ਮੁੰਬਈ(ਬਿਊਰੋ)— ਪਿਆਰ ਤੇ ਤਕਰਾਰ ਤਾਂ ਹਰ ਰਿਸ਼ਤੇ 'ਚ ਹੀ ਹੁੰਦੀ ਹੈ ਪਰ ਕਦੇ ਆਪਣੇ ਪਿਆਰ ਲਈ ਫੇਮਸ ਹਾਲੀਵੁੱਡ ਦੀ ਜੋੜੀ ਐਂਜਲੀਨਾ ਜੌਲੀ ਅਤੇ ਬ੍ਰੈਡ ਪਿਟ ਦੋ ਸਾਲ ਪਹਿਲਾਂ ਵੱਖ ਹੋ ਗਏ ਸਨ। ਅੱਜ ਵੀ ਉਨ੍ਹਾਂ ਦੇ ਰਿਸ਼ਤੇ 'ਚ ਕੜਵਾਹਟ ਵਧਦੀ ਹੀ ਜਾ ਰਹੀ ਹੈ।
ਹੁਣ ਇਕ ਵਾਰ ਫਿਰ ਦੋਵਾਂ ਦਾ ਨਾਂ ਸੁਰਖੀਆਂ 'ਚ ਆਇਆ ਹੈ ਕਿਉਂਕਿ ਐਂਜਲੀਨਾ ਨੇ ਫਿਰ ਆਪਣੇ ਸਾਬਕਾ ਪਤੀ ਵਿਰੁੱਧ ਬੱਚਿਆਂ ਦਾ ਖਰਚਾ ਨਾ ਦੇਣ ਦਾ ਕੇਸ ਦਰਜ ਕਰਵਾ ਦਿੱਤਾ ਹੈ।
ਮੰਗਲਵਾਰ ਨੂੰ ਐਂਜਲੀਨਾ ਦੇ ਵਕੀਲ ਨੇ ਕੋਰਟ ਨੂੰ ਕਿਹਾ ਕਿ ਬ੍ਰੈਡ ਪਿਟ ਨੇ ਕਰੀਬ ਡੇਢ ਸਾਲ ਤੋਂ ਬੱਚਿਆਂ ਦੀ ਦੇਖਭਾਲ ਲਈ ਕੋਈ ਖਾਸ ਪੈਸੇ ਨਹੀਂ ਦਿੱਤੇ, ਜਿਸ ਲਈ ਉਹ ਕੋਰਟ ਦੀ ਮਦਦ ਚਾਹੁੰਦੇ ਹਨ।
ਬ੍ਰੈਡ ਅਤੇ ਐਂਜਲੀਨਾ ਦੇ 6 ਬੱਚੇ ਹਨ, 3 ਮੁੰਡੇ ਅਤੇ 3 ਕੁੜੀਆਂ। ਖਬਰਾਂ ਤਾਂ ਇਹ ਵੀ ਹਨ ਕਿ ਐਂਜਲੀਨਾ ਦੀ ਇਸ ਸ਼ਿਕਾਇਤ ਤੋਂ ਬਾਅਦ ਬ੍ਰੈਡ ਪਿਟ ਨੇ ਆਪਣੇ ਵਕੀਲ ਨਾਲ ਮੁਲਾਕਾਤ ਕੀਤੀ ਹੈ।
ਇਸ ਸਾਲ ਜੂਨ 'ਚ ਬੱਚਿਆਂ ਨੂੰ ਰੱਖਣ ਸਬੰਧੀ ਦੋਵਾਂ ਦੀ ਤਕਰਾਰ ਕਾਫੀ ਵੱਧ ਗਈ ਸੀ। ਜੱਜ ਨੇ ਜੌਲੀ ਨੂੰ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਸੀ ਕਿ ਬੱਚਿਆਂ ਨੂੰ ਉਨ੍ਹਾਂ ਦੇ ਪਿਓ ਤੋਂ ਵੱਖ ਰੱਖਣਾ ਸਹੀਂ ਨਹੀਂ ਹੋਵੇਗਾ।
ਜੇਕਰ ਦੋਵਾਂ ਦੀ ਪ੍ਰੋਫੈਸ਼ਨਲ ਜ਼ਿੰਦਗੀ ਦੀ ਗੱਲ ਕੀਤੀ ਜਾਵੇ ਤਾਂ ਦੋਵੇਂ ਹੀ ਆਪੋ-ਆਪਣੀਆਂ ਫਿਲਮਾਂ ਦੀ ਸ਼ੂਟਿੰਗ 'ਚ ਰੁੱਝੇ ਹੋਏ ਹਨ। ਹੁਣ ਅਦਾਲਤ ਦੇ ਮਸ਼ਵਰੇ ਤੋਂ ਬਾਅਦ ਦੇਖਣਾ ਹੋਵੇਗਾ ਕਿ ਦੋਵੇਂ ਕੀ ਫੈਸਲਾ ਲੈਂਦੇ ਹਨ।
