ਮੁੰਬਈ(ਬਿਊਰੋ)— ਗਜ਼ਲ ਸਮਰਾਟ ਜਗਜੀਤ ਸਿੰਘ ਭਾਵੇਂ ਅੱਜ ਸਾਡੇ ਵਿਚਕਾਰ ਨਹੀਂ ਹਨ ਪਰ ਉਨ੍ਹਾਂ ਦੀਆਂ ਗਜ਼ਲਾਂ ਨੇ ਅੱਜ ਵੀ ਉਨ੍ਹਾਂ ਨੂੰ ਸਾਡੇ ਦਿਲ 'ਚ ਜ਼ਿੰਦਾ ਰੱਖਿਆ ਹੋਇਆ ਹੈ। ਜੇਕਰ ਅੱਜ ਜਗਜੀਤ ਸਿੰਘ ਸਾਡੇ ਵਿਚਕਾਰ ਹੁੰਦੇ ਤਾਂ ਉਹ 78 ਸਾਲ ਦੇ ਹੁੰਦੇ। ਬਾਲੀਵੁੱਡ 'ਚ ਜਗਜੀਤ ਸਿੰਘ ਦਾ ਨਾਂ ਇਕ ਅਜਿਹੀ ਸ਼ਖਸੀਅਤ ਦੇ ਤੌਰ 'ਤੇ ਯਾਦ ਕੀਤਾ ਜਾਂਦਾ ਹੈ, ਜਿਨ੍ਹਾਂ ਨੇ ਆਪਣੀ ਗਜ਼ਲ ਗਾਇਕੀ ਨਾਲ ਲਗਭਗ ਚਾਰ ਦਹਾਕੇ ਤੱਕ ਗਜ਼ਲ ਦੇ ਦੀਵਾਨਿਆਂ ਦੇ ਦਿਲ 'ਤੇ ਅਮਿਟ ਛਾਪ ਛੱਡੀ। 8 ਫਰਵਰੀ 1941 ਨੂੰ ਰਾਜਸਥਾਨ ਦੇ ਸ਼੍ਰੀਗੰਗਾਨਗਰ 'ਚ ਜਨਮੇ ਜਗਜੀਤ ਸਿੰਘ ਦੇ ਬਚਪਨ ਦਾ ਨਾਂ ਜਗਮੋਹਨ ਸੀ ਪਰ ਪਿਤਾ ਦੇ ਕਹਿਣ 'ਤੇ ਉਨ੍ਹਾਂ ਨੇ ਆਪਣਾ ਨਾਂ ਬਦਲ ਲਿਆ। ਮਿਊਜ਼ਿਕ 'ਚ ਬਚਪਨ ਤੋਂ ਹੀ ਉਨ੍ਹਾਂ ਦੀ ਕਾਫੀ ਰੂਚੀ ਸੀ। ਸੰਗੀਤ ਦੀ ਸਿੱਖਿਆ ਉਨ੍ਹਾਂ ਨੇ ਉਸਤਾਦ ਜਮਾਲ ਖਾਨ ਤੇ ਪੰਡਿਤ ਛਗਨਲਾਲ ਸ਼ਰਮਾ ਤੋਂ ਹਾਸਿਲ ਕੀਤੀ ਪਰ ਇਕ ਹਾਦਸੇ ਕਾਰਨ ਉਹ 6 ਮਹੀਨਿਆਂ ਤੱਕ ਖਾਮੋਸ਼ ਹੋ ਗਏ ਸਨ। ਜਗਜੀਤ ਸਿੰਘ ਨੇ ਚਿਤਰਾ ਨਾਲ ਵਿਆਹ ਕੀਤਾ ਸੀ। ਹਾਲਾਂਕਿ ਚਿਤਰਾ ਪਹਿਲਾਂ ਤੋਂ ਵਿਆਹੁਤਾ ਸੀ ਪਰ ਜਗਜੀਤ ਸਿੰਘ ਨੇ ਚਿਤਰਾ ਦੇ ਪਤੀ ਤੋਂ ਉਨ੍ਹਾਂ ਦਾ ਹੱਥ ਮੰਗ ਲਿਆ ਸੀ। ਚਿਤਰਾ ਤੇ ਜਗਜੀਤ ਨੇ ਵਿਆਹ ਕਰ ਲਿਆ। ਦੋਹਾਂ ਨੇ ਇੱਕਠੇ ਕਈ ਗਜ਼ਲਾਂ ਗਾਈਆਂ। ਇਸ ਜੋੜੀ ਦਾ ਇਕ ਬੇਟਾ ਹੋਇਆ, ਜਿਸ ਦਾ ਨਾਂ ਸੀ ਵਿਵੇਕ ਪਰ ਇਕ ਕਾਰ ਹਾਦਸੇ 'ਚ ਉਸ ਦੀ ਮੌਤ ਹੋ ਗਈ। ਇਹ ਘਟਨਾ ਸਾਲ 1990 'ਚ ਘਟੀ ਸੀ। ਉਸ ਸਮੇਂ ਉਨ੍ਹਾਂ ਦੇ ਬੇਟੇ ਦੀ ਉਮਰ 18 ਸਾਲ ਸੀ। ਬੇਟੇ ਦੇ ਇੰਝ ਅਚਾਨਕ ਚਲੇ ਜਾਣ ਨਾਲ ਚਿਤਰਾ ਪੂਰੀ ਤਰ੍ਹਾਂ ਟੁੱਟ ਗਈ ਸੀ ਤੇ ਉਨ੍ਹਾਂ ਨੇ ਗਾਇਕੀ ਤੋਂ ਦੂਰੀ ਬਣਾ ਲਈ। ਉੱਥੇ ਜਗਜੀਤ ਸਿੰਘ ਵੀ ਪੂਰੀ ਤਰ੍ਹਾਂ ਟੁੱਟ ਗਏ ਸਨ। ਉਨ੍ਹਾਂ ਨੂੰ ਕਰੀਬ ਤੋਂ ਜਾਣਨ ਵਾਲਿਆਂ ਦਾ ਮੰਨਣਾ ਸੀ ਕਿ ਉਨ੍ਹਾਂ ਦੀ ਗਜ਼ਲ 'ਚ ਜੋ ਤੜਪ ਤੇ ਦੁੱਖ ਝਲਕਦਾ ਹੈ, ਉਹ ਇਸੇ ਹਾਦਸੇ ਨੂੰ ਬਿਆਨ ਕਰਦਾ ਹੈ। ਜਗਜੀਤ ਸਿੰਘ ਨੇ ਆਪਣੀ ਗਾਇਕੀ ਦੇ ਕਰੀਅਰ 'ਚ ਕਰੀਬ 150 ਤੋਂ ਵੱਧ ਐਲਬਮਜ਼ ਬਣਾਈਆਂ ਹਨ ਪਰ 10 ਅਕਤੂਬਰ 2011 'ਚ ਲੋਕਾਂ ਦੇ ਦਿਲਾਂ 'ਤੇ ਰਾਜ਼ ਕਰਨ ਵਾਲੀ ਇਹ ਆਵਾਜ਼ ਸ਼ਾਂਤ ਹੋ ਗਈ। ਸਾਲ 2003 'ਚ ਜਗਜੀਤ ਸਿੰਘ ਨੂੰ ਭਾਰਤ ਸਰਕਾਰ ਵਲੋਂ ਪਦਮ ਭੂਸ਼ਨ ਨਾਲ ਸਨਮਾਨਿਤ ਕੀਤਾ ਗਿਆ। ਆਪਣੀ ਗਾਇਕੀ ਨਾਲ ਲੋਕਾਂ ਵਿਚਕਾਰ ਅਮਿਟ ਛਾਪ ਛੱਡਣ ਵਾਲੇ ਜਗਜੀਤ ਸਿੰਘ ਨੇ 10 ਅਕਤੂਬਰ 2011 ਨੂੰ ਇਸ ਦੁਨੀਆ ਨੂੰ ਅਲਵਿਦਾ ਕਹਿ ਦਿੱਤਾ। 'ਹੋਠੋਂ ਸੇ ਛੂ ਲੋ ਤੁੰ', 'ਚਿੱਠੀ ਨਾ ਕੋਈ ਸੰਦੇਸ਼', 'ਝੁਕੀ-ਝੁਕੀ ਸੀ ਨਜ਼ਰ', 'ਤੁਮਕੋ ਦੇਖਾ ਤੋ ਯੇ ਖਿਆਲ ਆਇਆ', 'ਹੋਸ਼ ਵਾਲੋਂ ਕੋ ਖਬਰ ਕਿਆ' ਵਰਗੇ ਉਨ੍ਹਾਂ ਦੇ ਗੀਤ ਅੱਜ ਵੀ ਲੋਕਾਂ ਦੇ ਦਿਲਾਂ 'ਚ ਵੱਸਦੇ ਹਨ।