ਮੁੰਬਈ(ਬਿਊਰੋ)- ਵਰੁਣ ਧਵਨ ਅਤੇ ਸਾਰਾ ਅਲੀ ਖਾਨ ਦੀ ਅਗਲੀ ਫਿਲਮ ‘ਕੁਲੀ ਨੰਬਰ 1’ ਦੇ ਸੈੱਟ ’ਤੇ ਅੱਗ ਲੱਗ ਗਈ ਸੀ। ਇਕ ਹਫਤੇ ਪਹਿਲਾਂ ਲੱਗੀ ਅੱਗ ’ਤੇ ਕਾਬੂ ਪਾਉਣ ਲਈ ਫਾਇਰ ਬ੍ਰਿਗੇਡ ਨੂੰ ਤਿੰਨ ਘੰਟੇ ਦਾ ਸਮਾਂ ਲੱਗਾ ਸੀ। ਹੁਣ ਪਤਾ ਲੱਗਾ ਹੈ ਕਿ ਅੱਗ ਦੀ ਲਪੇਟ ’ਚ ਸੈੱਟ ਦਾ ਇਕ ਹਿੱਸਾ ਅਤੇ ਲਾਈਟ ਦਾ ਸਾਮਾਨ ਆ ਗਿਆ ਸੀ। ਇਸ ਨਾਲ ਮੇਕਰਸ ਨੂੰ ਭਾਰੀ ਨੁਕਸਾਨ ਹੋਇਆ ਹੈ।
ਰਿਪੋਰਟ ਮੁਤਾਬਕ ਫਿਲਮ ਦੇ ਸੈੱਟ ’ਤੇ ਅੱਗ ਲੱਗਣ ਨਾਲ ਪ੍ਰੋਡਿਊਸਰ ਨੂੰ 2 ਤੋਂ 2.5 ਕਰੋੜ ਦਾ ਨੁਕਸਾਨ ਹੋਇਆ ਸੀ। ਉਥੇ ਹੀ ਅੱਗ ’ਚ ਸੜ ਕੇ ਖ਼ਰਾਬ ਹੋਣ ਵਾਲਾ ਜ਼ਿਆਦਾਤਰ ਸਾਮਾਨ ਕਿਸੇ ਹੋਰ ( ਥਰਡ ਪਾਰਟੀ ) ਦਾ ਸੀ। ਇਸ ਹਾਦਸੇ ’ਚ ਹੋਏ ਨੁਕਸਾਨ ਦਾ ਤਾਂ ਪਤਾ ਚੱਲ ਚੁੱਕਿਆ ਹੈ ਪਰ ਅੱਗ ਲੱਗਣ ਦਾ ਕਾਰਨ ਅਜੇ ਤੱਕ ਪਤਾ ਨਹੀਂ ਲੱਗਿਆ ਹੈ।
‘ਕੁਲੀ ਨੰਬਰ 1’ ਫਿਲਮ ਦੀ ਸ਼ੂਟਿੰਗ ਪਿਛਲੇ ਮਹੀਨੇ ਬੈਂਕਾਕ ’ਚ ਸ਼ੁਰੂ ਹੋਈ ਸੀ। ਡੇਵਿਡ ਧਵਨ, ਗੋਵਿੰਦਾ ਤੇ ਕਰਿਸ਼ਮਾ ਕਪੂਰ ਸਟਾਰਰ ‘ਕੁਲੀ ਨੰਬਰ 1’ ਦਾ ਰੀਮੇਕ ਬਣਾ ਰਹੇ ਹਨ। ਇਸ ਫਿਲਮ ’ਚ ਵਰੁਣ ਧਵਨ ਤੇ ਸਾਰਾ ਅਲੀ ਖਾਨ ਲੀਡ ਕਿਰਦਾਰ ’ਚ ਨਜ਼ਰ ਆਉਣਗੇ।