ਜਲੰਧਰ (ਵੈੱਬ ਡੈਸਕ) - ਦੇਸ਼ ਭਰ ਵਿਚ 'ਕੋਰੋਨਾ ਵਾਇਰਸ' ਦਾ ਕਹਿਰ ਦਿਨੋਂ-ਦਿਨ ਵਧਦਾ ਹੀ ਜਾ ਰਿਹਾ ਹੈ। ਪੰਜਾਬ ਵਿਚ ਵੀ ਇਸ ਬਿਮਾਰੀ ਨੇ ਆਪਣੇ ਪਸਾਰ ਲਾਏ ਹਨ ਅਤੇ ਕੋਰੋਨਾ ਮਰੀਜ਼ਾਂ ਦੀ ਗਿਣਤੀ ਵਧਦੀ ਜਾ ਰਹੀ ਹੈ। ਹਾਲਾਂਕਿ ਪੰਜਾਬ ਪੁਲਸ ਦੇ ਵੀ ਕਈ ਜਵਾਨ ਇਸ ਬਿਮਾਰੀ ਦੀ ਲਪੇਟ ਵਿਚ ਆ ਚੁੱਕੇ ਹਨ। ਪੰਜਾਬ ਪੁਲਸ ਦੇ 2 ਅਫਸਰਾਂ ਦੀ ਮੌਤ ਹੋ ਚੁੱਕੀ ਹੈ। ਹਾਲ ਹੀ ਵਿਚ ਮਿੰਟੂ ਗੁਰੂਸਰੀਆ ਨੇ ਆਪਣੇ ਇੰਸਟਾਗ੍ਰਾਮ 'ਤੇ ਪੰਜਾਬ ਪੁਲਸ ਦੇ ਜਵਾਨ ਦਾ ਇਕ ਵੀਡੀਓ ਸਾਂਝਾ ਕੀਤਾ ਹੈ, ਜਿਸ ਵਿਚ ਇਕ ਜਵਾਨ ਹਸਪਤਾਲ ਵਿਚ ਜ਼ੇਰੇ ਇਲਾਜ ਹੈ ਅਤੇ ਇਸ ਦੌਰਾਨ ਉਹ ਐਕਸਰਸਾਇਜ਼ ਕਰਦਾ ਹੋਇਆ ਨਜ਼ਰ ਆ ਰਿਹਾ ਹੈ।
ਇਸ ਵੀਡੀਓ ਨੂੰ ਸਾਂਝਾ ਕਰਦਿਆਂ ਮਿੰਟੂ ਗੁਰੂਸਰੀਆ ਨੇ ਲਿਖਿਆ, ''ਆਹ ਮੁੰਡਾ ਪੰਜਾਬ ਪੁਲਸ ਦਾ ਜਵਾਨ ਦੱਸਿਆ ਜਾ ਰਿਹਾ ਹੈ, ਜੋ ਕੋਰੋਨਾ ਪੀੜਤ ਹੈ। ਸ਼ਾਇਦ ਕੁਝ ਦਿਨ ਪਹਿਲਾਂ ਚੱਲ ਵਸੇ ਏ.ਸੀ.ਪੀ. ਦਾ ਗੰਨਮੈਨ ਹੈ। ਹਸਪਤਾਲ ਵਿਚ ਚੜ੍ਹਦੀ ਕਲਾ ਵਿਚ ਐਕਸਰਸਾਇਜ਼ ਕਰ ਰਿਹਾ ਹੈ। ਕੱਲ ਜਲੰਧਰ ਤੋਂ ਵੀ ਕੋਰੋਨਾ ਪੀੜਤਾਂ ਦੇ ਨੱਚਦਿਆਂ ਦੀ ਖ਼ਬਰ ਦੇਖੀ ਮੈਂ ਟੀ.ਵੀ. 'ਤੇ। ਮੈਂ ਨਿੱਜੀ ਜ਼ਿੰਦਗੀ ਦੇ ਤਜ਼ਰਬੇ ਦੇ ਅਧਾਰ 'ਤੇ ਕਹਿੰਦਾ ਹਾਂ ਕਿ ਜਦੋਂ ਤੁਸੀਂ ਅੰਦਰੋਂ ਮਾਰ ਗਏ ਤੁਹਾਨੂੰ ਸੰਜੀਵਨੀ ਵੀ ਨਹੀਂ ਜੇ ਲੱਗਣੀ, ਜੇ ਹਿੰਮਤ ਨਾ ਹਾਰੋ ਤਾਂ ਸੁਆਹ ਦੀ ਚੂੰਡੀ ਵੀ ਕੰਮ ਕਰ ਜਾਓ। ਆਓ ਕੋਰੋਨਾ ਪੀੜਤਾਂ ਨੂੰ ਹੋਂਸਲਾ ਦਈਏ ਕਿ ਪ੍ਰਬੰਧ ਜਿਹੋ ਜਿਹੇ ਮਰਜੀ ਹੋਣ ਹਾਰਨੀ ਨਹੀਂ ਹਿੰਮਤ, ਅਸੀਂ ਪੰਜਾਬੀ ਤੁਹਾਡਾ ਇੰਤਜ਼ਾਰ ਕਰਾਂਗੇ, ਸਾਡੀ ਉਡੀਕ ਤੇ ਤੁਹਾਡੀ ਹਿੰਮਤ ਜਿੱਤੇਗੀ- ਮਿੰਟੂ ਗੁਰੂਸਰੀਆ।''
ਇਸ ਤੋਂ ਇਲਾਵਾ ਪੰਜਾਬੀ ਸੰਗੀਤ ਜਗਤ ਦੇ ਨਾਮੀ ਗਾਇਕ ਨਿੰਜਾ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ 'ਤੇ ਇਕ ਵੀਡੀਓ ਪੋਸਟ ਕੀਤੀ ਹੈ, ਜਿਸ ਵਿਚ 'ਕੋਰੋਨਾ ਵਾਇਰਸ' ਨਾਲ ਪੀੜਤ ਲੋਕ ਪੰਜਾਬੀ ਗੀਤਾਂ 'ਤੇ ਭੰਗੜੇ ਪਾਉਂਦੇ ਨਜ਼ਰ ਆ ਰਹੇ ਹਨ। ਇਨ੍ਹਾਂ ਲੋਕਾਂ ਨੇ ਜ਼ਿੰਦਾਦਿਲੀ ਦੀ ਅਜਿਹੀ ਮਿਸਾਲ ਕਾਇਮ ਕੀਤੀ ਹੈ। ਇਨ੍ਹਾਂ ਨੂੰ ਦੇਖ ਕੇ ਤਾਂ ਇਨ੍ਹਾਂ 'ਤੇ ਇਹ ਗੱਲ ਬਿਲਕੁਲ ਠੀਕ ਢੁੱਕਦੀ ਹੈ ਕਿ 'ਜ਼ਿੰਦਗੀ ਜ਼ਿੰਦਾਦਿਲੀ ਕਾ ਨਾਮ ਹੈ ਮੁਰਦਾ ਦਿਲ ਕਯਾ ਖ਼ਾਕ ਜਿਏਗੇ।''