ਮੁੰਬਈ(ਬਿਊਰੋ)— ਪੱਛਮੀ ਬੰਗਾਲ ਦੀ ਇੱਕ ਕੋਲੇ ਦੀ ਖਾਣ ਵਿੱਚ ਸਾਲ 1989 ਵਿੱਚ ਸੈਂਕੜੇ ਫੁੱਟ ਹੇਠਾਂ ਫਸੇ 65 ਵਿਅਕਤੀਆਂ ਨੂੰ ਸੁਰੱਖਿਅਤ ਬਚਾਉਣ ਵਾਲੇ ਅੰਮ੍ਰਿਤਸਰ ਵਾਸੀ ਜਸਵੰਤ ਸਿੰਘ ਗਿੱਲ ਦੀ ਇਹ ਬਹਾਦਰੀ ਹੁਣ ਬਾਲੀਵੁੱਡ ਦੇ ਪਰਦੇ 'ਤੇ ਦਿਖਾਈ ਜਾਵੇਗੀ। ਇਸ ਬਹਾਦਰੀ ਲਈ ਉਨ੍ਹਾਂ ਨੂੰ ਰਾਸ਼ਟਰਪਤੀ ਕੋਲੋਂ 'ਸਰਵੋਤਮ ਜੀਵਨ ਰਕਸ਼ਾ ਪੱਦਕ' ਵੀ ਮਿਲ ਚੁੱਕਿਆ ਹੈ। ਇਸ ਬਹਾਦਰੀ ਦੀ ਗਾਥਾ ਨੂੰ ਫਿਲਮੀ ਪਰਦੇ 'ਤੇ ਦਰਸਾਉਣ ਲਈ ਸਾਬਕਾ ਵਧੀਕ ਚੀਫ ਮਾਈਨਿੰਗ ਇੰਜੀਨੀਅਰ ਜਸਵੰਤ ਸਿੰਘ ਗਿੱਲ ਅਤੇ ਬਾਲੀਵੁੱਡ ਨਾਇਕ ਅਜੇ ਦੇਵਗਨ ਦੀ ਫਿਲਮ ਕੰਪਨੀ ਵਿਚਾਲੇ ਸਮਝੌਤਾ ਹੋ ਚੁੱਕਿਆ ਹੈ, ਜਿਸ ਦੇ ਤਹਿਤ ਬਹਾਦਰੀ ਦੀ ਕਹਾਣੀ ਨੂੰ ਦਿਖਾਉਣ ਦੇ ਸਮੁੱਚੇ ਹੱਕ ਅਜੇ ਦੇਵਗਨ ਨੂੰ ਸੌਂਪ ਦਿੱਤੇ ਗਏ ਹਨ।
ਸ੍ਰੀ ਗਿੱਲ ਨੂੰ ਰਾਣੀਗੰਜ ਕੋਲੇ ਦੀ ਖਾਣ ਬਚਾਓ ਮੁਹਿੰਮ ਦੇ ਨਾਇਕ ਵਜੋਂ ਵੀ ਜਾਣਿਆ ਜਾਂਦਾ ਹੈ। ਉਹ ਇਸ ਵੇਲੇ ਲਗਭਗ 77 ਵਰ੍ਹਿਆਂ ਦੇ ਹਨ। ਉਨ੍ਹਾਂ ਪੁਸ਼ਟੀ ਕੀਤੀ ਹੈ ਕਿ ਅਜੇ ਦੇਵਗਨ ਫਿਲਮ ਲਿਮਟਿਡ ਦੀ ਟੀਮ ਨੇ ਉਨ੍ਹਾਂ ਨਾਲ ਸੰਪਰਕ ਕੀਤਾ ਹੈ, ਜਿਸ ਤੋਂ ਬਾਅਦ ਦੋਵਾਂ ਧਿਰਾਂ ਵਿਚਾਲੇ ਮੀਟਿੰਗ ਹੋਈ ਹੈ। ਫਿਲਮ ਟੀਮ ਵੱਲੋਂ ਉਨ੍ਹਾਂ ਦੀ ਬਚਾਅ ਮੁਹਿੰਮ 'ਤੇ ਆਧਾਰਿਤ ਫਿਲਮ ਬਣਾਉਣ ਦਾ ਫ਼ੈਸਲਾ ਕੀਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ 13 ਨਵੰਬਰ 1989 ਨੂੰ ਪੱਛਮੀ ਬੰਗਾਲ ਦੇ ਰਾਣੀਗੰਜ ਇਲਾਕੇ ਵਿੱਚ ਕੋਲੇ ਦੀ ਖਾਣ ਵਿੱਚ 65 ਮਜ਼ਦੂਰ ਫਸ ਗਏ ਸਨ, ਜਿਨ੍ਹਾਂ ਨੂੰ ਬਚਾਉਣ ਲਈ ਸ੍ਰੀ ਗਿੱਲ ਨੇ ਨਿਵੇਕਲਾ ਤਰੀਕਾ ਲੱਭਿਆ, ਜਿਸ ਤਹਿਤ 6 ਫੁੱਟ ਦਾ 21 ਇੰਚ ਘੇਰੇ ਦਾ ਕੈਪਸੂਲ ਤਿਆਰ ਕੀਤਾ ਗਿਆ, ਜਿਸ ਵਿੱਚ ਇੱਕ ਵਿਅਕਤੀ ਖੜ੍ਹਾ ਹੋ ਸਕਦਾ ਸੀ।
ਖਾਣ ਵਿੱਚ ਹੇਠਾਂ ਉਤਰਨ ਲਈ ਇੱਕ ਛੋਟਾ ਬੋਰ ਕੀਤਾ ਗਿਆ ਅਤੇ ਇਸ ਕੈਪਸੂਲ ਵਿੱਚ ਸ੍ਰੀ ਗਿੱਲ ਖੁਦ ਸਵਾਰ ਹੋ ਕੇ 110 ਫੁੱਟ ਹੇਠਾਂ ਉਤਰੇ ਅਤੇ ਇੱਕ-ਇੱਕ ਕਰਕੇ ਅੰਦਰ ਫਸੇ 65 ਵਿਅਕਤੀਆਂ ਨੂੰ ਕੈਪਸੂਲ ਦੀ ਮੱਦਦ ਨਾਲ ਸੁਰੱਖਿਅਤ ਬਾਹਰ ਕੱਢਿਆ ਗਿਆ। ਉਸਦੀ ਇਸ ਬਹਾਦਰੀ ਨੂੰ ਕੋਲ ਇੰਡੀਆ ਲਿਮਟਿਡ ਵੱਲੋਂ ਹਰ ਸਾਲ 16 ਨਵੰਬਰ ਨੂੰ ਬਚਾਅ ਮੁਹਿੰਮ ਦੇ ਨਾਂ ਵਜੋਂ ਮਨਾਇਆ ਜਾਂਦਾ ਹੈ।