ਮੁੰਬਈ(ਬਿਊਰੋ)— ਬਾਲੀਵੁੱਡ ਦੇ ਦਿੱਗਜ ਤੇ ਟਾਪ ਸਿੰਗਰ ਉਦਿਤ ਨਾਰਾਇਣ ਦੇ ਬੇਟੇ ਆਦਿੱਤਿਆ ਨਾਰਾਇਣ ਅਕਸਰ ਆਪਣੀਆਂ ਹਰਕਤਾਂ ਨੂੰ ਲੈ ਕੇ ਚਰਚਾ 'ਚ ਰਹਿੰਦੇ ਹਨ। ਸੋਮਵਾਰ ਨੂੰ ਆਦਿੱਤਿਆ ਨੇ ਅੰਧੇਰੀ ਵੈਸਟ 'ਚ ਆਪਣੀ ਮਰਸਡੀਜ਼ ਕਾਰ ਤੋਂ ਇਕ ਆਟੋ ਰਿਕਸ਼ਾ ਨੂੰ ਟੱਕਰ ਮਾਰ ਦਿੱਤੀ ਸੀ, ਜਿਸ ਤੋਂ ਬਾਅਦ ਮੁੰਬਈ ਪੁਲਸ ਨੇ ਉਨ੍ਹਾਂ ਨੂੰ ਗ੍ਰਿਫਤਾਰ ਕਰ ਲਿਆ ਸੀ। ਹੁਣ ਇਸ ਮਾਮਲੇ 'ਚ ਆਦਿੱਤਿਆ ਨਾਰਾਇਣ ਨੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ। ਆਦਿੱਤਿਆ ਨੇ ਇਸ ਘਟਨਾ ਲਈ ਮੁਆਫੀ ਮੰਗ ਲਈ ਹੈ। ਉਨ੍ਹਾਂ ਨੇ ਕਿਹਾ ਹੈ ਕਿ, ਜੋ ਹੋਇਆ ਉਹ ਬਦਕਿਸਮਤੀ ਸੀ, ਜਿਸ ਦਾ ਉਨ੍ਹਾਂ ਨੂੰ ਅਫਸੋਸ ਹੈ।
ਆਦਿੱਤਿਆ ਨੇ ਦੱਸਿਆ ਕਿ ਉਹ ਸਾਢੇ 12 ਵਜੇ ਓਸ਼ੀਵਾਰਾ 'ਚ ਆਪਣੇ ਘਰ ਤੋਂ ਅੰਧੇਰੀ ਲਈ ਮਰਸਡੀਜ਼ 'ਚ ਨਿਕਲੇ ਸਨ। ਲੋਖੰਡਵਾਲਾ ਤੋਂ ਉਨ੍ਹਾਂ ਵੱਲ ਤੇਜ਼ੀ ਨਾਲ ਇਕ ਆਟੋ ਆ ਰਿਹਾ ਸੀ। ਆਦਿੱਤਿਆ ਨੇ ਕਿਹਾ, ''ਮੈਨੂੰ ਲੱਗਾ ਕਿ ਉਹ ਹੌਲੀ ਹੋ ਜਾਵੇਗਾ ਪਰ ਉਸ ਨੇ ਸਪੀਡ ਘੱਟ ਨਹੀਂ ਕੀਤੀ ਬਲਕਿ ਸੱਜੇ ਪਾਸੇ ਮੁੜ ਗਿਆ। ਉਸ ਨੂੰ ਬਚਾਉਣ ਲਈ ਮੈਂ ਗੱਡੀ ਖੱਬੇ ਪਾਸੇ ਮੋੜ ਦਿੱਤੀ, ਜਿਸ ਨਾਲ ਇਕ ਦੂਜੇ ਆਟੋ ਨੂੰ ਟੱਕਰ ਲੱਗ ਗਈ।'' ਆਦਿੱਤਿਆ ਨੇ ਜ਼ਖਮੀਆਂ ਦੇ ਇਲਾਜ ਦਾ ਖਰਚ ਚੁੱਕਣ ਦਾ ਵੀ ਫੈਸਲਾ ਕੀਤਾ ਹੈ।
