ਮੁੰਬਈ(ਬਿਊਰੋ)— ਕੁਝ ਦਿਨ ਪਹਿਲਾਂ ਜੰਮੂ ਕਸ਼ਮੀਰ ਦੇ ਕਠੂਆ 'ਚ 8 ਸਾਲ ਦੀ ਬੱਚੀ ਨਾਲ ਹੋਈ ਰੇਪ ਦੀ ਘਟਨਾ ਨਾਲ ਪੂਰਾ ਦੇਸ਼ ਹਿੱਲ ਗਿਆ ਸੀ। ਆਮ ਆਦਮੀ ਤੋਂ ਬਾਲੀਵੁੱਡ ਸੈਲੀਬ੍ਰਿਟੀਜ਼ ਤੱਕ ਦੋਸ਼ੀ ਨੂੰ ਸਖਤ ਤੋਂ ਸਖਤ ਸਜ਼ਾ ਦੇਣ ਦੀ ਮੰਗ ਕੀਤੀ। ਹੁਣ ਇਹ ਮੁੱਦਾ ਹਾਲੀਵੁੱਡ 'ਚ ਵੀ ਪਹੁੰਚ ਗਿਆ ਹੈ। ਇਸ ਕੇਸ 'ਚ ਪੀੜਤਾ ਦੇ ਪਰਿਵਾਰ ਵੱਲੋਂ ਵਕੀਲ ਦੀਪਿਕਾ ਸਿੰਘ ਰਜਾਵਤ ਕੇਸ ਲੜ ਰਹੀ ਹੈ। ਦੀਪਿਕਾ ਉਸ ਸਮੇਂ ਪੀੜਤਾ ਦੇ ਪਰਿਵਾਰ ਨਾਲ ਖੜ੍ਹੀ ਰਹੀ, ਜਦੋਂ ਪ੍ਰਸ਼ਾਸਨ ਤੋਂ ਲੈ ਕੇ ਸਥਾਨਕ ਲੋਕ ਦੋਸ਼ੀਆਂ ਦਾ ਸਮਰਥਨ ਕਰ ਰਹੇ ਸਨ। ਇਸ ਨੂੰ ਲੈ ਕੇ ਹਾਲੀਵੁੱਡ ਸਟਾਰ ਅਮਾ ਵਾਟਸਨ ਨੇ ਦੀਪਿਕਾ ਦੀ ਤਾਰੀਫ ਕੀਤੀ ਹੈ। ਐਮਾ ਵਾਟਸਨ ਨੇ ਟਵਿਟਰ 'ਤੇ ਦੀਪਿਕਾ ਦੀ ਇਕ ਤਸਵੀਰ ਸ਼ੇਅਰ ਕਰਦੇ ਹੋਏ ਉਸ ਨੂੰ ਸ਼ਕਤੀਸ਼ਾਲੀ ਦੱਸਿਆ। ਸੋਸ਼ਲ ਮੀਡੀਆ 'ਤੇ ਉਸ ਦੀ ਇਹ ਪੋਸਟ ਕਾਫੀ ਵਾਇਰਲ ਹੋ ਰਹੀ ਹੈ। ਦੀਪਿਕਾ ਸਿੰਘ ਰਜਾਵਤ ਦੀ ਜੋ ਤਸਵੀਰ ਵਾਇਰਲ ਹੋਈ ਹੈ, ਉਸ ਨੂੰ ਦੇਖ ਕੇ ਸਾਫ ਜ਼ਾਹਿਰ ਹੁੰਦਾ ਹੈ ਕਿ ਉਹ ਬੁਲੰਦ ਇਰਾਦਿਆਂ ਵਾਲੀ ਮਹਿਲਾ ਹੈ। ਦੱਸਣਯੋਗ ਹੈ ਕਿ ਦੀਪਿਕਾ ਦੀ ਇਹ ਤਸਵੀਰ ਕੇਸ ਦੀ ਸੁਣਵਾਈ ਤੋਂ ਬਾਅਦ ਦੀ ਹੈ। ਜੰਮੂ ਬਾਰ ਐਸੋਸੀਏਸ਼ਨ ਨੇ ਦੀਪਿਕਾ 'ਤੇ ਕੇਸ ਛੱਡਣ ਦਾ ਕਾਫੀ ਦਬਾਅ ਪਾਇਆ ਸੀ। ਇਸ ਦੇ ਬਾਵਜੂਦ ਵੀ ਉਹ ਡਟੀ/ਖੜ੍ਹੀ ਰਹੀ। ਦੀਪਿਕਾ ਨੇ ਮੀਡੀਆ ਨਾਲ ਗੱਲਬਾਤ ਦੌਰਾਨ ਕਿਹਾ ਸੀ, ''ਮੇਰਾ ਬਲਾਤਕਾਰ ਤੇ ਕਤਲ ਵੀ ਹੋ ਸਕਦਾ ਹੈ। ਹੋ ਸਕਦਾ ਇਹ ਮੈਨੂੰ ਕੋਰਟ ਨਾ ਪਹੁੰਚਣ ਦੇਣ।''