ਜਲੰਧਰ (ਬਿਊਰੋ)— ਅਕਸਰ ਸੁਣਨ 'ਚ ਆਉਂਦਾ ਹੈ ਕਿ ਪੰਜਾਬੀ ਗਾਇਕ ਜਾਂ ਪੰਜਾਬੀ ਅਦਾਕਾਰ ਦੀ ਬਾਲੀਵੁੱਡ 'ਚ ਐਂਟਰੀ ਹੁੰਦੀ ਹੈ।ਪਰ ਅਜਿਹਾ ਬਹੁਤ ਘੱਟ ਸੁਣਨ 'ਚ ਆਇਆ ਕਿ ਪੰਜਾਬੀ ਗਾਣਿਆਂ ਦੇ ਵੀਡੀਓ ਡਾਇਰੈਕਟਰ ਦੀ ਬਾਲੀਵੁੱਡ 'ਚ ਐਂਟਰੀ ਹੋਈ ਹੋਵੇ ਪਰ ਇਹ ਗੱਲ ਬਿਲਕੁਲ ਸੱਚ ਹੈ।ਡਾਇਰੈਕਟਰ ਗਿਫਟੀ ਤੋਂ ਬਾਅਦ ਹੁਣ ਪੰਜਾਬੀ ਗਾਣਿਆਂ ਦੇ ਮਸ਼ਹੂਰ ਵੀਡੀਓ ਡਾਇਰੈਕਟਰ ਅਰਵਿੰਦਰ ਖਹਿਰਾ ਨੇ ਬਾਲੀਵੁੱਡ 'ਚ ਡੈਬਿਊ ਕਰ ਲਿਆ ਹੈ। ਅਰਵਿੰਦਰ ਖਹਿਰਾ ਨੇ ਬਾਲੀਵੁੱਡ ਫਿਲਮ 'ਖਾਨਦਾਨੀ ਸ਼ਫਾਖਾਨਾ' ਲਈ ਇਕ ਗੀਤ ਡਾਇਰੈਕਟ ਕੀਤਾ ਹੈ।
'ਸ਼ਹਿਰ ਕੀ ਲੜਕੀ' ਨਾਂ ਦੇ ਇਸ ਗੀਤ ਨੂੰ ਬਾਦਸ਼ਾਹ, ਤੁਲਸੀ ਕੁਮਾਰ, ਅਭਿਜੀਤ ਤੇ ਚੰਦਰਾ ਦਿਕਸ਼ਿਤ ਨੇ ਗਾਇਆ ਹੈ। ਇਸ ਗੀਤ 'ਚ ਬਾਦਸ਼ਾਹ ਤੇ ਡਾਇਨਾ ਪੇਂਟੀ ਦੇ ਨਾਲ-ਨਾਲ ਸੁਨੀਲ ਸ਼ੈੱਟੀ ਤੇ ਰਵੀਨਾ ਟੰਡਨ ਨੇ ਵੀ ਡਾਂਸ ਕੀਤਾ ਹੈ। ਅਰਵਿੰਦਰ ਖਹਿਰਾ ਨੇ ਇਸ ਦੀ ਜਾਣਕਾਰੀ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟਸ 'ਤੇ ਸਾਂਝੀ ਕੀਤੀ ਹੈ।
ਅਰਵਿੰਦਰ ਖਹਿਰਾ ਦੇ ਪੰਜਾਬੀ ਗਾਣਿਆਂ ਦੀ ਗੱਲ ਕੀਤੀ ਜਾਵੇ ਤਾਂ ਉਹ 'ਸੋਚ', 'ਜ਼ਿੰਦਾਬਾਦ ਯਾਰੀਆਂ', 'ਪਾਣੀ', 'ਪਟਿਆਲਾ ਪੈੱਗ', 'ਮਨ ਭਰਿਆ', 'ਬੈਕਬੋਨ', 'ਜੱਟ ਫਾਇਰ ਕਰਦਾ', 'ਜੋਕਰ', 'ਇਕ ਸਾਲ', 'ਦੇਸੀ ਦਾ ਡਰੰਮ' ਤੇ 'ਨਾ ਜੀ ਨਾ' ਵਰਗੇ ਹਿੱਟ ਗਾਣਿਆਂ ਦੀਆਂ ਵੀਡੀਓਜ਼ ਬਣਾ ਚੁੱਕੇ ਹਨ।