ਮੁੰਬਈ (ਬਿਊਰੋ)— ਬਾਲੀਵੁੱਡ ਅਦਾਕਾਰਾ ਜੀਆ ਖਾਨ ਦਾ ਜਨਮ 20 ਫਰਵਰੀ 1988 ਨੂੰ ਨਿਊਯਾਰਕ 'ਚ ਹੋਇਆ ਸੀ। ਸਿਰਫ 25 ਸਾਲ ਦੀ ਉਮਰ 'ਚ 3 ਜੂਨ 2013 ਨੂੰ ਉਨ੍ਹਾਂ ਨੇ ਖੁਦਕੁਸ਼ੀ ਕਰ ਲਈ ਸੀ ਹਾਲਾਂਕਿ ਜੀਆ ਖਾਨ ਦੀ ਮੌਤ ਅੱਜ ਵੀ ਰਹੱਸ ਬਣੀ ਹੋਈ ਹੈ, ਜੋ ਹੁਣ ਤੱਕ ਸੁਲਝ ਨਹੀਂ ਸਕੀ ਹੈ। ਜੀਆ ਖਾਨ ਦੇ ਬੁਆਏਫ੍ਰੈਂਡ ਰਹੇ ਸੂਰਜ ਪੰਚੋਲੀ 'ਤੇ ਖੁਦਕੁਸ਼ੀ ਲਈ ਉਕਸਾਉਣ ਦਾ ਦੋਸ਼ ਹੈ। ਜੀਆ ਦੀ ਖੁਦਕੁਸ਼ੀ ਤੋਂ ਬਾਅਦ ਸੂਰਜ ਨੂੰ ਜੇਲ ਵੀ ਜਾਣਾ ਪਿਆ ਸੀ।
ਜੀਆ ਦਾ ਅਸਲੀ ਨਾਂ ਨਫੀਸਾ ਰਿਜਵੀ ਖਾਨ ਸੀ। ਇਕ ਇੰਟਰਵਿਊ ਦੌਰਾਨ ਸੂਰਜ ਨੇ ਦੱਸਿਆ ਸੀ ਕਿ ਉਹ ਫੇਸਬੁੱਕ ਰਾਹੀਂ ਇਕ-ਦੂਜੇ ਨੂੰ ਮਿਲੇ ਸਨ ਅਤੇ ਕੁਝ ਹੀ ਦਿਨਾਂ 'ਚ ਚੰਗੇ ਦੋਸਤ ਬਣ ਗਏ ਸਨ। ਹਾਲਾਂਕਿ ਸੀ. ਬੀ. ਆਈ. ਦੀ ਚਾਰਜਸ਼ੀਟ 'ਚ ਹੋਏ ਖੁਲਾਸਿਆਂ 'ਚ ਪਤਾ ਲੱਗਾ ਹੈ ਕਿ ਜੀਆ ਦੀ ਮੌਤ ਤੋਂ ਠੀਕ ਪਹਿਲਾਂ ਸੂਰਜ ਪੰਚੋਲੀ ਨਾਲ ਉਨ੍ਹਾਂ ਦੇ ਰਿਸ਼ਤੇ ਬੇਹੱਦ ਖਰਾਬ ਹੋ ਚੁੱਕੇ ਸਨ। ਜੀਆ ਖਾਨ ਅਤੇ ਸੂਰਜ ਪੰਚੋਲੀ ਦਾ ਪਿਆਰ ਵਾਲਾ ਰਿਸ਼ਤਾ ਹੁਣ ਨਫਰਤ 'ਚ ਬਦਲ ਚੁੱਕਾ ਸੀ।
ਜੀਆ ਦੀ ਮੌਤ ਤੋਂ ਇਕ ਘੰਟੇ ਪਹਿਲਾਂ ਸੂਰਜ ਨੇ ਉਸ ਨੂੰ ਜਿਸ ਤਰ੍ਹਾਂ ਦੇ ਮੈਸੇਜ ਭੇਜੇ ਸਨ, ਉਹ ਹੈਰਾਨ ਕਰਨ ਵਾਲੇ ਸਨ। ਇਹ ਮੈਸੇਜ ਬੇਹੱਦ ਗੰਦੀ ਭਾਸ਼ਾ 'ਚ ਭੇਜੇ ਗਏ ਸਨ। ਸੀ. ਬੀ. ਆਈ. ਦੀ ਚਾਰਜਸ਼ੀਟ ਮੁਤਾਬਕ ਖੁਦਕੁਸ਼ੀ ਵਾਲੇ ਦਿਨ ਜੀਆ, ਸੂਰਜ ਨੂੰ ਲਗਾਤਾਰ ਫੋਨ ਅਤੇ ਮੈਸੇਜ ਕਰ ਰਹੀ ਸੀ ਪਰ ਸੂਰਜ ਨੇ 10 ਵੱਜ ਕੇ 22 ਮਿੰਟ ਤੱਕ ਕੋਈ ਜਵਾਬ ਨਹੀਂ ਦਿੱਤਾ ਤਾਂ ਜੀਆ, ਸੂਰਜ ਦੇ ਘਰ ਹੀ ਚਲੀ ਗਈ।
ਜੀਆ ਨੇ ਜਦੋਂ ਸੂਰਜ ਦੇ ਨੌਕਰ ਤੋਂ ਸੂਰਤ ਦੇ ਬਾਰੇ 'ਚ ਪੁੱਛਿਆ ਤਾਂ ਉਸ ਨੇ ਦੱਸਿਆ ਕਿ ਫੋਨ ਸਵਿੱਚ ਆਫ ਸੀ ਅਤੇ ਉਹ ਆਪਣੇ ਪਿਤਾ ਨਾਲ ਇਕ ਮੀਟਿੰਗ 'ਚ ਹੈ। ਇਸ ਤੋਂ ਬਾਅਦ ਜੀਆ, ਸੂਰਜ ਦੇ ਘਰ ਦੇ ਬਾਹਰ ਥੋੜ੍ਹੀ ਦੇਰ ਖੜ੍ਹੀ ਰਹੀ। ਸੂਰਜ ਨੇ ਥੋੜ੍ਹੀ ਦੇਰ ਬਾਅਦ ਇਕ ਸ਼ਖਸ ਨੂੰ ਜੀਆ ਨੂੰ ਬੁਲਾਉਣ ਲਈ ਭੇਜਿਆ ਪਰ ਉਸ ਸਮੇਂ ਤੱਕ ਜੀਆ ਆਪਣੇ ਘਰ ਜਾ ਚੁੱਕੀ ਸੀ। ਸੂਰਜ ਨੇ ਜੀਆ ਨੂੰ ਫੋਨ ਕੀਤਾ ਤਾਂ ਜੀਆ ਨੇ ਫੋਨ ਨਹੀਂ ਚੁੱਕਿਆ।
ਇਸ ਤੋਂ ਬਾਅਦ ਸੂਰਜ ਨੇ ਜੀਆ ਨੂੰ ਅਸ਼ਲੀਲ ਭਾਸ਼ਾ ਦਾ ਇਸਤੇਮਾਲ ਕਰਦੇ ਹੋਏ ਮੈਸੇਜ ਕੀਤਾ, ਜਿਸ ਦੇ ਇਕ ਘੰਟੇ ਬਾਅਦ ਜੀਆ ਨੇ ਖੁਦਕੁਸ਼ੀ ਕਰ ਲਈ।
