ਮੁੰਬਈ (ਬਿਊਰੋ)— ਬਾਲੀਵੁੱਡ ਅਦਾਕਾਰਾ ਕਾਜੋਲ ਅਤੇ ਸ਼ਾਹਰੁਖ ਖਾਨ ਦੀ ਫਿਲਮ 'ਦਿਲਵਾਲੇ ਦੁਲਹਨੀਆ ਲੇ ਜਾਏਂਗੇ' ਨੇ ਹਾਲ ਹੀ 'ਚ ਆਪਣੇ 23 ਪੂਰੇ ਕੀਤੇ ਹਨ। 'ਦਿਲਵਾਲੇ ਦੁਲਹਨੀਆ ਲੇ ਜਾਏਂਗੇ' ਨੇ ਦਰਸ਼ਕਾਂ ਸਾਹਮਣੇ ਇਕ ਵੱਖਰੇ ਤਰ੍ਹਾਂ ਦਾ ਰੋਮਾਂਸ ਪੇਸ਼ ਕੀਤਾ ਸੀ।
ਇਸ ਫਿਲਮ ਨੂੰ ਲੈ ਕੇ ਲੋਕਾਂ ਦੀ ਦੀਵਾਨਗੀ ਦਾ ਪਤਾ ਇਸ ਤੋਂ ਵੀ ਚੱਲਦਾ ਹੈ ਕਿ 23 ਸਾਲ ਪੂਰੇ ਹੋਣ ਦੇ ਬਾਵਜੂਦ ਫਿਲਮ ਦੀਆਂ ਕੁਝ ਗੱਲਾਂ ਅੱਜ ਵੀ ਸਿਨੇਮਾ ਪ੍ਰੇਮੀਆਂ ਨੂੰ ਯਾਦ ਹਨ।
ਰਾਜ ਅਤੇ ਸਿਮਰਨ ਦੀ ਲਵ ਸਟੋਰੀ 'ਚ ਕੁਝ ਅਜਿਹੀਆਂ ਚੀਜ਼ਾਂ ਸਨ, ਜਿਸ ਨਾਲ ਦਰਸ਼ਕਾਂ ਨੇ ਖੁਦ ਨੂੰ ਜੋੜ ਕੇ ਦੇਖਿਆ। ਇਸੇ ਫਿਲਮ ਨਾਲ ਕੁਆਰੀਆਂ ਲੜਕੀਆਂ 'ਚ ਕਰਵਾਚੌਥ ਦਾ ਵਰਤ ਰੱਖਣ ਦਾ ਟ੍ਰੈਂਡ ਚੱਲਿਆ ਸੀ। 'ਦਿਲਵਾਲੇ ਦੁਲਹਨੀਆ ਲੇ ਜਾਏਂਗੇ' ਨੂੰ ਮੁੰਬਈ ਦੇ ਮਰਾਠਾ ਮੰਦਰ 'ਚ ਲੱਗੇ ਹੋਏ 23 ਸਾਲ ਹੋ ਗਏ ਹਨ। ਉੱਥੇ 'ਤੇ ਇਸ ਫਿਲਮ ਨੇ ਆਪਣੇ ਪ੍ਰਦਰਸ਼ਨ ਦੇ 1200 ਹਫਤੇ ਪੂਰੇ ਕਰ ਲਏ ਹਨ।
'ਦਿਲਵਾਲੇ ਦੁਲਹਨੀਆ ਲੇ ਜਾਏਂਗੇ' ਬਾਲੀਵੁੱਡ ਦੀ ਅਜਿਹੀ ਫਿਲਮ ਰਹੀ ਹੈ, ਜਿਸ ਨੂੰ ਰਿਲੀਜ਼ ਦੇ 23 ਸਾਲ ਤੱਕ ਲਗਾਤਾਰ ਕਿਸੇ ਸਿਨੇਮਾ ਹਾਲ 'ਚ ਦੇਖਿਆ ਗਿਆ ਹੈ। 'ਦਿਲਵਾਲੇ ਦੁਲਹਨੀਆ ਲੇ ਜਾਏਂਗੇ' ਦੇ ਡਾਇਲਾਗਸ ਦਾ ਜਾਦੂ ਤਾਂ ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਬਰਾਕ ਓਬਾਮਾ 'ਤੇ ਵੀ ਚੱਲ ਗਿਆ ਸੀ। 2010 'ਚ ਜਦੋਂ ਓਬਾਮਾ ਭਾਰਤ ਦੌਰੇ 'ਤੇ ਸਨ ਤਾਂ ਉਨ੍ਹਾਂ ਨੇ ਇਸ ਫਿਲਮ ਦਾ ਡਾਇਲਾਗ ਬੋਲ ਕੇ ਸਾਰਿਆਂ ਦੇ ਦਿਲ ਜਿੱਤ ਲਏ ਸਨ।
ਆਪਣੇ ਇਕ ਭਾਸ਼ਣ ਦੌਰਾਨ ਉਨ੍ਹਾਂ ਨੇ ਕਿਹਾ, ''ਸੈਨਿਓਰੀਟਾ, ਬੜੇ-ਬੜੇ ਦੇਸ਼ੋਂ... ਤੁਸੀਂ ਮੇਰੇ ਕਹਿਣ ਦਾ ਮਤਲਬ ਸਮਝ ਗਏ ਹੋਵੋਗੇ।'' ਇਸ ਫਿਲਮ ਦੇ ਇਕ ਹੀ ਨਹੀਂ ਕਈ ਅਜਿਹੇ ਡਾਇਲਾਗ ਸਨ, ਜੋ ਕਾਫੀ ਲੋਕਪ੍ਰਿਯ ਹੋਏ ਸਨ। ਰੋਮਾਂਸ ਕਿੰਗ ਸ਼ਾਹਰੁਖ ਖਾਨ ਅਤੇ ਕਾਜੋਲ ਦੀ ਇਸ ਫਿਲਮ ਦਾ ਗੀਤ ''ਤੁਝੇ ਦੇਖਾ ਤੋ ਯੇ ਜਾਨਾ ਸਨਮ...'' ਸਭ ਤੋਂ ਜ਼ਿਆਦਾ ਹਿੱਟ ਗੀਤ ਰਿਹਾ ਸੀ।