ਜਲੰਧਰ (ਕਾਮਾਇਨੀ)— 6 ਅਪ੍ਰੈਲ ਨੂੰ ਰਿਲੀਜ਼ ਹੋਣ ਵਾਲੀ ਫਿਲਮ 'ਸੂਬੇਦਾਰ ਜੋਗਿੰਦਰ ਸਿੰਘ' ਦੇ ਟਰੇਲਰ ਨੂੰ ਜਿੰਨਾ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ, ਉਨਾ ਹੀ ਪਿਆਰ ਫਿਲਮ ਦੇ ਸੰਗੀਤ ਨੂੰ ਵੀ ਮਿਲ ਰਿਹਾ ਹੈ ਤੇ ਫਿਲਮ ਦਾ ਸੰਗੀਤ ਦਿੱਤਾ ਹੈ ਜੇ. ਕੇ. (ਜੱਸੀ ਕਟਿਆਲ) ਨੇ। ਇਸ ਫਿਲਮ ਦਾ ਮਿਊਜ਼ਿਕ ਕਰਨਾ ਆਪਣੇ ਆਪ 'ਚ ਇਕ ਵੱਡਾ ਚੈਲੇਂਜ ਸੀ, ਜਿਸ ਨੂੰ ਜੱਸੀ ਨੇ ਬਾਖੂਬੀ ਨਿਭਾਇਆ ਹੈ। ਅਸਲ 'ਚ ਜਿਸ ਸਮੇਂ ਫਿਲਮ ਦੀ ਸ਼ੂਟਿੰਗ ਚੱਲ ਰਹੀ ਸੀ, ਉਥੇ ਫੋਨ ਦੇ ਸਿਗਨਲ ਵੀ ਮੁਸ਼ਕਿਲ ਨਾਲ ਆਉਂਦੇ ਸਨ। ਗਿੱਪੀ ਗਰੇਵਾਲ ਮੁਸ਼ਕਿਲਾਂ ਦੇ ਨਾਲ ਪਹਾੜਾਂ 'ਤੇ ਚੜ੍ਹ ਕੇ ਫੋਨ ਦਾ ਨੈੱਟਵਰਕ ਲੈਂਦੇ ਸਨ ਤੇ ਜੱਸੀ ਨੂੰ ਫੋਨ ਕਰਕੇ ਹਾਲਾਤ ਦੱਸਦੇ ਸਨ। ਇਸ ਦੇ ਮੁਤਾਬਕ ਜੱਸੀ ਗੀਤ ਤਿਆਰ ਕਰਦਾ ਸੀ। ਜਿਥੇ ਇਕ ਪਾਸੇ ਫਿਲਮ ਦੀ ਸ਼ੂਟਿੰਗ ਚੱਲ ਰਹੀ ਸੀ, ਉਥੇ ਹੀ ਦੂਜੇ ਪਾਸੇ ਫਿਲਮ ਦਾ ਸੰਗੀਤ ਤਿਆਰ ਹੋ ਰਿਹਾ ਸੀ। ਹੁਣ ਤਕ ਫਿਲਮ ਦੇ ਚਾਰ ਗੀਤ ਰਿਲੀਜ਼ ਹੋ ਚੁੱਕੇ ਹਨ। ਪਹਿਲਾ ਗੀਤ 'ਗੱਲ ਦਿਲ ਦੀ' ਨੂੰ ਯੂਟਿਊਬ 'ਤੇ 4.8 ਮਿਲੀਅਨ, ਦੂਜੇ ਗੀਤ 'ਇਸ਼ਕ ਦਾ ਤਾਰਾ' ਨੂੰ 3.5 ਮਿਲੀਅਨ, ਤੀਜੇ ਗੀਤ 'ਹਥਿਆਰ' ਨੂੰ ਸਾਢੇ 3 ਲੱਖ ਤੇ ਅੱਜ ਹੀ ਰਿਲੀਜ਼ ਹੋਏ ਚੌਥੇ ਗੀਤ ਨੈਣਾਂ ਨੂੰ ਯੂਟਿਊਬ 'ਤੇ ਖਬਰਾਂ ਲਿਖੇ ਜਾਣ ਤਕ 16 ਲੱਖ ਤੋਂ ਵੱਧ ਵਾਰ ਦੇਖਿਆ ਜਾ ਚੁੱਕਾ ਸੀ।
