ਜਲੰਧਰ (ਬਿਊਰੋ) - ਪੰਜਾਬੀ ਗਾਇਕੀ 'ਚ ਸੰਘਰਸ਼ ਕਰਨਾ ਤੇ ਕਾਮਯਾਬ ਹੋਣਾ ਬਹੁਤ ਮੁਸ਼ਕਿਲ ਹੈ। ਅਜਿਹਾ ਹੀ ਸੰਘਰਸ਼ ਕੀਤਾ ਸੀ ਗਾਇਕ ਜੱਸ ਬਾਜਵਾ ਨੇ। ਜੱਸ ਬਾਜਵਾ ਅੱਜ ਆਪਣਾ 31ਵਾਂ ਜਨਮਦਿਨ ਮਨਾ ਰਹੇ ਹਨ। ਉਨ੍ਹਾਂ ਦਾ ਜਨਮ 25 ਜੂਨ 1988 ਨੂੰ ਹੋਇਆ ਸੀ। ਜੱਸ ਬਾਜਵਾ ਦਾ ਅਸਲ ਨਾਂ ਜਸਪ੍ਰੀਤ ਸਿੰਘ ਬਾਜਵਾ ਹੈ।
ਜੱਸ ਬਾਜਵਾ ਨੇ ਪੰਜਾਬੀ ਸੰਗੀਤ ਜਗਤ ਨੂੰ ਕਈ ਹਿੱਟ ਗੀਤ ਦਿਤੇ ਪਰ ਉਨ੍ਹਾਂ ਨੂੰ ਪਛਾਣ 'ਨੋਜ਼ ਪਿੰਨ' ਗੀਤ ਨਾਲ ਮਿਲੀ। ਇਹ ਗੀਤ ਹਰ ਥਾਂ 'ਤੇ ਖੂਬ ਵੱਜਿਆ। 'ਦਿਲ ਦੇ ਰਾਜੇ', 'ਸਤਰੰਗੀ ਤਿੱਤਲੀ', 'ਯਾਰ ਬੰਬ', 'ਕਿਸਮਤ', '21 ਨੰਬਰ', 'ਫੀਮ ਦੀ ਡਲੀ' ਤੇ 'ਚੱਕਵੀਂ ਮੰਡੀਰ' ਸਮੇਤ ਕਈ ਹਿੱਟ ਗੀਤ ਦਿੱਤੇ।
ਗਾਇਕੀ ਦੇ ਨਾਲ-ਨਾਲ ਜੱਸ ਬਾਜਵਾ ਨੇ ਪੰਜਾਬੀ ਫਿਲਮਾਂ 'ਚ ਵੀ ਆਪਣੀ ਕਿਸਮਤ ਅਜ਼ਮਾਈ। ਸਾਲ 2017 'ਚ ਜੱਸ ਬਾਜਵਾ ਨੇ 'ਠੱਗ ਲਾਈਫ' ਫਿਲਮ ਨਾਲ ਪਾਲੀਵੁੱਡ 'ਚ ਡੈਬਿਊ ਕੀਤਾ ਪਰ ਫਿਲਮ ਵੱਡੀ ਕਾਮਯਾਬੀ ਹਾਸਿਲ ਨਾ ਕਰ ਸਕੀ ਪਰ ਦਰਸ਼ਕਾਂ ਨੇ ਜੱਸ ਬਾਜਵਾ ਦੀ ਅਦਾਕਾਰੀ ਦੀ ਖੂਬ ਸ਼ਲਾਘਾ ਕੀਤੀ।
ਇਸੇ ਸਾਲ ਹੀ ਜੱਸ ਬਾਜਵਾ ਨੇ ਪੰਜਾਬੀ ਸਿਨੇਮਾ ਵੱਲ ਇਕ ਹੋਰ ਕਦਮ ਵਧਾਇਆ। ਜੱਸ ਬਾਜਵਾ ਨੇ ਆਪਣੇ ਪ੍ਰੋਡਕਸ਼ਨ ਹਾਊਸ ਦੀ ਅਨਾਉਂਸਮੈਂਟ ਕੀਤੀ। 'ਪਿੰਡ ਪ੍ਰੋਡਕਸ਼ਨ' ਨਾਂ ਦੇ ਇਸ ਪ੍ਰੋਡਕਸ਼ਨ ਹਾਊਸ ਅਧੀਨ ਜੱਸ ਬਾਜਵਾ 2 ਪੰਜਾਬੀ ਫਿਲਮਾਂ ਪ੍ਰੋਡਿਊਸ ਕਰਨਗੇ। ਇਸ ਸਾਲ ਜੱਸ ਬਾਜਵਾ ਪੰਜਾਬੀ ਫਿਲਮ 'ਦੂਰਬੀਨ' 'ਚ ਵੀ ਨਜ਼ਰ ਆਉਣਗੇ, ਜਿਹੜੀ ਸਤੰਬਰ 2019 ਨੂੰ ਰਿਲੀਜ਼ ਹੋਵੇਗੀ।