ਜਲੰਧਰ (ਬਿਊਰੋ)— ਸਾਫ-ਸੁੱਥਰੀ ਗਾਇਕੀ ਨਾਲ ਹਰ ਵਰਗ ਦੇ ਪੰਜਾਬੀਆਂ ਦੇ ਦਿੱਲਾਂ 'ਤੇ ਰਾਜ ਕਰਨ ਵਾਲੇ ਮਸ਼ਹੂਰ ਗਾਇਕ ਕੰਠ ਕਲੇਰ ਦਾ ਅੱਜ 46ਵਾਂ ਜਨਮਦਿਨ ਹੈ। 'ਹੁਣ ਤੇਰੀ ਨਿਗਾਹ ਬਦਲ ਗਈ', 'ਦਸ ਅਸੀਂ ਕਿਹੜਾ ਤੇਰੇ ਬਿਨਾਂ ਮਰ ਚੱਲੇ ਆਂ', 'ਉਡੀਕਾਂ' ਅਤੇ 'ਤੇਰੀ ਯਾਦ ਸੱਜਣਾ' ਵਰਗੇ ਹਿੱਟ ਗੀਤ ਦੇ ਚੁੱਕੇ ਮਸ਼ਹੂਰ ਪੰਜਾਬੀ ਗਾਇਕ ਕੰਠ ਕਲੇਰ ਜਦੋਂ ਵੀ ਕਿਸੇ ਵਿਆਹ ਦੇ ਪ੍ਰੋਗਰਾਮ 'ਚ ਪਰਫਾਰਮੈਂਸ ਦੇਣ ਜਾਂਦੇ ਹਨ, ਤਾਂ ਦਰਸ਼ਕ ਉਨ੍ਹਾਂ ਤੋਂ ਵਿਆਹ ਦੇ ਗੀਤ ਸੁਣਨ ਤੋਂ ਬਾਅਦ ਸੈਡ ਸਾਂਗ ਦੀ ਡਿਮਾਂਡ ਜ਼ਰੂਰ ਕਰਦੇ ਹਨ।
ਦੂਜੀ ਵਾਰ ਬਦਲਿਆ ਨਾਂ
ਜਲੰਧਰ ਜ਼ਿਲੇ ਦੇ ਨਕੋਦਰ ਦੇ ਰਹਿਣ ਵਾਲੇ ਕਲੇਰ ਕੰਠ ਦਾ ਅਸਲੀ ਨਾਂ ਹਰਵਿੰਦਰ ਕਲੇਰ ਹੈ, ਜਿਸ ਨੂੰ ਉਨ੍ਹਾਂ ਨੇ ਆਪਣੀ ਪਹਿਲੀ ਐਲਬਮ ਦੌਰਾਨ ਬਦਲ ਕੇ ਕਲੇਰ ਕੰਠ ਕਰ ਦਿੱਤਾ ਪਰ ਹੁਣ ਆਪਣੇ ਗੁਰੂ ਅਤੇ ਪੀਰ ਦੇ ਕਹਿਣ 'ਤੇ ਉਨ੍ਹਾਂ ਨੇ ਆਪਣਾ ਨਾਂ ਇਕ ਵਾਰ ਫਿਰ ਤੋਂ ਬਦਲ ਕੇ ਕੰਠ ਕਲੇਰ ਰੱਖ ਦਿੱਤਾ ਹੈ।
ਪਰਿਵਾਰ 'ਚ ਕੋਈ ਗਾਇਕੀ ਨਾਲ ਸੰਬੰਧ ਨਹੀਂ ਰੱਖਦਾ
ਕਲੇਰ ਨੇ ਇਕ ਇੰਟਰਵਿਊ ਦੌਰਾਨ ਦੱਸਿਆ ਸੀ ਕਿ ਉਨ੍ਹਾਂ ਦੇ ਪਿਤਾ ਉਨ੍ਹਾਂ ਨੂੰ ਕਿਸੇ ਸਰਕਾਰੀ ਨੌਕਰੀ 'ਚ ਨਿਯੁਕਤ ਦੇਖਣਾ ਚਾਹੁੰਦੇ ਸਨ ਪਰ ਉਨ੍ਹਾਂ ਨੂੰ ਬਚਪਨ ਤੋਂ ਹੀ ਗਾਇਕੀ ਦਾ ਸ਼ੌਕ ਸੀ।
ਸਕੂਲਾਂ 'ਚ ਹੋਣ ਵਾਲੇ ਪ੍ਰੋਗਰਾਮ 'ਚ ਉਹ ਹਿੱਸਾ ਲੈਂਦੇ ਸਨ।
ਕਾਲਜ ਦੌਰਾਨ 1997 'ਚ ਇਕ ਪ੍ਰੋਗਰਾਮ ਦੌਰਾਨ ਉਨ੍ਹਾਂ ਨੂੰ ