ਮੁੰਬਈ (ਬਿਊਰੋ) — ਕਾਮੇਡੀਅਨ ਭਾਰਤੀ ਸਿੰਘ ਨੇ 3 ਦਸੰਬਰ 2017 ਨੂੰ ਆਪਣੇ ਪ੍ਰੇਮੀ ਹਰਸ਼ ਲਿੰਬਾਚਿਆ ਨਾਲ ਵਿਆਹ ਕਰਵਾਇਆ ਸੀ। ਇਨ੍ਹੀਂ ਦਿਨੀਂ ਦੋਵੇਂ ਕਲਰਸ ਦੇ ਸ਼ੋਅ 'ਖਤਰਾ ਖਤਰਾ ਖਤਰਾ' 'ਚ ਇਕੱਠੇ ਨਜ਼ਰ ਆ ਰਹੇ ਹਨ। ਦੂਜੇ ਪਾਸੇ ਭਾਰਤੀ ਸਿੰਘ ਦੇ ਪ੍ਰੈਗਨੇਂਟ ਹੋਣ ਦੀਆਂ ਖਬਰਾਂ ਵੀ ਜ਼ੋਰਾਂ 'ਤੇ ਹਨ।
ਦਰਅਸਲ ਬੀਤੇ ਸ਼ਨੀਵਾਰ ਨੂੰ ਭਾਰਤੀ ਸਿੰਘ ਦੀ ਸਿਹਤ ਠੀਕ ਨਹੀਂ ਸੀ। ਉਸ ਨੇ ਟੀ. ਵੀ. ਸ਼ੋਅ 'ਖਤਰਾ ਖਤਰਾ ਖਤਰਾ' ਦੇ ਸ਼ੂਟਿੰਗ ਸੈੱਟ 'ਤੇ ਉਲਟੀ ਕਰ ਦਿੱਤੀ ਸੀ, ਜਿਸ ਤੋਂ ਬਾਅਦ ਇਹ ਕਿਆਸ (ਅੰਦਾਜ਼ੇ) ਤੇਜ਼ ਹੋ ਗਏ ਕਿ ਭਾਰਤੀ ਸਿੰਘ ਗਰਭਵਤੀ ਹੈ ਪਰ ਭਾਰਤੀ ਨੇ ਇਕ ਇੰਟਰਵਿਊ ਦੌਰਾਨ ਪ੍ਰੈਗਨੇਂਸੀ ਦੀਆਂ ਖਬਰਾਂ ਨੂੰ ਸਿਰਫ ਅਫਵਾਹ ਦੱਸਿਆ ਹੈ।
ਭਾਰਤੀ ਸਿੰਘ ਨੇ ਕਿਹਾ, ''ਮੈਂ ਓਵਰਵੇਟ ਹਾਂ। ਇਸ ਲਈ ਲੋਕਾਂ ਨੂੰ ਅਕਸਰ ਇਹ ਲੱਗਦਾ ਹੈ ਕਿ ਮੈਂ ਗਰਭਵਤੀ ਹਾਂ। ਹਰਸ਼ ਤੇ ਮੈਂ ਬੱਚਾ ਚਾਹੁੰਦੇ ਹਾਂ ਪਰ ਅਸੀਂ ਬੱਚੇ ਨੂੰ ਲੈ ਕੇ ਨਵੰਬਰ ਤੋਂ ਪਲਾਨਿੰਗ ਸ਼ੁਰੂ ਕਰਾਂਗੇ। ਇਸ ਸਮੇਂ ਜ਼ਿੰਦਗੀ ਬਹੁਤ ਰੁੱਝੀ ਹੋਈ ਹੈ ਅਤੇ ਮੈਂ ਹਾਲੇ ਬੱਚੇ ਬਾਰੇ ਸੋਚ ਵੀ ਨਹੀਂ ਸਕਦੀ ਹਾਂ।''
ਜਦੋਂ ਭਾਰਤੀ ਸਿੰਘ ਤੋਂ ਸੈੱਟ 'ਤੇ ਸਿਹਤ ਵਿਗੜਣ ਦੀ ਵਜ੍ਹਾ ਪੁੱਛੀ ਗਈ ਤਾਂ ਉਸ ਨੇ ਕਿਹਾ, ''ਲੋਕਾਂ ਨੇ ਮੈਨੂੰ ਉਲਟੀ ਕਰਦੇ ਦੇਖਿਆ ਪਰ ਉਹ ਬਸ ਗੈਸ ਦੀ ਪ੍ਰੋਬਲਮ ਸੀ। ਇਸ ਤੋਂ ਜ਼ਿਆਦਾ ਕੁਝ ਵੀ ਨਹੀਂ।''
ਦੱਸ ਦਈਏ ਕਿ ਭਾਰਤੀ ਸਿੰਘ ਟੀ. ਵੀ. ਸ਼ੋਅ 'ਖਤਰਾ ਖਤਰਾ ਖਤਰਾ' ਨੂੰ ਆਪਣੇ ਪਤੀ ਹਰਸ਼ ਨਾਲ ਹੋਸਟ ਕਰ ਰਹੀ ਹੈ। ਇਸ ਤੋਂ ਪਹਿਲਾ ਦੋਵੇਂ ਪਤੀ-ਪਤਨੀ ਸਟੰਟ ਬੈਸਡ ਰਿਐਲਿਟੀ ਸ਼ੋਅ 'ਖਤਰੋਂ ਕੇ ਖਿਲਾੜੀ 9' 'ਚ ਦਿਸੇ ਸਨ। ਸ਼ੋਅ 'ਚ ਦੋਵਾਂ ਦੀ ਕੈਮਿਸਟਰੀ ਨੂੰ ਖੂਬ ਪਸੰਦ ਕੀਤਾ ਗਿਆ ਸੀ।
ਭਾਰਤੀ ਸਿੰਘ 'ਖਤਰਾ ਖਤਰਾ ਖਤਰਾ' ਤੋਂ ਇਲਾਵਾ ਕਪਿਲ ਸ਼ਰਮਾ ਦੇ ਕਾਮੇਡੀ ਸ਼ੋਅ 'ਚ ਨਜ਼ਰ ਆਉਂਦੀ ਹੈ। ਭਾਰਤੀ ਦੀ ਮੌਜੂਦਗੀ ਕਪਿਲ ਦੇ ਸ਼ੋਅ 'ਚ ਚਾਰ ਚੰਨ ਲਾਉਂਦੀ ਹੈ। ਭਾਰਤੀ ਸਿੰਘ ਦੇ ਸਿਤਾਰੇ ਬੁਲੰਦੀਆਂ 'ਤੇ ਹਨ। ਉਹ ਟੀ. ਵੀ. ਦੀ ਪਸੰਦੀਦਾ ਕਾਮੇਡੀਅਨ 'ਚੋਂ ਇਕ ਹਨ।
