆਫ ਹਿੰਦੁਸਤਾਨ' ਦਾ ਸਾਰੇ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ। ਫਿਲਮ ਨਾਲ ਜੁੜੀ ਕੋਈ ਵੀ ਖਬਰ ਫੈਨਜ਼ ਮਿਸ ਨਹੀਂ ਕਰਨਾ ਚਾਹੁੰਦੇ। ਇਸ ਦੇ ਨਾਲ ਹੀ ਫਿਲਮ ਇਸ ਸਾਲ ਦੀ ਸਭ ਤੋਂ ਵੱਡੀ ਫਿਲਮ ਦਾ ਖਿਤਾਬ ਵੀ ਆਪਣੇ ਨਾਂ ਕਰਨ ਲਈ ਬੇਤਾਬ ਹੈ। ਫਿਲਮ ਨੂੰ ਵਿਜੇ ਕ੍ਰਿਸ਼ਨ ਆਚਾਰੀਆ ਨੇ ਡਾਇਰੈਕਟ ਕੀਤਾ ਹੈ। ਇਸ ਦੇ ਟਰੇਲਰ ਲਾਂਚ ਈਵੈਂਟ ਨੇ ਡਾਇਰੈਕਟਰ ਕ੍ਰਿਸ਼ਨ ਨੇ ਦੱਸਿਆ ਕਿ ਫਿਲਮ ਕਿਸੇ ਨਾਵਲ 'ਤੇ ਆਧਾਰਿਤ ਨਹੀਂ।
ਪਹਿਲਾਂ ਖਬਰਾਂ ਸਨ ਕਿ ਫਿਲਮ ਫਿਲਿਪ ਮੀਡੋਜ ਟੇਲਰ ਦੇ ਨਾਵਲ 'ਕੰਨਫੈਸ਼ਨ ਆਫ ਏ ਠਗ' 'ਤੇ ਆਧਾਰਿਤ ਹੈ। ਹੁਣ ਫਿਲਮ ਨੂੰ ਲੈ ਕੇ ਇਕ ਹੋਰ ਦਿਲਚਸਪ ਖਬਰ ਸਾਹਮਣੇ ਆ ਰਹੀ ਹੈ ਕਿ 'ਠਗਸ ਆਫ ਹਿੰਦੁਸਤਾਨ' ਦੇ ਕਲਾਈਮੈਕਸ ਲਈ ਆਮਿਰ ਤੇ ਅਮਿਤਾਭ ਇਕ ਰਾਏ ਨਹੀਂ ਰੱਖਦੇ। ਇਸੇ ਗੱਲ 'ਤੇ ਕੁਝ ਨੋਕ-ਝੋਕ ਵੀ ਹੋ ਗਈ ਸੀ। ਦਰਅਸਲ ਫਿਲਮ ਦੇ ਕਲਾਈਮੈਕਸ 'ਚ ਦੋਵਾਂ 'ਚੋਂ ਕਿਸੇ ਇਕ ਦੇ ਕਿਰਦਾਰ ਨੇ ਮਰਨਾ ਸੀ। ਇਸੇ ਗੱਲ ਨੂੰ ਲੈ ਕੇ ਦੋਵੇਂ ਕਲਾਕਾਰਾਂ ਨੇ ਡਾਇਰੈਕਟਰ ਨਾਲ ਕਾਫੀ ਲੰਬੀ ਗੱਲਬਾਤ ਕੀਤੀ ਤੇ ਆਮਿਰ ਖਾਨ ਬਾਜ਼ੀ ਜਿੱਤ ਗਏ।
ਖਬਰਾਂ ਹਨ ਕਿ ਆਮਿਰ ਚਾਹੁੰਦੇ ਸਨ ਕਿ ਉਨ੍ਹਾਂ ਦਾ ਕਿਰਦਾਰ ਫਿਰੰਗੀ ਬ੍ਰਿਟਿਸ਼ ਸੈਨਾ ਨਾਲ ਲੜਾਈ ਕਰਦਾ ਹੋਇਆ ਸ਼ਹੀਦ ਹੋ ਜਾਵੇ ਤੇ ਅਮਿਤਾਭ ਦਾ ਕਿਰਦਾਰ ਆਜ਼ਾਦ ਵੀ ਕੁਝ ਅਜਿਹਾ ਹੀ ਚਾਹੁੰਦੇ ਸਨ। ਇਸ ਦੇ ਪਿੱਛੇ ਕਾਰਨ ਹੈ ਕਿ ਜੋ ਵੀ ਆਖਰ 'ਚ ਮਰਦਾ ਹੈ, ਉਸ ਨੂੰ ਲੋਕਾਂ ਦਾ ਖਾਸ ਪਿਆਰ ਮਿਲਦਾ ਹੈ ਤੇ ਉਹ ਲੋਕਾਂ ਦੇ ਦਿਲਾਂ 'ਚ ਘਰ ਵੀ ਕਰ ਜਾਂਦਾ ਹੈ।
ਫਿਲਮ ਦੇ ਕਲਾਈਮੈਕਸ ਨੂੰ ਲੈ ਕੇ ਵੱਖਰੀਆਂ-ਵੱਖਰੀਆਂ ਰਿਪੋਰਟਾਂ ਸਾਹਮਣੇ ਆ ਰਹੀਆਂ ਹਨ। ਹੁਣ ਜੋ ਖਬਰ ਸਾਹਮਣੇ ਆਈ ਹੈ, ਉਸ ਮੁਤਾਬਕ ਫਿਲਮ 'ਚ ਆਮਿਰ ਦਾ ਕਿਰਦਾਰ ਆਖਰ 'ਚ ਮਰੇਗਾ ਤੇ ਕੁਝ ਰਿਪੋਰਟਾਂ ਦਾ ਕਹਿਣਾ ਹੈ ਕਿ ਫਿਲਮ ਦਾ ਕਲਾਈਮੈਕਸ ਅਜੇ ਤੈਅ ਹੀ ਨਹੀਂ ਹੋਇਆ। ਹੁਣ ਤਾਂ ਫਿਲਮ ਦੇ ਰਿਲੀਜ਼ ਤੋਂ ਬਾਅਦ ਯਾਨੀ 8 ਨਵੰਬਰ ਨੂੰ ਹੀ ਪਤਾ ਲੱਗੇਗਾ ਕਿ ਆਖਿਰ 'ਚ ਲੋਕਾਂ ਦਾ ਪਿਆਰ ਕਿਸ ਨੂੰ ਮਿਲਦਾ ਹੈ ਤੇ ਕੌਣ ਸ਼ਹੀਦ ਹੁੰਦਾ ਹੈ।