ਜਲੰਧਰ(ਬਿਊਰੋ)— ਅੰਮ੍ਰਿਤਸਰ 'ਚ ਟਰੇਨ ਹਾਦਸੇ ਨਾਲ ਜਿਥੇ ਪੂਰੇ ਦੇਸ਼ 'ਚ ਸੋਗ ਦਾ ਮਾਹੌਲ ਹੈ। ਹਾਲ ਹੀ 'ਚ ਪੰਜਾਬੀ ਗਾਇਕ ਫਿਰੋਜ਼ ਖਾਨ ਇਸ ਘਟਨਾ 'ਚ ਜ਼ਖਮੀ ਲੋਕਾਂ ਦਾ ਹਾਲ ਜਾਣਨ ਲਈ ਅੰਮ੍ਰਿਤਸਰ ਦੇ ਗੁਰੂ ਨਾਨਕ ਹਸਪਤਾਲ ਪਹੁੰਚੇ। ਲੋਕਾਂ ਦਾ ਦਰਦ ਸੁਣ ਕੇ ਉਨ੍ਹਾਂ ਦੀਆਂ ਅੱਖਾਂ ਨਮ ਹੋ ਗਈਆਂ। ਦੱਸ ਦੇਈਏ ਕਿ ਫਿਰੋਜ਼ ਖਾਨ ਨੇ ਪੀੜਤਾਂ ਦੀ ਮਾਲੀ ਸਹਾਇਤਾ ਕੀਤੀ ਅਤੇ ਇਲਾਜ ਲਈ ਪੈਸੇ ਵੀ ਵੰਡੇ।
ਦੱਸਣਯੋਗ ਹੈ ਕਿ ਫਿਰੋਜ਼ ਖਾਨ ਪਹਿਲਾਂ ਦੁਬਈ ਚੈਰੀਟੇਬਲ ਟਰੱਸਟ ਨਾਲ ਜੁੜੇ ਹੋਏ ਹਨ, ਜਿਨ੍ਹਾਂ ਦੀ ਟੀਮ ਅੰਮ੍ਰਿਤਸਰ 'ਚ ਪੀੜਤਾਂ ਦੀ ਸਾਰ ਲੈਣ ਪਹੁੰਚੀ। ਟਰੱਸਟ ਦੀ ਟੀਮ ਨੇ ਨਾ ਸਿਰਫ ਪੀੜਤਾਂ ਦੀ ਮਾਲੀ ਸਹਾਇਤਾ ਕੀਤੀ ਸਗੋਂ ਖੂਨ ਦਾਨ ਕਰਕੇ ਪੀੜਤਾਂ ਦੇ ਸਹਿਯੋਗ ਲਈ ਆਪਣਾ ਅਣਮੁੱਲਾ ਯੋਗਦਾਨ ਵੀ ਪਾਇਆ।
ਇਸ ਦੌਰਾਨ ਫਿਰੋਜ਼ ਖਾਨ ਨੇ ਨਮ ਅੱਖਾਂ ਨਾਲ ਕਿਹਾ, ''ਅਜਿਹਾ ਹਾਦਸਾ, ਜਿਸ ਬਾਰੇ ਸੁਣ ਕੇ ਹੀ ਰੂਹ ਕੰਬ ਉੱਠਦੀ ਹੈ। ਇਸ ਭਿਆਨਕ ਹਾਦਸੇ 'ਚ ਜ਼ਖਮੀ ਹੋਏ ਲੋਕ ਜਦੋਂ ਖੁਦ ਆਪਣੀ ਜੁਬਾਨੀ ਉਸ ਦਰਦਨਾਕ ਮੰਜ਼ਰ ਨੂੰ ਬਿਆਨ ਕਰਦੇ ਹਨ ਤਾਂ ਸੁਣ ਕੇ ਅੱਖਾਂ ਦਾ ਭਰ ਜਾਣਾ ਲਾਜ਼ਮੀ ਹੈ।''
