ਮੁੰਬਈ (ਬਿਊਰੋ) — ਬਾਲੀਵੁੱਡ, ਸਾਊਥ ਵਾਂਗ ਭੋਜਪੁਰੀ ਸਿਤਾਰਿਆਂ ਨੂੰ ਵੀ ਸਿਰਫਿਰੇ ਫੈਨਜ਼ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਤਾਜਾ ਮਾਮਲਾ ਭੋਜਪੁਰੀ ਅਦਾਕਾਰਾ ਰਿਤੂ ਸਿੰਘ ਦਾ ਸਾਹਮਣੇ ਆਇਆ ਹੈ। ਰਿਤੂ ਸਿੰਘ ਨੂੰ ਇਕ ਸਿਰਫਿਰੇ ਆਸ਼ਿਕ ਨੇ ਬੰਦੂਕ ਦੀ ਨੋਕ 'ਤੇ 2 ਘੰਟੇ ਤੱਕ ਬੰਦੀ ਬਣਾ ਕੇ ਰੱਖਿਆ ਸੀ। ਖਬਰਾਂ ਮੁਤਾਬਕ, ਇਹ ਸਖਸ਼ ਰਿਤੂ 'ਤੇ ਵਿਆਹ ਦਾ ਦਬਾਅ ਬਣਾ ਰਿਹਾ ਸੀ।
ਖਬਰਾਂ ਮੁਤਾਬਕ, ਉੱਤਰ ਪ੍ਰਦੇਸ਼ ਦੇ ਰੌਬਟਰਸਗੰਜ ਇਲਾਕੇ 'ਚ ਰਿਤੂ ਸਿੰਘ ਭੋਜਪੁਰੀ ਫਿਲਮ 'ਦੁਲਾਰੀ ਬਿਟਿਆ' ਦੀ ਸ਼ੂਟਿੰਗ ਲਈ ਆਈ ਸੀ। ਇਸ ਦੌਰਾਨ ਅਦਾਕਾਰਾ ਦੇ ਕਮਰੇ 'ਚ ਸਿਰਫਿਰ ਆਸ਼ਿਕ ਜ਼ਬਰਦਸਤੀ ਆ ਗਿਆ। ਇਸ ਸਿਰਫਿਰੇ ਆਸ਼ਿਕ ਦਾ ਨਾਂ ਪੰਕਜ ਯਾਦਵ ਦੱਸਿਆ ਜਾ ਰਿਹਾ ਹੈ। ਉਸ ਨੇ ਰਿਤੂ ਸਿੰਘ ਨੂੰ ਦੋ ਘੰਟੇ ਤੱਕ ਬੰਦੀ ਬਣਾ ਕੇ ਰੱਖਿਆ।
ਪੁਲਸ ਜਦੋਂ ਉਥੇ ਪਹੁੰਚੀ ਤਾਂ ਹਫੜਾ-ਦਫੜੀ 'ਚ ਉਸ ਨੇ ਗੋਲੀ ਵੀ ਚਲਾ ਦਿੱਤੀ। ਇਸ ਨਾਲ ਇਕ ਨੌਜਵਾਨ ਜ਼ਖਮੀ ਹੋ ਗਿਆ। ਹਾਲਾਂਕਿ ਪੁਲਸ ਨੇ ਮੁਸ਼ਕਿਲ ਨਾਲ ਉਸ ਸਖਸ਼ ਨੂੰ ਗ੍ਰਿਫਤਾਰ ਕੀਤਾ ਅਤੇ ਉਸ ਤੋਂ ਪਿਸਤੌਲ ਵੀ ਬਰਾਮਦ ਕੀਤਾ।
ਪਹਿਲਾਂ ਵੀ ਕਰ ਚੁੱਕਾ ਹੈ ਅਜਿਹੀ ਹਰਕਤ
