ਮੁੰਬਈ(ਬਿਊਰੋ)— ਜਹਾਜ਼ ਯਾਤਰਾ ਦੌਰਾਨ ਛੇੜਛਾੜ ਹੋਣ ਦਾ ਦੋਸ਼ ਲਾਉਣ ਤੋਂ ਬਾਅਦ 'ਦੰਗਲ' ਫਿਲਮ ਦੀ ਅਦਾਕਾਰਾ ਜ਼ਾਇਰਾ ਵਸੀਮ ਨੂੰ ਸੋਸ਼ਲ ਮੀਡੀਆ 'ਤੇ ਲੋਕਾਂ ਵਲੋਂ ਨਿਸ਼ਾਨਾ ਬਣਾਏ ਜਾਣ ਦੀ ਆਲੋਚਨਾ ਕਰਦੇ ਹੋਏ ਅਦਾਕਾਰਾ ਕੰਗਨਾ ਰਣੌਤ ਨੇ ਕਿਹਾ ਕਿ ਲੋਕਾਂ ਨੂੰ ਉਸ 'ਤੇ ਟਿੱਪਣੀ ਕਰਨ ਤੋਂ ਬਾਜ਼ ਆਉਣਾ ਚਾਹੀਦਾ ਹੈ। 17 ਸਾਲਾ ਅਦਾਕਾਰਾ ਨੇ ਦੋਸ਼ ਲਾਇਆ ਕਿ ਸ਼ਨੀਵਾਰ ਦੀ ਰਾਤ ਨੂੰ ਦਿੱਲੀ ਤੋਂ ਮੁੰਬਈ ਜਾਣ ਦੌਰਾਨ ਜਹਾਜ਼ ਵਿਚ ਉਸ ਨਾਲ ਛੇੜਛਾੜ ਹੋਈ ਸੀ। ਉਸ ਤੋਂ ਬਾਅਦ ਲਾਈਵ ਵੀਡੀਓ ਰਾਹੀਂ ਆਪਣਾ ਤਜਰਬਾ ਦੱਸਿਆ ਸੀ।
ਉਸ ਨੇ ਦੱਸਿਆ ਸੀ ਕਿ ਉਹ ਜਦੋਂ ਦਿੱਲੀ ਤੋਂ ਮੁੰਬਈ ਜਾ ਰਹੀ ਸੀ ਤਾਂ ਪਿੱਛਿਓਂ ਇਕ ਹੋਰ ਯਾਤਰੀ ਨੇ ਆਪਣਾ ਪੈਰ ਉਸ ਦੇ ਆਰਮਰੈਸਟ 'ਤੇ ਰੱਖ ਦਿੱਤਾ ਸੀ। ਜ਼ਾਇਰਾ ਦੀ ਉਸਦੀ ਪ੍ਰਤੀਕਿਰਿਆ ਦੇ ਸਮੇਂ ਨੂੰ ਲੈ ਕੇ ਆਲੋਚਨਾ ਕੀਤੀ ਗਈ ਹੈ। ਕਈ ਲੋਕਾਂ ਨੇ ਜਹਾਜ਼ ਵਿਚ ਹੀ ਜ਼ੋਰਦਾਰ ਵਿਰੋਧ ਨਾ ਕਰਨ 'ਤੇ ਉਸ 'ਤੇ ਸਵਾਲ ਉਠਾਇਆ ਹੈ। ਕੰਗਨਾ ਨੇ ਉਸ ਦੀ ਹੋ ਰਹੀ ਆਲੋਚਨਾ 'ਤੇ ਹਮਲਾ ਕਰਦੇ ਹੋਏ ਅਤੇ ਜ਼ਾਇਰਾ ਦੀ ਪ੍ਰਸ਼ੰਸਾ ਕਰਦੇ ਹੋਏ ਕਿਹਾ ਕਿ ਉਲਟੀ ਸਲਾਹ ਦਿੱਤੇ ਜਾਣ ਤੋਂ ਬਾਅਦ ਵੀ ਆਪਣੀ ਆਪਬੀਤੀ ਬਾਰੇ ਦੱਸਣਾ ਉਸ ਦਾ ਸਾਹਸ ਹੈ। ਉਸ ਨੇ ਕਿਹਾ ਕਿ ਉਡਾਣ ਦੌਰਾਨ ਅਦਾਕਾਰਾ ਨੇ ਜਿਸ ਸ਼ੋਸ਼ਣ ਦਾ ਸਾਹਮਣਾ ਕੀਤਾ ਸੀ, ਉਸ ਦੇ ਬਾਰੇ ਉਸ ਨੇ ਦੱਸਿਆ ਪਰ ਲੋਕਾਂ ਵਲੋਂ ਇਸ ਨੂੰ ਲੈ ਕੇ ਉਸ ਨੂੰ ਨਿਸ਼ਾਨਾ ਬਣਾਉਣਾ ਬਿਲਕੁਲ ਗਲਤ ਹੈ।