ਨਵੀਂ ਦਿੱਲੀ(ਬਿਊਰੋ)— 2014 'ਚ ਰਿਲੀਜ਼ ਹੋਈ ਸੰਨੀ ਲਿਓਨ ਦੀ ਫਿਲਮ 'ਰਾਗਿਨੀ ਐੱਮ. ਐੱਮ. ਐੱਸ. 2' 'ਚ ਸੰਨੀ 'ਤੇ ਇਕ ਗੀਤ 'ਬੇਬੀ ਡੌਲ' ਫਿਲਮਾਇਆ ਗਿਆ ਸੀ। ਇਸ ਗੀਤ ਨੂੰ ਦਰਸ਼ਕਾਂ ਵਲੋਂ ਕਾਫੀ ਪਸੰਦ ਕੀਤਾ ਗਿਆ ਸੀ ਅਤੇ ਇਸ ਗੀਤ ਨੂੰ ਗਾਇਕਾ ਕਨਿਕਾ ਕਪੂਰ ਨੇ ਗਾਇਆ ਸੀ। ਇਸ ਗੀਤ ਨੇ ਕਨਿਕਾ ਨੂੰ ਮਸ਼ਹੂਰ ਕਰ ਦਿੱਤਾ।
ਹੁਣ ਇਕ ਖਬਰ ਸਾਹਮਣੇ ਆਈ ਹੈ, ਜਿਸ ਰਾਹੀਂ ਪਤਾ ਲੱਗਾ ਹੈ ਕਿ 'ਬੇਬੀ ਡੌਲ' ਫੇਮ ਗਾਇਕਾ ਕਨਿਕਾ ਕਪੂਰ ਵਿਰੁੱਧ ਧੋਖਾਧੜੀ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ। ਅਸਲ 'ਚ ਬੁੱਧਵਾਰ ਨੂੰ ਆਗਰਾ ਦੇ ਅਲੀਗੜ੍ਹ 'ਚ ਕਨਿਕਾ ਅਤੇ ਉਨ੍ਹਾਂ ਦੇ ਨੋਇਡਾ ਸਥਿਤ ਮੈਨੇਜਰ ਵਿਰੁੱਧ ਧੋਖਾਧੜੀ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ। ਨੋਇਡਾ ਸਥਿਤ ਇਕ ਇਵੈਂਟ ਮੈਨੇਜਮੈਂਟ ਫਰਮ ਨੇ ਕਨਿਕਾ ਵਿਰੁੱਧ ਸ਼ਿਕਾਇਤ ਦਰਜ ਕਰਵਾਈ ਹੈ।
ਇਕ ਖਬਰ ਮੁਤਾਬਕ ਬਾਨਾ ਦੇਵੀ ਪੁਲਸ ਸਟੇਸ਼ਨ ਦੇ ਸਟੇਸ਼ਨ ਹਾਊਸ ਅਫਸਰ ਜਤਿੰਦਰ ਸਿੰਘ ਨੇ ਦੱਸਿਆ ਕਿ ਕਨਿਕਾ ਅਤੇ ਉਨ੍ਹਾਂ ਦੀ ਮੈਨੇਜਰ ਸ਼ਰੂਤੀ ਅਤੇ ਮੁੰਬਈ ਸਥਿਤ ਇਵੈਂਟ ਮੈਨੇਜਮੈਂਟ ਕੰਪਨੀ ਦੇ ਮੈਨੇਜਰ ਸੰਤੋਸ਼ ਮਿਜਗਰ ਵਿਰੁੱਧ ਧਾਰਾ 420 ਅਤੇ 406 ਅਤੇ 507 ਦੇ ਤਹਿਤ ਸ਼ਿਕਾਇਤ ਦਰਜ ਕੀਤੀ ਗਈ ਹੈ।
ਸ਼ਿਕਾਇਤ ਮੁਤਾਬਕ ਮਨੋਜ ਸ਼ਰਮਾ ਦੀ ਫਰਮ ਨੇ ਕਨਿਕਾ ਕਪੂਰ ਨੂੰ 22 ਜਨਵਰੀ ਨੂੰ ਅਲੀਗੜ੍ਹ 'ਚ ਇਕ ਐਗਜ਼ੀਬਿਸ਼ਨ 'ਚ ਪਰਫਾਰਮ ਕਰਨ ਲਈ 24.95 ਲੱਖ ਦੀ ਰਕਮ ਅਦਾ ਕੀਤੀ ਸੀ ਪਰ ਨਾ ਤਾਂ ਉਨ੍ਹਾਂ ਨੇ ਪਰਫਾਰਮ ਕੀਤਾ ਅਤੇ ਨਾ ਹੀ ਉਨ੍ਹਾਂ ਨੇ ਪੈਸੇ ਵਾਪਸ ਕੀਤੇ।
ਮਨੋਜ ਸ਼ਰਮਾ ਨੇ ਕਿਹਾ ਕਿ ਉਹ ਕਨਿਕਾ ਵਿਰੁੱਧ ਮਾਣਹਾਨੀ ਦਾ ਮੁਕੱਦਮਾ ਕਰੇਗੀ, ਕਿਉਂਕਿ ਕਨਿਕਾ ਵਲੋਂ ਪਰਫਾਰਮੈਂਸ ਕੈਂਸਲ ਕੀਤੇ ਜਾਣ ਕਾਰਨ ਉਨ੍ਹਾਂ ਦੀ ਅਤੇ ਉਨ੍ਹਾਂ ਦੀ ਫਰਮ ਦੀ ਪ੍ਰਤਿਸ਼ਠਾ ਖਰਾਬ ਹੋ ਗਈ ਹੈ। ਜ਼ਿਕਰਯੋਗ ਹੈ ਕਿ ਕਨਿਕਾ ਨੇ 'ਬੇਬੀ ਡੌਲ', 'ਲਵਲੀ', 'ਚਿੱਟੀਆਂ ਕਲਾਈਆਂ' ਅਤੇ 'ਬੀਟ ਪੇ ਬੂਟੀ' ਵਰਗੇ ਹਿੱਟ ਗੀਤਾਂ ਨੂੰ ਆਵਾਜ਼ ਦਿੱਤੀ ਹੈ।