ਤੁਹਾਨੂੰ ਦੱਸ ਦੇਈਏ ਕਿ ਇਸ ਹਾਦਸੇ ਤੋਂ ਬਾਅਦ ਆਦਿੱਤਿਆ 'ਤੇ ਸ਼ਿਕਾਇਤ ਦਰਜ ਕੀਤੀ ਗਈ ਸੀ। ਜ਼ਮਾਨਤ ਮਿਲਣ ਤੋਂ ਬਾਅਦ ਆਦਿੱਤਿਆ 'ਤੇ 10 ਹਜ਼ਾਰ ਰੁਪਏ ਜੁਰਮਾਨਾ ਲਗਾਇਆ ਗਿਆ ਹੈ। ਇਸ ਹਾਦਸੇ 'ਚ ਆਟੋ ਡਰਾਈਵਰ ਦੀ ਹਾਲਤ ਗੰਭੀਰ ਹੈ। ਉੱਥੇ ਆਟੋ 'ਚ ਬੈਠੀ 32 ਸਾਲਾ ਮਹਿਲਾ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। 64 ਸਾਲ ਦੇ ਆਟੋ ਡਰਾਈਵਰ ਨੂੰ ਕੋਕੀਲਾਬੇਨ ਹਸਪਤਾਲ ਦੇ ਆਈ. ਸੀ. ਯੂ. 'ਚ ਦਾਖਲ ਕਰਾਇਆ ਗਿਆ ਹੈ।
ਆਦਿੱਤਿਆ ਨਾਰਾਇਣ ਦਾ ਵੀ ਮੈਡੀਕਲ ਟੈਸਟ ਕਰਵਾ ਕੇ ਇਹ ਚੈੱਕ ਕੀਤਾ ਗਿਆ ਕਿ ਕਿਤੇ ਉਨ੍ਹਾਂ ਨੇ ਸ਼ਰਾਬ ਤਾਂ ਨਹੀਂ ਪੀਤੀ ਸੀ ਪਰ ਰਿਜ਼ਲਟ ਨਕਾਰਾਤਮਕ ਆਏ। ਜ਼ਿਕਰਯੋਗ ਹੈ ਕਿ ਇਹ ਹਾਦਸਾ ਲੋਖੰਡਵਾਲਾ 'ਚ ਇੰਦਰਲੋਕ ਬਿਲਡਿੰਗ ਕੋਲ ਦਾ ਹੈ। ਐਕਸੀਡੈਂਟ ਤੋਂ ਬਾਅਦ ਆਦਿੱਤਿਆ ਖੁਦ ਆਪਣੀ ਗੱਡੀ ਨਾਲ ਜ਼ਖਮੀ ਮਹਿਲਾ ਨੂੰ ਹਸਪਤਾਲ ਲੈ ਕੇ ਗਏ ਸਨ ਪਰ ਡਰਾਈਵਰ ਤੇ ਮਹਿਲਾ ਨੇ ਆਦਿੱਤਿਆ ਵਿਰੁੱਧ ਐੱਫ. ਆਈ. ਆਰ. ਦਰਜ ਕਰਵਾ ਦਿੱਤੀ।
ਇਹ ਪਹਿਲੀ ਵਾਰ ਨਹੀਂ ਹੈ, ਜਦੋਂ ਆਦਿੱਤਿਆ ਆਪਣੀ ਹਰਕਤ ਕਾਰਨ ਬਦਨਾਮ ਹੋਏ ਹਨ। ਇਸ ਤੋਂ ਪਹਿਲਾਂ ਵੀ ਪਿਛਲੇ ਸਾਲ ਆਦਿੱਤਿਆ ਦਾ ਇਕ ਏਅਰਲਾਈਨ ਦੇ ਸਟਾਫ ਨੂੰ ਧਮਕਾਉਣ ਤੇ ਇਤਰਾਜ਼ਯੋਗ ਸ਼ਬਦਾਂ ਦਾ ਇਸਤੇਮਾਲ ਕਰਦੇ ਹੋਏ ਦੀ ਵੀਡੀਓ ਲੀਕ ਹੋਇਆ ਸੀ।