ਮੁੰਬਈ (ਬਿਊਰੋ) — ਖੇਡ ਦੇ ਮੈਦਾਨ 'ਚ ਵੱਡੀਆਂ-ਵੱਡੀਆਂ ਮਹਿਲਾ ਪਹਿਲਵਾਨਾਂ ਨੂੰ ਚਿੱਤ ਕਰ ਦੇਣ ਵਾਲੀ ਮਸ਼ਹੂਰ ਰੈਸਲਰ ਗੀਤਾ ਫੋਗਾਟ ਤੇ ਉਸ ਦਾ ਪਤੀ ਪਵਨ ਸਿੰਘ ਬਹੁਤ ਜਲਦ ਛੋਟੇ ਪਰਦੇ 'ਤੇ ਨਜ਼ਰ ਆਉਣ ਵਾਲੇ ਹਨ। ਖਬਰਾਂ ਆ ਰਹੀਆਂ ਹਨ ਕਿ ਗੀਤਾ ਫੋਗਾਟ ਤੇ ਪਵਨ ਸਿੰਘ ਇਕ ਚੈਨਲ ਦੇ ਡਾਂਸ ਸ਼ੋਅ 'ਚ ਹਿੱਸਾ ਲੈਣ ਜਾ ਰਹੇ ਹਨ। ਕਾਮਨ ਵੈਲਥ ਖੇਡਾਂ 'ਚ ਕੁਸ਼ਤੀ 'ਚ ਗੋਲਡ ਮੈਡਲ ਹਾਸਲ ਕਰਨ ਵਾਲੀ ਗੀਤਾ ਫੋਗਾਟ ਦਾ ਨਾਂ ਇਸ ਸ਼ੋਅ ਲਈ ਪੱਕਾ ਹੋ ਗਿਆ ਹੈ ਅਤੇ ਬਹੁਤ ਜਲਦ ਇਸ ਸ਼ੋਅ ਦਾ ਪ੍ਰੋਮੋ ਸ਼ੂਟ ਹੋਣ ਵਾਲਾ ਹੈ।
ਦੱਸ ਦਈਏ ਕਿ ਗੀਤਾ ਫੋਗਾਟ ਤੇ ਉਸ ਦੀ ਭੈਣ ਦੀ ਜ਼ਿੰਦਗੀ ਨੂੰ ਆਮਿਰ ਖਾਨ ਆਪਣੀ ਫਿਲਮ 'ਦੰਗਲ' 'ਚ ਦਿਖਾ ਚੁੱਕੇ ਹਨ। ਇਸ ਫਿਲਮ 'ਚ ਆਮਿਰ ਖਾਨ ਨੇ ਦਿਖਾਇਆ ਹੈ ਕਿ ਕਿਸ ਤਰ੍ਹਾਂ ਦੇ ਹਲਾਤਾਂ 'ਚੋਂ ਨਿਕਲ ਕੇ ਗੀਤਾ ਫੋਗਾਟ ਨੇ ਕੁਸ਼ਤੀ ਦੇ ਖੇਤਰ 'ਚ ਵੱਡਾ ਨਾਂ ਕਮਾਇਆ ਸੀ। ਇਸ ਸ਼ੋਅ 'ਚ ਹੋਰ ਵੀ ਕਈ ਫਿਲਮੀ ਹਸਤੀਆਂ ਨਜ਼ਰ ਆਉਣਗੀਆਂ। ਖਬਰਾਂ ਦੀ ਮੰਨੀਏ ਤਾਂ ਬਾਲੀਵੁੱਡ ਅਦਾਕਾਰ ਸ਼ਾਹਿਦ ਕਪੂਰ ਆਪਣੀ ਪਤਨੀ ਮੀਰਾ ਰਾਜਪੂਤ ਨਾਲ ਇਸ ਸ਼ੋਅ 'ਚ ਨਜ਼ਰ ਆ ਸਕਦੇ ਹਨ। ਮੀਰਾ ਤੇ ਸ਼ਾਹਿਦ ਨੂੰ ਇਸ ਸ਼ੋਅ 'ਚ ਜੱਜ ਦੀ ਆਫਰ ਹੋਈ ਹੈ। ਇਸ ਸ਼ੋਅ ਨੂੰ ਸਲਮਾਨ ਖਾਨ ਪ੍ਰੋਡਿਊਸ ਕਰ ਰਹੇ ਹਨ।