ਰਿਤੂ ਸਿੰਘ ਨੇ ਪੁਲਸ ਨੂੰ ਦੱਸਿਆ ਕਿ ਪੰਕਜ ਯਾਦਵ ਪਿਛਲੇ 2 ਸਾਲਾ ਤੋਂ ਮੇਰਾ ਪਿੱਛਾ ਕਰ ਰਿਹਾ ਸੀ। ਅਜਿਹਾ ਉਹ ਗਲਤ ਇਰਾਦੇ ਨਾਲ ਕਰ ਰਿਹਾ ਸੀ। ਉਹ ਮੇਰੇ 'ਤੇ ਵਿਆਹ ਦਾ ਦਬਾਅ ਬਣਾ ਰਿਹਾ ਸੀ। ਇਸ ਖਿਲਾਫ ਮੈਂ ਮੁੰਬਈ ਪੁਲਸ 'ਚ ਸ਼ਿਕਾਇਤ ਵੀ ਕੀਤੀ ਸੀ। ਰਿਤੂ ਸਿੰਘ ਨੇ ਭੋਜਪੁਰੀ ਫਿਲਮ ਇੰਡਸਟਰੀ 'ਚ ਕਰੀਅਰ ਦੀ ਸ਼ੁਰੂਆਤ ਸਾਲ 2013 'ਚ ਫਿਲਮ 'ਦਿਲਦਾਰ ਸਾਂਵਰੀਆ' ਨਾਲ ਕੀਤੀ ਸੀ। ਇਸ ਫਿਲਮ 'ਚ ਯਸ਼ ਮਿਸ਼ਰਾ ਤੇ ਅੰਜਨਾ ਸਿੰਘ ਸਨ। ਰਿਤੂ ਸਿੰਘ ਨੂੰ ਪਛਾਣ 'ਦੁਲਾਰਾ' ਨਾਲ ਮਿਲੀ ਸੀ। ਦੱਸ ਦਈਏ ਕਿ ਫਿਲਮ 'ਦੁਲਾਰੀ ਬਿਟਿਆ' 'ਚ ਉਸ ਨਾਲ ਹੀਰੋ ਰਾਕੇਸ਼ ਮਿਸ਼ਰਾ ਤੇ ਅਮਰੀਸ਼ ਸਿੰਘ ਹੈ।
ਸਪੋਰਟ 'ਚ ਆਏ ਭੋਜਪੁਰੀ ਸਿਤਾਰੇ
ਰਿਤੂ ਸਿੰਘ ਦੇ ਸਪੋਰਟ 'ਚ ਕਈ ਭੋਜਪੁਰੀ ਸਿਤਾਰੇ ਵੀ ਆ ਰਹੇ ਹਨ। ਭੋਜਪੁਰੀ ਅਦਾਕਾਰਾ ਆਮਰਪਾਲੀ ਦੁਬੇ ਨੇ ਆਪਣੀ ਇੰਸਟਾਗ੍ਰਾਮ ਸਟੋਰ ਦੇ ਜ਼ਰੀਏ ਰਿਤੂ ਦਾ ਸਮਰਥਨ ਕੀਤਾ ਹੈ। ਆਮਰਪਾਲੀ ਨੇ ਲਿਖਿਆ ਹੈ, ''ਅੱਜ ਰਿਤੂ ਨਾਲ ਜੋ ਹੋਇਆ, ਉਸ ਨੂੰ ਸਵੀਕਾਰ ਨਹੀਂ ਕੀਤਾ ਜਾ ਸਕਦਾ। ਭਗਵਾਨ ਦੀ ਕ੍ਰਿਪਾ ਹੈ ਕਿ ਉਹ ਠੀਕ ਹੈ।''
ਅੱਗੇ ਆਮਰਪਾਲੀ ਨੇ ਲਿਖਿਆ, ''ਕਿਸੇ ਵੀ ਇਨਸਾਨ ਦੀ ਇੰਨੀ ਹਿੰਮਤ ਨਹੀਂ ਹੋਣੀ ਚਾਹੀਦੀ ਕਿ ਉਹ ਇਸ ਕਦਰ ਡਰਾ ਸਕੇ।'' ਇਸ ਤੋਂ ਇਲਾਵਾ ਉਸ ਨੇ ਅਪੀਲ ਕੀਤੀ ਕਿ ਜਿਨ੍ਹਾਂ ਲੋਕਾਂ ਨੇ ਇਹ ਵੀਡੀਓ ਬਣਾਇਆ ਹੈ, ਉਹ ਖੁਦ ਜਾ ਕੇ ਪੁਲਸ ਨੂੰ ਵੀਡੀਓ ਦੇਣ ਤਾਂ ਉਸ ਖਤਰਨਾਕ ਆਦਮੀ ਨੂੰ ਸਜ਼ਾ ਹੋ ਸਕੇ।
