ਮੁੰਬਈ (ਬਿਊਰੋ)— ਜਾਨਹਵੀ ਕਪੂਰ ਨੂੰ ਬਾਲੀਵੁੱਡ ਇੰਡਸਟਰੀ 'ਚ ਲਾਂਚ ਹੋਣ ਲਈ ਕੁਝ ਹੀ ਦਿਨ ਬਾਕੀ ਹਨ। ਅੱਜਕਲ ਮੀਡੀਆ 'ਚ ਉਨ੍ਹਾਂ ਦੇ ਇੰਟਰਵਿਊਜ਼ ਛਾਏ ਹੋਏ ਹਨ। ਨਾ-ਸਿਰਫ ਇਹੀ ਬਲਕਿ ਜਾਹਨਵੀ ਦੇ ਬਿਆਨ ਵੀ ਹੁਣ ਸੁਰਖੀਆਂ ਬਟੋਰ ਰਹੇ ਹਨ। 'ਧੜਕ' ਫਿਲਮ ਦੀ ਪ੍ਰਮੋਸ਼ਨ 'ਚ ਰੁੱਝੀ ਹੋਈ ਜਾਨਹਵੀ ਨੇ ਵੀ ਹੁਣ ਇੰਡਸਟਰੀ 'ਚ ਚੱਲ ਰਹੇ 'ਪਰਿਵਾਰਵਾਦ' (ਨੇਪੋਟਿਜ਼ਮ) ਮੁੱਦੇ 'ਤੇ ਆਪਣੀ ਗੱਲ ਰੱਖੀ ਹੈ।
ਜਾਨਹਵੀ ਤੋਂ ਜਦੋਂ ਇਹ ਸਵਾਲ ਕੀਤਾ ਗਿਆ ਕਿ ਉਨ੍ਹਾਂ ਦੀ ਮਾਂ ਪਰਿਵਾਰਵਾਦ ਬਾਰੇ ਕੀ ਸੋਚਦੀ ਸੀ? ਇਸ ਦਾ ਜਵਾਬ ਦਿੰਦਿਆਂ ਉਨ੍ਹਾਂ ਨੇ ਕਿਹਾ, ''ਮਾਂ ਪਰਿਵਾਰਵਾਦ ਦੇ ਮੁੱਦੇ ਨੂੰ ਚੰਗੀ ਤਰ੍ਹਾਂ ਨਹੀਂ ਸਮਝ ਸਕੀ ਕਿਉਂਕਿ ਉਹ ਹਮੇਸ਼ਾ ਕਹਿੰਦੀ ਸੀ, ਤੁਹਾਨੂੰ ਬਹੁਤ ਮਿਹਨਤ ਕਰਨੀ ਹੈ। ਮਾਂ ਨੂੰ ਪਰਿਵਾਰਵਾਦ ਦੇ ਦੋਸ਼ ਤੋਂ ਇਲਾਵਾ ਇਸ ਗੱਲ ਦੀ ਫਿਕਰ ਵਧੇਰੇ ਹੁੰਦੀ ਸੀ ਕਿ ਮੇਰੀ ਤੁਲਨਾ ਉਨ੍ਹਾਂ ਨਾਲ ਹੋਵੇਗੀ। ਇਸ ਲਈ ਉਹ ਹਮੇਸ਼ਾ ਸਖਤ ਮਿਹਨਤ ਕਰਨ 'ਤੇ ਜ਼ੋਰ ਦਿੰਦੀ ਸੀ।''
ਜਾਣਕਾਰੀ ਮੁਤਾਬਕ ਜਾਨਹਵੀ ਨੇ ਜਦੋਂ ਤੋਂ ਕਰਨ ਜੌਹਰ ਦੇ ਪ੍ਰੋਡਕਸ਼ਨ ਦੀ ਫਿਲਮ 'ਧੜਕ' ਨੂੰ ਸਾਈਨ ਕੀਤੀ ਹੈ, ਉਸੇਂ ਸਮੇਂ ਤੋਂ ਇੰਡਸਟਰੀ 'ਚ ਫਿਰ ਤੋਂ ਇਹ ਦਾ ਮੁੱਦਾ ਉੱਠਣ ਲੱਗਾ। ਇੰਡਸਟਰੀ 'ਚ ਪਰਿਵਾਰਵਾਦ ਦੇ ਸਵਾਲ 'ਤੇ ਜਾਨਹਵੀ ਨੇ ਵੀ ਆਪਣੀ ਪ੍ਰਤੀਕਿਰਿਆ ਦਿੱਤੀ। ਜਾਨਹਵੀ ਨੇ ਦੱਸਿਆ, ''ਕੁਝ ਲੋਕਾਂ ਨੂੰ ਲੱਗਦਾ ਹੈ ਕਿ ਜੋ ਮੌਕਾ ਮੈਨੂੰ ਮਿਲਿਆ ਹੈ, ਉਹ ਕਿਸੇ ਤੋਂ ਖੋਹਿਆ ਗਿਆ ਹੈ, ਇਸ ਲਈ ਮੈਨੂੰ ਖੁਦ ਨੂੰ ਸਿੱਧ ਕਰਨ ਲਈ ਦੁੱਗਣੀ ਮਿਹਨਤ ਕਰਨੀ ਪਵੇਗੀ।
ਮੈਂ ਇਹ ਗੱਲ ਚੰਗੀ ਤਰ੍ਹਾਂ ਜਾਣਦੀ ਹਾਂ ਕਿ ਮੈਨੂੰ ਹੁਣ ਦੁੱਗਣੀ ਮਿਹਨਤ ਕਰਨੀ ਪਵੇਗੀ। ਇਸ ਕਾਰਨ ਮੈਂ ਇਹ ਖੁਦ ਦੀਆਂ ਜ਼ਿੰਮੇਦਾਰੀਆਂ ਨੂੰ ਸਮਝਦੀ ਹਾਂ। ਜੋ ਮੈਨੂੰ ਮੌਕਾ ਮਿਲਿਆ ਹੈ, ਮੈਂ ਕਦੇ ਵੀ ਇਸ ਦਾ ਗਲਤ ਫਾਇਦਾ ਨਹੀਂ ਚੁਕਾਂਗੀ। ਮੈਂ ਖੁਦ ਨੂੰ ਸਿੱਧ ਕਰਨ ਲਈ ਬਹੁਤ ਮਿਹਨਤ ਕਰਾਂਗੀ। ਮੈਂ ਸ਼ੁੱਕਰਗੁਜ਼ਾਰ ਹਾਂ ਕਿ ਮੈਨੂੰ ਇਹ ਮੌਕਾ ਮਿਲਿਆ।''
