ਜਲੰਧਰ (ਬਿਊਰੋ)— ਹਾਰਡੀ ਸੰਧੂ ਨੇ 'ਸੋਚ', 'ਨਾਂਹ', 'ਬੈਕਬੌਨ' ਤੇ 'ਹੋਰਨ ਬਲੋਅ' ਵਰਗੇ ਗੀਤਾਂ ਨਾਲ ਵੱਖਰੀ ਪਛਾਣ ਬਣਾਈ ਹੈ। ਕਾਫੀ ਸਮੇਂ ਤੋਂ ਕਿਆਸ ਲਗਾਈ ਜਾ ਰਹੀ ਸੀ ਕਿ ਹਾਰਡੀ ਬਾਲੀਵੁੱਡ ਗੀਤ ਗਾਉਣ ਵਾਲੇ ਹਨ ਪਰ ਅਧਿਕਾਰਕ ਤੌਰ 'ਤੇ ਕੋਈ ਪੁਸ਼ਟੀ ਨਹੀਂ ਹੋਈ। ਹਾਲ ਹੀ 'ਚ ਹਾਰਡੀ ਨੇ ਇਸ ਗੱਲ ਦੀ ਪੁਸ਼ਟੀ ਕਰ ਦਿੱਤੀ ਹੈ ਕਿ ਉਹ ਬਾਲੀਵੁੱਡ ਫਿਲਮ ਲਈ ਗੀਤ ਗਾ ਰਹੇ ਹਨ। ਜੀ ਹਾਂ, ਹਾਰਡੀ 'ਯਮਲਾ ਪਗਲਾ ਦੀਵਾਨਾ ਫਿਰ ਸੇ' ਲਈ ਗੀਤ ਗਾ ਰਹੇ ਹਨ। ਰਿਕਾਰਡਿੰਗ ਸਟੂਡੀਓ ਤੋਂ ਹਾਰਡੀ ਨੇ ਆਪਣੀ ਇਕ ਤਸਵੀਰ ਸੋਸ਼ਲ ਮੀਡੀਆ 'ਤੇ ਸ਼ੇਅਰ ਕੀਤੀ, ਜਿਸ ਨਾਲ ਉਨ੍ਹਾਂ ਲਿਖਿਆ, 'ਯਮਲਾ ਪਗਲਾ ਦੀਵਾਨਾ ਫਿਰ ਸੇ ਲਈ ਇਕ ਗੀਤ ਰਿਕਾਰਡ ਕੀਤਾ ਹੈ। ਜਲਦ ਰਿਲੀਜ਼ ਹੋਵੇਗਾ ਤੇ ਧੁੰਮਾਂ ਪਾਵੇਗਾ।'
ਦੱਸਣਯੋਗ ਹੈ ਕਿ ਹਾਰਡੀ ਤੋਂ ਪਹਿਲਾਂ ਦਿਲਜੀਤ ਦੁਸਾਂਝ, ਗੁਰੂ ਰੰਧਾਵਾ, ਮੀਕਾ ਸਿੰਘ, ਵਡਾਲੀ ਬ੍ਰਦਰਸ ਤੇ ਬਾਦਸ਼ਾਹ ਵਰਗੇ ਪੰਜਾਬੀ ਗਾਇਕ ਬਾਲੀਵੁੱਡ 'ਚ ਆਪਣਾ ਨਾਂ ਬਣਾ ਚੁੱਕੇ ਹਨ ਤੇ ਸਾਨੂੰ ਉਮੀਦ ਹੈ ਕਿ ਹਾਰਡੀ ਵੀ ਜ਼ਰੂਰ ਬਾਲੀਵੁੱਡ 'ਚ ਸਫਲ ਹੋਣਗੇ। ਹਾਰਡੀ ਦੇ ਜੇਕਰ ਗੀਤਾਂ ਦੀ ਗੱਲ ਕੀਤੀ ਜਾਵੇ ਤਾਂ ਉਹ ਬਾਲੀਵੁੱਡ ਟੱਚ ਵਾਲੇ ਹੁੰਦੇ ਹਨ। 'ਨਾਂਹ' ਗੀਤ 'ਚ ਹਾਰਡੀ ਨਾਲ ਬਾਲੀਵੁੱਡ ਅਭਿਨੇਤਰੀ ਨੋਰਾ ਫਤੇਹੀ ਡਾਂਸ ਕਰਦੀ ਨਜ਼ਰ ਆਈ ਸੀ ਤੇ ਇਸ ਗੀਤ ਨੂੰ ਹੁਣ ਤਕ ਯੂਟਿਊਬ 'ਤੇ 248 ਮਿਲੀਅਨ ਤੋਂ ਵੱਧ ਵਾਰ ਦੇਖਿਆ ਜਾ ਚੁੱਕਾ ਹੈ। ਇਸ ਤੋਂ ਸਾਫ ਹੈ ਕਿ ਹਾਰਡੀ ਨੂੰ ਚਾਹੁਣ ਵਾਲਿਆਂ ਦੀ ਗਿਣਤੀ ਕਰੋੜਾਂ 'ਚ ਹੈ ਤੇ ਉਸ ਦੇ ਬਾਲੀਵੁੱਡ ਗੀਤ ਨੂੰ ਵੀ ਫੈਨਜ਼ ਪਸੰਦ ਕਰਨਗੇ।