ਮੁੰਬਈ(ਬਿਊਰੋ)— ਟੀ.ਵੀ. ਅਦਾਕਾਰਾ ਅੰਕਿਤਾ ਲੋਖੰਡੇ ਅੱਜ ਆਪਣਾ 35ਵਾਂ ਜਨਮਦਿਨ ਮਨਾ ਰਹੀ ਹੈ। ਟੀ. ਵੀ. ਦੀ ਦੁਨੀਆ 'ਚ ਅੰਕਿਤਾ ਨੇ ਕਾਫੀ ਨਾਮ ਕਮਾਇਆ। ਟੀ.ਵੀ. ਦੁਨੀਆ ਤੋਂ ਬਾਅਦ ਹੁਣ ਅੰਕਿਤਾ ਲੋਖੰਡੇ ਬਾਲੀਵੁੱਡ 'ਚ ਐਂਟਰੀ ਕਰ ਚੁੱਕੀ ਹੈ। ਅੰਕਿਤਾ ਲੋਖੰਡੇ ਦਾ ਜਨਮ 19 ਦਸੰਬਰ 1984 'ਚ ਇੰਦੌਰ ਦੀ ਇਕ ਮਹਾਰਾਸ਼ਟਰੀਅਨ ਫੈਮਿਲੀ 'ਚ ਹੋਇਆ। ਅੰਕਿਤਾ ਦਾ ਅਸਲੀ ਨਾਮ ਤਨੁਜਾ ਹੈ। ਅੰਕਿਤਾ ਨੇ ਜੀ.ਟੀ.ਵੀ. ਦੇ ਟੈਲੇਂਟ ਹੰਟ ਸ਼ੋਅ 'ਸਿਨੇ ਸਟਾਰ ਦੀ ਖੋਜ ਸੀਜ਼ਨ 1' ਨਾਲ ਪਹਿਲੀ ਵਾਰ ਟੀ.ਵੀ. 'ਤੇ ਡੈਬਿਊ ਕੀਤਾ ਸੀ। ਇਸ ਸ਼ੋਅ ਵਿਚ ਅੰਕਿਤਾ ਜਿੱਤ ਨਹੀਂ ਪਾਈ ਪਰ ਇਸ ਰਿਐਲਿਟੀ ਸ਼ੋਅ ਨੇ ਉਨ੍ਹਾਂ ਲਈ ਕਰੀਅਰ ਦੇ ਰਸਤੇ ਖੋਲ੍ਹ ਦਿੱਤੇ। ਸੀਰੀਅਲ 'ਪਵਿੱਤਰ ਰਿਸ਼ਤਾ' ਨੇ ਰਾਤੋਂ-ਰਾਤ ਅੰਕਿਤਾ ਨੂੰ ਘਰ-ਘਰ 'ਚ ਮਸ਼ਹੂਰ ਕਰ ਦਿੱਤਾ। ਅੰਕਿਤਾ 'ਪਵਿੱਤਰ ਰਿਸ਼ਤਾ' 'ਚ ਉਨ੍ਹਾਂ ਦੇ ਕੋ-ਸਟਾਰ ਰਹੇ ਸੁਸ਼ਾਂਤ ਸਿੰਘ ਰਾਜਪੂਤ ਨੂੰ ਡੇਟ ਕਰ ਚੁੱਕੀ ਹੈ। ਆਪਣੇ ਬਰੇਕਅੱਪ ਤੋਂ ਬਾਅਦ ਅੰਕਿਤਾ ਤਨਾਅ 'ਚ ਸੀ ਪਰ ਖੁੱਦ ਨੂੰ ਮਜ਼ਬੂਤ ਬਣਾ ਕੇ ਉਨ੍ਹਾਂ ਨੇ ਦਮਦਾਰ ਵਾਪਸੀ ਕੀਤੀ। ਅੰਕਿਤਾ ਲੋਖੰਡੇ ਫਿਲਮ 'ਮਣੀਕਰਣਿਕਾ' ਵਿਚ ਵੀ ਨਜ਼ਰ ਆ ਚੁੱਕੀ ਹੈ। ਇਸ ਫਿਲਮ ਨੂੰ ਦਰਸ਼ਕਾਂ ਵੱਲੋਂ ਕਾਫੀ ਪਿਆਰ ਮਿਲਿਆ। ਇਸ ਫਿਲਮ ਨੇ ਬਾਕਸ ਆਫਿਸ ’ਤੇ ਕਾਫੀ ਵਧੀਆ ਕਮਾਈ ਕੀਤੀ ਸੀ।