ਮੁੰਬਈ (ਬਿਊਰੋ)— ਕੰਗਨਾ ਰਣੌਤ ਉਨ੍ਹਾਂ ਅਭਿਨੇਤਰੀਆਂ 'ਚ ਸ਼ਾਮਲ ਹੈ, ਜੋ ਆਪਣੀਆਂ ਸ਼ਰਤਾਂ 'ਤੇ ਫਿਲਮਾਂ ਕਰਦੀਆਂ ਹਨ। ਕੰਗਨਾ ਦੀਆਂ ਵਧੇਰੇ ਫਿਲਮਾਂ 'ਚ ਐਕਟਰ ਨਾਲੋਂ ਵਧ ਲਾਈਮਲਾਈਟ ਉਹ ਖੁਦ ਬਟੋਰਦੀ ਹੈ। ਸ਼ਾਇਦ ਇਹੀ ਕਾਰਨ ਹੈ ਕਿ ਉਨ੍ਹਾਂ ਦੀ ਹਰੇਕ ਫਿਲਮ 'ਚ ਦਰਸ਼ਕਾਂ ਨੂੰ ਉਨ੍ਹਾਂ ਦਾ ਵੱਖਰਾ ਰੂਪ ਦੇਖਣ ਨੂੰ ਮਿਲਦਾ ਹੈ।
ਹੁਣ ਕੰਗਨਾ ਜਲਦੀ ਹੀ ਆਪਣੀਆਂ ਦੋ ਫਿਲਮਾਂ 'ਮਣਿਕਰਣਿਕਾ' ਤੇ 'ਮੈਂਟਲ ਹੈ ਕਿਆ?' ਨਾਲ ਦਸਤਕ ਦੇਣ ਜਾ ਰਹੀ ਹੈ। ਕੰਗਨਾ ਨੂੰ ਪੂਰਾ ਭਰੋਸਾ ਹੈ ਕਿ ਦੋਵੇਂ ਫਿਲਮਾਂ ਬਾਕਸ ਆਫਿਸ 'ਤੇ ਜ਼ਰੂਰ ਚੰਗੀ ਕਮਾਈ ਕਰਨਗੀਆਂ। ਇਸੇ ਕਾਰਨ ਹੁਣ ਉਨ੍ਹਾਂ ਨੇ 'ਮੈਂਟਲ ਹੈ ਕਿਆ?' ਫਿਲਮ ਦੇ ਮੇਕਰਸ ਅੱਗੇ ਇਕ ਸ਼ਰਤ ਰੱਖ ਦਿੱਤੀ ਹੈ, ਜਿਸ ਨੂੰ ਲੈ ਕੇ ਉਹ ਕਾਫੀ ਪਰੇਸ਼ਾਨ ਹੋ ਗਏ ਹਨ।
ਕੰਗਨਾ ਨੇ ਇਸ ਫਿਲਮ ਦੇ ਮੇਕਰਸ ਨੂੰ ਕਿਹਾ ਹੈ ਕਿ ਉਹ ਹੁਣ ਇਸ ਫਿਲਮ ਦੀ ਕਮਾਈ ਦੇ ਮੁਨਾਫੇ 'ਚ ਆਪਣਾ ਹਿੱਸਾ ਲਵੇਗੀ, ਜਿਸ ਨੂੰ ਲੈ ਕੇ ਮੇਕਰਸ ਕਾਫੀ ਪਰੇਸ਼ਾਨ ਹੋ ਗਏ ਹਨ ਕਿਉਂਕਿ ਫਿਲਮ ਦੀ ਸ਼ੂਟਿੰਗ ਚੱਲ ਰਹੀ ਹੈ ਤੇ ਕਾਫੀ ਹੱਦ ਤਕ ਹੋ ਵੀ ਗਈ ਹੈ। ਮੇਕਰਸ ਨੂੰ ਡਰ ਹੈ ਕਿ ਕਿਤੇ ਉਹ ਕੋਈ ਗਲਤ ਫੈਸਲਾ ਨਾ ਲੈ ਲੈਣ। ਦੇਖਿਆ ਜਾਵੇ ਤਾਂ ਕੰਗਨਾ ਦੀਆਂ ਪਿਛਲੀਆਂ ਕੁਝ ਫਿਲਮਾਂ ਬਾਕਸ ਆਫਿਸ 'ਤੇ ਕੁਝ ਖਾਸ ਕਮਾਲ ਨਹੀਂ ਕਰ ਸਕੀਆਂ।
ਦੱਸ ਦੇਈਏ ਕਿ ਕੰਗਨਾ ਦੀ 'ਮਣੀਕਰਣਿਕਾ' ਇਕ ਪੀਰੀਅਡ ਡਰਾਮਾ ਫਿਲਮ ਹੈ, ਜਿਸ 'ਚ ਉਹ ਰਾਣੀ 'ਲਕਸ਼ਮੀ ਬਾਈ' ਦਾ ਰੋਲ ਕਰ ਰਹੀ ਹੈ। ਫਿਲਮ 'ਚ ਉਸ ਨਾਲ ਸੋਨੂੰ ਸੂਦ ਤੇ ਅੰਕਿਤਾ ਲੋਖੰਡੇ ਵੀ ਹੈ। ਦੂਜੇ ਪਾਸੇ ਫਿਲਮ 'ਮੈਂਟਲ ਹੈ ਕਿਆ?' 'ਚ ਕੰਗਨਾ ਦੂਜੀ ਵਾਰ ਸਕ੍ਰੀਨ 'ਤੇ ਰਾਜਕੁਮਾਰ ਰਾਓ ਨਾਲ ਕੰਮ ਕਰ ਰਹੀ ਹੈ।