ਨਵੀਂ ਦਿੱਲੀ(ਬਿਊਰੋ)— ਅਦਾਕਾਰਾ ਤੇ ਐੱਸ. ਪੀ. ਸੰਸਦ ਜਯਾ ਬੱਚਨ ਦਾ ਨਾਂ ਸਭ ਤੋਂ ਧਨੀ ਰਾਜ ਸਭਾ ਸੰਸਦ ਹੋਣ ਦਾ ਰਿਕਾਰਡ ਜਲਦ ਜੁੜ ਸਕਦਾ ਹੈ। ਹਾਲ ਹੀ 'ਚ ਉਨ੍ਹਾਂ ਨੇ ਸਪਾ ਉਮੀਦਵਾਰ ਦੇ ਤੌਰ 'ਤੇ ਰਾਜ ਸਭਾ ਲਈ ਪਰਚਾ ਦਾਖਲ ਕੀਤਾ ਸੀ। ਇਸ ਦੌਰਾਨ ਦਿੱਤੇ ਹਲਫਨਾਮੇ ਮੁਤਾਬਕ, ਜਯਾ ਬੱਚਨ ਤੇ ਉਨ੍ਹਾਂ ਦੇ ਪਤੀ ਅਮਿਤਾਭ ਬੱਚਨ ਕੋਲ 1,000 ਕਰੋੜ ਰੁਪਏ ਗੀ ਸੰਪਤੀ ਹੈ।
ਇਸ ਸੰਪਤੀ 'ਚ ਜਿਥੇ ਕੀਮਤੀ ਗੱਡੀਆਂ ਤੇ ਕਰੋੜਾਂ ਦੀ ਜਿਊਲਰੀ ਸ਼ਾਮਲ ਹੈ। ਉਥੇ ਅਮਿਤਾਭ ਬੱਚਨ ਕੋਲ ਇਕ ਟਾਟਾ ਨੈਨੋ ਕਾਰ ਤੇ ਇਕ ਟਰੈਕਟਰ ਵੀ ਹੈ। ਜਯਾ ਬੱਚਨ ਦੇ ਹਲਫਨਾਮੇ ਮੁਤਾਬਕ, ਦੋਵਾਂ ਕੋਲ ਕਰੀਬ 62 ਕਰੋੜ ਦੀ ਗੋਲਡ ਜਿਊਲਰੀ ਹੈ।
ਦਿਲਚਸਪ ਇਹ ਹੈ ਕਿ ਅਮਿਤਾਭ ਬੱਚਨ ਕੋਲ ਜ਼ਿਆਦਾ ਜਿਊਲਰੀ ਹੈ। ਅਮਿਤਾਭ ਕੋਲ 36 ਕਰੋੜ ਰੁਪਏ ਦੀ ਜਿਊਲਰੀ ਹੈ, ਜਦੋਂਕਿ ਜਯਾ ਬੱਚਨ ਕੋਲ 26 ਕਰੋੜ ਰੁਪਏ ਦੀ ਜਿਊਲਰੀ ਹੈ।
ਬੱਚਨ ਦੰਪਤੀ ਕੋਲ ਕਰੀਬ 13 ਕਰੋੜ ਰੁਪਏ ਦੀ ਕੀਮਤ ਦੀਆਂ 12 ਗੱਡੀਆਂ ਹਨ। ਅਮਿਤਾਭ ਕੋਲ 9 ਲੱਖ ਰੁਪਏ ਦਾ ਇਕ ਕੀਮਤੀ ਪੈੱਨ ਵੀ ਹੈ। ਬੱਚਨ ਦੰਪਤੀ ਕੋਲ ਕਰੀਬ 4 ਕਰੋੜ ਰੁਪਏ ਦੀਆਂ ਘੜੀਆਂ ਹਨ ਜਦੋਂਕਿ ਅਮਿਤਾਭ ਕੋਲ 3.4 ਕਰੋੜ ਰੁਪਏ ਦੀਆਂ ਘੜੀਆਂ ਹਨ।
ਹਾਲਾਂਕਿ ਜਯਾ ਬੱਚਨ ਕੋਲ 51 ਲੱਖ ਰੁਪਏ ਦੀਆਂ ਘੜੀਆਂ ਹਨ। ਦੋਵਾਂ ਕੋਲ ਫਰਾਂਸ ਦੇ ਬ੍ਰਿਗਨੋਗਨ ਪਲੇਜ 'ਚ 3,175 ਵਰਗ ਮੀਟਰ ਦੀ ਰੇਜੀਡੇਂਸ਼ੀਅਲ ਸੰਪਤੀ ਵੀ ਹੈ।
ਭਾਰਤ 'ਚ ਉਸ ਕੋਲ ਨੋਇਡਾ, ਭੋਪਾਲ, ਪੁਣੇ, ਅਹਿਮਾਦਾਬਾਦ, ਗਾਂਧੀ ਨਗਰ 'ਚ ਸੰਪਤੀ ਹੈ। ਅਮਿਤਾਭ ਕੋਲ ਬਾਰਾਬੰਕੀ ਦੇ ਦੌਲਤਪੁਰ ਇਲਾਕੇ 'ਚ 5.7 ਕਰੋੜ ਰੁਪਏ ਦੇ 3 ਪਲਾਟ ਹਨ।
