ਮੁੰਬਈ(ਬਿਊਰੋ)— ਬਾਲੀਵੁੱਡ ਦੇ ਹੀ ਮੈਨ ਯਾਨੀ ਧਰਮਿੰਦਰ ਅੱਜ ਆਪਣਾ 83ਵਾਂ ਜਨਮਦਿਨ ਮਨਾ ਰਹੇ ਹਨ। ਧਰਮਿੰਦਰ ਦਾ ਜਨਮ 8 ਦਸੰਬਰ 1935 ਨੂੰ ਲੁਧਿਆਣਾ ਪੰਜਾਬ 'ਚ ਹੋਇਆ ਸੀ। ਇਸ ਮੌਕੇ 'ਤੇ ਉਨ੍ਹਾਂ ਨੇ ਆਪਣੀ ਜ਼ਿੰਦਗੀ ਦਾ ਇਕ ਵੱਡਾ ਰਾਜ਼ ਖੋਲ੍ਹਿਆ ਅਤੇ ਆਪਣੇ ਫੈਨਜ਼ ਨੂੰ ਤੋਹਫਾ ਦਿੱਤਾ। ਹੀ ਮੈਨ ਧਰਮਿੰਦਰ ਭਾਰਤੀ ਫਿਲਮ ਇੰਡਸਟਰੀ ਦਾ ਇਕ ਅਜਿਹਾ ਨਾਮ ਹੈ, ਜਿਸ ਨੇ ਬਲੈਕ ਐਂਡ ਵਾਈਟ ਦੇ ਦੌਰ ਤੋਂ ਲੈ ਕੇ ਰੰਗੀਨ ਪਰਦੇ 'ਤੇ ਅਤੇ ਅਜੋਕੇ ਐਚ. ਡੀ. ਥਰੀ. ਡੀ. ਸਿਨੇਮਾ 'ਚ ਅਭਿਨੈ ਕੀਤਾ। ਧਰਮਿੰਦਰ ਖੁਦ ਫਿਲਮਾਂ ਦਾ ਦੀਵਾਨਾ ਸੀ ਅਤੇ ਇਹੀ ਦੀਵਾਨਗੀ ਉਨ੍ਹਾਂ ਨੂੰ ਬਾਲੀਵੁੱਡ 'ਚ ਲੈ ਆਈ। ਫਿਲਮਾਂ ਪ੍ਰਤੀ ਆਪਣੀ ਦੀਵਾਨਗੀ ਦਾ ਇਕ ਰਾਜ਼ ਖੋਲ੍ਹਦੇ ਹੋਏ ਧਰਮਿੰਦਰ ਨੇ ਦੱਸਿਆ ਕਿ ਮੈਂ ਇਕ ਹੀ ਫਿਲਮ ਨੂੰ ਸਕੂਲ ਤੋਂ ਬੰਕ ਮਾਰ ਕੇ ਕਰੀਬ 40 ਵਾਰ ਦੇਖਿਆ, ਜਿਸ ਦਾ ਨਾਂ 'ਦਿਲਲੱਗੀ' ਸੀ। ਜਿਸ ਨੂੰ ਏ.ਆਰ. ਕਰਦਾਰ ਨੇ ਬਣਾਇਆ ਸੀ ਅਤੇ ਨਿਰਦੇਸ਼ਿਤ ਵੀ ਕੀਤਾ ਸੀ। ਇਹ ਭਾਰਤੀ ਸਿਨੇਮਾ ਦੀ ਚੌਥੀ ਸਭ ਤੋਂ ਮੋਟੀ ਕਮਾਈ ਕਰਨ ਵਾਲੀ ਫਿਲਮ ਸੀ। ਦੂਜੇ ਪਾਸੇ, ਧਰਮਿੰਦਰ ਡਿਜੀਟਲ ਮੀਡੀਆ 'ਚ ਵਾਪਸੀ ਕਰ ਰਹੇ ਹਨ। ਉਨ੍ਹਾਂ ਨੇ ਆਪਣੇ ਸੋਸ਼ਲ ਅਕਾਊਂਟ 'ਤੇ ਕਈ ਵੀਡੀਓਜ਼ ਅਪਲੋਡ ਕੀਤੀਆਂ। ਇਨ੍ਹਾਂ ਵਿਚ ਉਹ ਆਪਣੇ ਫ਼ਾਰਮ ਹਾਊਸ 'ਚ ਕੁਝ ਘਰੇਲੂ ਕੰਮ ਕਰਦੇ ਨਜ਼ਰ ਆ ਰਹੇ ਹਨ। ਵੀਡੀਓ ਸ਼ੇਅਰ ਕਰਕੇ ਧਰਮਿੰਦਰ ਨੇ ਦੱਸਿਆ ਕਿ ਉਹ ਇਨ੍ਹੀਂ ਦਿਨੀਂ ਆਪਣੇ ਫ਼ਾਰਮ ਹਾਊਸ 'ਤੇ ਆਰਗੇਨਿਕ ਫਾਰਮਿੰਗ ਕਰ ਰਹੇ ਹਨ। ਧਰਮਿੰਦਰ ਦੇ ਜਨਮਦਿਨ 'ਤੇ ਸਨੀ ਦਿਓਲ ਵੀ ਉਨ੍ਹਾਂ ਨੂੰ ਕੁਝ ਖਾਸ ਤੋਹਫਾ ਦੇਣ ਦੀ ਪਲਾਨਿੰਗ ਕਰ ਰਹੇ ਹਨ। ਸਨੀ ਦਿਓਲ ਪਿਤਾ ਦੀ ਜੀਵਨੀ 'ਤੇ ਇਕ ਕਿਤਾਬ ਲਿਖ ਰਹੇ ਹਨ ਅਤੇ ਡੋਕਿਊਮੈਂਟਰੀ ਵੀ ਬਣਾ ਰਹੇ ਹਨ। ਇਸ ਵਿਚ ਉਨ੍ਹਾਂ ਦੇ ਬਚਪਨ ਤੋਂ ਲੈ ਕੇ ਹੀ ਮੈਨ ਬਨਣ ਤੱਕ ਦੇ ਸਫਰ ਬਾਰੇ ਦੱਸਿਆ ਜਾਵੇਗਾ।