ਮੁੰਬਈ(ਬਿਊਰੋ) : 'ਦੇਵਦਾਸ', 'ਆਗ, 'ਮੁਗਲ-ਏ-ਆਜ਼ਮ', 'ਦਿਲ ਦੀਆ ਦਰਦ ਲਿਆ' ਵਰਗੀਆਂ ਕਲਾਸਿਕ ਫਿਲਮਾਂ ਕਰਕੇ ਫੇਮਸ ਟ੍ਰੈਜਡੀ ਕਿੰਗ ਦਿਲੀਪ ਕੁਮਾਰ ਅੱਜ 96 ਸਾਲਾ ਦੇ ਹੋ ਗਏ ਹਨ। ਇਸ ਉਮਰ 'ਚ ਕਈ ਬਿਮਾਰੀਆਂ ਨਾਲ ਲੜ ਰਹੇ ਦਿਲੀਪ ਕੁਮਾਰ ਆਪਣੇ ਪਰਿਵਾਰ ਤੇ ਕਰੀਬੀ ਦੋਸਤਾਂ ਨਾਲ ਆਪਣਾ ਜਨਮਦਿਨ ਸੈਲੀਬ੍ਰੇਟ ਕਰਨਗੇ।
ਉਨ੍ਹਾਂ ਦੀ ਪਤਨੀ ਸਾਇਰਾ ਬਾਨੋ ਇਸ ਖਾਸ ਮੌਕੇ 'ਤੇ ਦਿਲੀਪ ਦੇ ਦੋਸਤਾਂ ਤੇ ਮਹਿਮਾਨਾਂ ਦਾ ਸਵਾਗਤ ਕਰੇਗੀ। ਟ੍ਰੈਜਡੀ ਕਿੰਗ ਦਾ ਜਨਮਦਿਨ ਕਾਫੀ ਸਾਦਗੀ ਨਾਲ ਹੀ ਮਨਾਇਆ ਜਾਵੇਗਾ। ਦਿਲੀਪ ਕੁਮਾਰ ਦਾ ਜਨਮ 11 ਦਸੰਬਰ, 1922 'ਚ ਪਾਕਿਸਤਾਨ ਦੇ ਪੇਸ਼ਾਵਰ 'ਚ ਪਸ਼ਤੂਨ ਪਰਿਵਾਰ 'ਚ ਹੋਇਆ।
ਦਿਲੀਪ ਦੇ ਪਿਤਾ ਜੀ ਇਕ ਵਪਾਰੀ ਸੀ। ਦਿਲੀਪ ਕੁਮਾਰ ਨੇ ਵੀ ਕੁਝ ਸਮਾਂ ਡਰਾਈ ਫਰੂਟਸ ਕਾਰੋਬਾਰੀ ਦੇ ਤੌਰ 'ਤੇ ਕੰਮ ਕੀਤਾ ਤੇ ਕੁਝ ਸਮਾਂ ਪੁਣੇ ਦੀ ਕੰਟੀਨ 'ਚ ਵੀ ਕੰਮ ਕੀਤਾ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਪਹਿਲੀ ਵਾਰ 1944 'ਚ ਫਿਲਮ 'ਜਵਾਹਰਭਾਟਾ' 'ਚ ਕੰਮ ਕੀਤਾ।
ਦੱਸ ਦੇਈਏ ਕਿ ਦਿਲੀਪ ਕੁਮਾਰ ਹਿੰਦੀ, ਉਰਦੂ, ਇੰਗਲਿਸ਼ ਤੇ ਪਸ਼ਤੂ ਭਾਸ਼ਾ ਬੋਲ ਲੈਂਦੇ ਹਨ। ਦਿਲੀਪ ਕੁਮਾਰ ਪਹਿਲੇ ਐਕਟਰ ਹਨ, ਜਿਨ੍ਹਾਂ ਨੇ ਫਿਲਮਫੇਅਰ ਐਵਾਰਡ ਜਿੱਤਿਆ ਸੀ। ਇਹ ਐਵਾਰਡ ਉਨ੍ਹਾਂ ਨੂੰ ਬੈਸਟ ਐਕਟਰ ਲਈ ਸਾਲ 1954 'ਚ ਦਿੱਤਾ ਗਿਆ ਸੀ।
ਦਿਲੀਪ ਕੁਮਾਰ ਨੂੰ ਹੁਣ ਤਕ 8 ਵਾਰ ਫਿਲਮਫੇਅਰ ਮਿਲ ਚੁੱਕਿਆ ਹੈ। ਦਿਲੀਪ ਦਾ ਅਸਲ ਨਾਂ ਯੁਸੂਫ ਖਾਨ ਹੈ। ਸਿਲਵਰ ਸਕ੍ਰੀਨ 'ਤੇ ਆਪਣਾ ਨਾਂ ਦਿਲੀਪ ਚੁਣਨ ਤੋਂ ਪਹਿਲਾਂ ਉਨ੍ਹਾਂ ਨੇ ਉਦੈ ਤੇ ਵਾਮਨ ਨਾਂ ਵੀ ਆਪਣੇ ਲਈ ਸੋਚੇ ਸੀ।
ਦੱਸਣਯੋਗ ਹੈ ਕਿ ਦਿਲੀਪ ਕੁਮਾਰ ਪਹਿਲੇ ਸੁਪਰਸਟਾਰ ਹਨ, ਜੋ ਪਾਕਿਸਤਾਨ ਨਾਲ ਤਾਲੁਕ ਰਖਦੇ ਹਨ। ਦਿਲੀਪ ਕੁਮਾਰ ਆਪਣੇ ਸਟਾਰਡਮ ਦੇ ਦਿਨਾਂ 'ਚ 5-11 ਲੱਖ ਰੁਪਏ ਫੀਸ ਲਿਆ ਕਰਦੇ ਸਨ। ਦਿਲੀਪ ਕੁਮਾਰ ਨੂੰ ਪਾਕਿਸਤਾਨ ਦੇ ਉੱਚ ਨਾਗਰਿਕਤਾ ਪੁਰਸਕਾਰ, ਨਿਸ਼ਾਨ-ਏ-ਇਮਤੀਆਜ਼ ਨਾਲ ਨਵਾਜ਼ਿਆ ਗਿਆ ਹੈ।
ਕਿਹਾ ਜਾਂਦਾ ਹੈ ਕਿ ਦਿਲੀਪ ਕੁਮਾਰ ਦਾ ਪਹਿਲਾ ਪਿਆਰ ਕਾਮਿਨੀ ਕੌਸ਼ਲ ਸੀ ਕਿਉਂਕਿ ਉਹ ਸ਼ਾਦੀਸ਼ੁਦਾ ਸੀ, ਇਸ ਲਈ ਦਿਲੀਪ ਨੇ ਸਾਲਾਂ ਤਕ ਇਹ ਗੱਲ ਆਪਣੇ ਦਿਲ 'ਚ ਰੱਖੀ।
