ਜਲੰਧਰ(ਬਿਊਰੋ)— ਆਪਣੇ ਗੀਤਾਂ ਨਾਲ ਲੋਕਾਂ ਨੂੰ ਥਿਰਕਾਉਣ 'ਤੇ ਮਜ਼ਬੂਰ ਕਰ ਦੇਣ ਵਾਲੇ ਪੰਜਾਬੀ ਗਾਇਕ ਅਤੇ ਕੰਪੋਜ਼ਰ ਦਲੇਰ ਮਹਿੰਦੀ ਦਾ ਜਨਮ 18 ਅਗਸਤ 1967 ਨੂੰ ਪਟਨਾ ਵਿਖੇ ਹੋਇਆ। ਭੰਗੜਾ ਦੁਨੀਆ ਭਰ 'ਚ ਮਸ਼ਹੂਰ ਕਰਨ ਦਾ ਸਿਹਰਾ ਦਲੇਰ ਮਹਿੰਦੀ ਦੇ ਸਿਰ ਬੱਝਦਾ ਹੈ।
ਦਲੇਰ ਮਹਿੰਦੀ ਨੂੰ ਸੰਗੀਤ ਵਿਰਾਸਤ 'ਚ ਮਿਲੀ, ਇਹੀ ਵਜ੍ਹਾ ਹੈ ਕਿ ਉਨ੍ਹਾਂ ਨੂੰ ਗਾਇਕੀ ਦਾ ਸ਼ੌਂਕ ਬਚਪਨ ਤੋਂ ਸੀ। ਬਚਪਨ 'ਚ ਦਲੇਰ ਮਹਿੰਦੀ ਦਾ ਨਾਂ ਦਲੇਰ ਸਿੰਘ ਸੀ।
ਦਰਅਸਲ ਉਨ੍ਹਾਂ ਦੇ ਮਾਤਾ-ਪਿਤਾ ਨੇ ਉਸ ਸਮੇਂ ਡਾਕੂ ਦਲੇਰ ਸਿੰਘ ਦੇ ਨਾਂ ਤੋਂ ਪ੍ਰਭਾਵਿਤ ਹੋ ਕੇ ਇਹ ਨਾਂ ਰੱਖਿਆ ਸੀ। ਜਦੋਂ ਦਲੇਰ ਵੱਡਾ ਹੋਇਆ ਤਾਂ ਮਸ਼ਹੂਰ ਗਾਇਕ ਪਰਵੇਜ ਮਹਿੰਦੀ ਦੇ ਨਾਂ 'ਤੇ ਉਨ੍ਹਾਂ ਦੇ ਨਾਂ ਅੱਗੇ ਸਿੰਘ ਦੀ ਜਗ੍ਹਾ ਮਹਿੰਦੀ ਜੋੜ ਦਿੱਤਾ ਗਿਆ।
ਦੱਸ ਦੇਈਏ ਕਿ ਦਲੇਰ ਮਹਿੰਦੀ ਜੋ ਵੀ ਕੁਝ ਕਰਦੇ ਹਨ ਤਾਂ ਉਹ ਹੱਟ ਕੇ ਹੁੰੰਦਾ ਹੈ। ਫਿਰ ਭਾਵੇਂ ਉਹ 'ਬਾਹੂਬਲੀ2' ਫਿਲਮ 'ਚ ਗਾਇਆ ਗੀਤ 'ਸਾਹੋਰ' ਹੀ ਕਿਉਂ ਨਾ ਹੋਵੇ। ਦਲੇਰ ਮਹਿੰਦੀ ਦਾ ਨਾਂ ਉਨ੍ਹਾਂ ਪੰਜਾਬੀ ਗਾਇਕਾਂ 'ਚ ਸ਼ਾਮਲ ਹੈ, ਜਿਨ੍ਹਾਂ ਦਾ ਚਾਰਮ ਲੋਕਾਂ ਦੇ ਦਿਲਾਂ 'ਚ ਅੱਜ ਵੀ ਕਾਇਮ ਹੈ।
ਇਸ ਤੋਂ ਇਲਾਵਾ ਉਹ ਮਸ਼ਹੂਰ ਗਾਇਕ ਗਾਇਕ ਮੀਕਾ ਦਾ ਵੱਡੇ ਭਰਾ ਹਨ। ਦਲੇਰ ਮਹਿੰਦੀ ਨੇ ਆਪਣੀ ਜ਼ਿੰਦਗੀ 'ਚ ਕਈ ਉਤਾਰ-ਚੜਾਅ ਦੇਖੇ ਹਨ। 11 ਸਾਲ ਦੀ ਉਮਰ 'ਚ ਦਲੇਰ ਨੇ ਆਪਣਾ ਘਰ ਛੱਡ ਦਿੱਤਾ ਸੀ, ਜਿਸ ਦੀ ਮੁੱਖ ਵਜ੍ਹਾ ਗੋਰਖਪੁਰ ਦੇ ਰਹਿਣ ਵਾਲੇ ਉਸਤਾਦ ਅਲੀ ਖਾਨ ਸਾਹਿਬ ਤੋਂ ਸਿਖਿਆ ਲੈਣਾ ਸੀ।
ਉਨ੍ਹਾਂ ਦੇ ਕਈ ਗੀਤ ਮਸ਼ਹੂਰ ਹੋਏ ਸਨ ਪਰ ਪਹਿਲੀ ਐਲਬਮ 'ਬੋਲੇ ਤਾ ਰਾ ਰਾ ਰਾ' ਨੇ ਉਨ੍ਹਾਂ ਨੂੰ ਰਾਤੋਂ-ਰਾਤ ਸਟਾਰ ਬਣਾ ਦਿੱਤਾ ਸੀ।
ਇਸ ਐਲਬਮ ਦੇ ਬੋਲ ਨੂੰ ਦਲੇਰ ਨੇ ਇੰਨੇ ਦਿਲਕਸ਼ ਅੰਦਾਜ਼ 'ਚ ਗਾਇਆ ਕਿ ਉਨ੍ਹਾਂ ਨੂੰ ਨਾ ਕੇਵਲ ਮਿਊਜ਼ਿਕ ਇੰਡਸਟਰੀ 'ਚ ਪਛਾਣ ਮਿਲੀ ਸਗੋਂ ਉਹ ਮਿਊਜ਼ਿਕ ਸਟਾਰ ਵੀ ਬਣ ਗਏ ਸਨ ਅਤੇ ਉਨ੍ਹਾਂ ਦੀ ਇਸ ਐਲਬਮ ਦੀ 2 ਕਰੋੜ ਕਾਪੀਆਂ ਵਿਕੀਆਂ ਸਨ।