ਜੱਸੀ ਤੇ ਗਿੱਪੀ ਦੇ ਆਪਸੀ ਸਬੰਧ ਵਧੀਆ ਹੋਣ ਦੀ ਖਾਸ ਵਜ੍ਹਾ ਕੰਮ ਨੂੰ ਲੈ ਕੇ ਜੱਸੀ ਦੀ ਈਮਾਨਦਾਰੀ, ਸਖਤ ਮਿਹਨਤ ਤੇ ਕ੍ਰਿਏਟੀਵਿਟੀ ਹੈ। ਜੱਸੀ ਇਸ ਤੋਂ ਇਲਾਵਾ ਚਾਰ ਬਾਲੀਵੁੱਡ ਫਿਲਮਾਂ ਦੇ ਗੀਤ ਤੇ ਕਈ ਹਿੱਟ ਪੰਜਾਬੀ ਗੀਤ ਦੇ ਵੀ ਚੁੱਕੇ ਹਨ ਤੇ ਗਾ ਵੀ ਚੁੱਕੇ ਹਨ। ਗਿੱਪੀ ਦਾ ਇਸ ਤੋਂ ਪਹਿਲਾਂ ਰਿਲੀਜ਼ ਹੋਇਆ ਗੀਤ 'ਨਈ ਛੱਡ ਦਾ' ਦਾ ਸ਼ਾਨਦਾਰ ਮਿਊਜ਼ਿਕ ਦੇ ਕੇ ਜੱਸੀ ਨੇ ਪੰਜਾਬੀ ਮਿਊਜ਼ਿਕ ਡਾਇਰੈਕਟਰ ਦੀ ਹਿੱਟ ਲਿਸਟ 'ਚ ਆਪਣਾ ਨਾਂ ਦਰਜ ਕਰਵਾ ਲਿਆ ਹੈ।
ਜੱਸੀ ਦਾ ਮੰਨਣਾ ਹੈ ਕਿ ਗਿੱਪੀ ਹਰ ਸਮੇਂ ਉਨ੍ਹਾਂ ਦੇ ਨਾਲ ਖੜ੍ਹੇ ਹਨ ਤੇ ਇਹ ਹੌਸਲਾ ਉਸ ਨੂੰ ਅੱਗੇ ਵਧਣ ਲਈ ਉਤਸ਼ਾਹਿਤ ਕਰਦਾ ਹੈ। ਪ੍ਰਮੋਸ਼ਨਜ਼ 'ਚ ਵੀ ਜੱਸੀ ਗਿੱਪੀ ਦੇ ਨਾਲ ਨਜ਼ਰ ਆਉਂਦੇ ਹਨ। ਗਿੱਪੀ ਦੀ ਆਉਣ ਵਾਲੀ ਫਿਲਮ 'ਕੈਰੀ ਆਨ ਜੱਟਾ 2' ਦਾ ਮਿਊਜ਼ਿਕ ਵੀ ਜੱਸੀ ਨੇ ਹੀ ਦਿੱਤਾ ਹੈ। ਜੱਸੀ ਆਉਣ ਵਾਲੇ ਸਮੇਂ 'ਚ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਨੂੰ ਇਕ ਵੱਖਰਾ ਮੁਕਾਮ ਦੇਣਾ ਚਾਹੁੰਦੇ ਹਨ, ਜਿਹੜਾ ਕਿ ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਨੂੰ ਇਕ ਉੱਚੇ ਤੇ ਨਵੇਂ ਪੱਧਰ 'ਤੇ ਲੈ ਕੇ ਜਾਵੇ।