ਮੁੰਬਈ (ਮੁੰਬਈ)— ਬਾਲੀਵੁੱਡ ਦੇ ਸਦਾਬਹਾਰ ਅਭਿਨੇਤਾ ਦੇਵ ਆਨੰਦ ਦਾ ਅੱਜ 95ਵਾਂ (26 ਸਤੰਬਰ, 1923) ਜਨਮਦਿਨ ਹੈ। ਉਹ ਆਪਣੇ ਦੌਰ ਦੇ ਫੈਸ਼ਨ ਆਈਕਨ ਰਹਿ ਚੁੱਕੇ ਸਨ। ਉਨ੍ਹਾਂ ਦੇ ਲੁੱਕ ਤੋਂ ਲੈ ਕੇ ਹੇਅਰਸਟਾਈਲ ਤੱਕ ਹਰ ਚੀਜ਼ ਦਾ ਜਲਵਾ ਸੀ। ਉਝੰ ਤਾਂ ਉਨ੍ਹਾਂ ਦੀ ਜ਼ਿੰਦਗੀ ਨਾਲ ਜੁੜੇ ਤੁਸੀਂ ਕਈ ਕਿੱਸੇ ਸੁਣੇ ਹੋਣਗੇ ਪਰ ਕਾਲੇ ਕੋਟ ਨੂੰ ਲੈ ਕੇ ਉਹ ਖੂਬ ਸੁਰਖੀਆਂ 'ਚ ਰਹੇ ਸਨ।
ਦੇਵ ਆਨੰਦ ਜਦੋਂ ਕਦੇ ਕਾਲਾ ਕੋਟ ਪਾਉਂਦੇ ਤਾਂ ਉਨ੍ਹਾਂ ਦਾ ਸਟਾਇਲ ਵੱਖਰਾ ਹੀ ਸੀ। ਉਨ੍ਹਾਂ ਨੂੰ ਦੇਖ ਸਫੈਦ ਸ਼ਰਟ 'ਤੇ ਕਾਲਾ ਕੋਟ ਪਾਉਣ ਦਾ ਸਟਾਇਲ ਬਹੁਤ ਟਰੈਂਡ ਹੋਇਆ ਸੀ। ਪਰ ਇਸ ਤੋਂ ਬਾਅਦ ਕੁਝ ਅਜਿਹਾ ਹੋਇਆ ਕਿ ਜਨਤਕ ਜਗ੍ਹਾ 'ਤੇ ਕਾਲਾ ਕੋਟ ਪਾਉਣ 'ਤੇ ਬੈਨ ਲਗਾ ਦਿੱਤਾ ਗਿਆ। ਕਹਿੰਦੇ ਹਨ ਕਿ ਜਦੋਂ ਦੇਵ ਆਨੰਦ ਕਾਲੇ ਕੱਪੜਿਆਂ 'ਚ ਦਿਸਦੇ ਸਨ ਤਾਂ ਲੜਕੀਆਂ ਇਸ ਤਰ੍ਹਾਂ ਪਾਗਲ ਹੋ ਜਾਂਦੀਆਂ ਕਿ ਉਨ੍ਹਾਂ ਲਈ ਕੁਝ ਵੀ ਕਰਨ ਲਈ ਤਿਆਰ ਰਹਿੰਦੀਆਂ ਸਨ। ਕਿੰਨੀਆਂ ਲੜਕੀਆਂ ਵਲੋਂ ਤਾਂ ਉਨ੍ਹਾਂ ਨੂੰ ਕਾਲਾ ਕੋਟ ਵਾਲੇ ਲੁੱਕ 'ਚ ਦੇਖ ਖੁਦਕੁਸ਼ੀ ਤੱਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ।
ਅਜਿਹਾ ਸ਼ਾਇਦ ਹੀ ਕੋਈ ਅਭਿਨੇਤਾ ਹੋਵੇ ਜਿਸ ਲਈ ਇਸ ਹਦ ਤੱਕ ਦੀਵਾਨਗੀ ਦੇਖੀ ਗਈ ਹੋਵੇ। ਲੜਕੀਆਂ 'ਚ ਇਸ ਕਦਰ ਦੀਵਾਨਗੀ ਨੂੰ ਦੇਖਦੇ ਹੋਏ ਅਦਾਲਤ ਨੂੰ ਇਸ ਮਾਮਲੇ 'ਚ ਦਖਲ ਅੰਦਾਜ਼ੀ ਕਰਨੀ ਪਈ। ਅਦਾਲਤ ਨੇ ਪੂਰੇ ਮਾਮਲੇ ਨੂੰ ਧਿਆਨ 'ਚ ਰੱਖਦੇ ਹੋਏ ਦੇਵ ਆਨੰਦ ਦੇ ਕਾਲੇ ਕੋਟ ਪਾਉਣ 'ਤੇ ਬੈਨ ਲਗਾ ਦਿੱਤਾ ਗਿਆ ਸੀ।
ਦੇਵ ਆਨੰਦ ਨੇ ਆਪਣੇ ਫਿਲਮੀ ਕਰੀਅਰ ਦੀ ਸ਼ੁਰੂਆਤ ਸਾਲ 1946 'ਚ ਫਿਲਮ 'ਹਮ ਏਕ ਹੈ' ਨਾਲ ਕੀਤੀ ਸੀ। ਇਸ ਫਿਲਮ ਰਾਹੀਂ ਉਹ ਹੀਰੋ ਬਣ ਪਰਦੇ 'ਤੇ ਆਏ। ਹਾਲਾਂਕਿ ਫਿਲਮ ਖਾਸ ਕਮਾਲ ਨਹੀਂ ਦਿਖਾ ਸਕੀ। ਇਸ ਤੋਂ ਬਾਅਦ ਸਾਲ 1948 'ਚ ਆਈ 'ਜਿਦੀ, ਜਿਸ ਨੇ ਦੇਵ ਆਨੰਦ ਨੂੰ ਸੁਪਰਹਿੱਟ ਬਣਾ ਦਿੱਤਾ ਸੀ।
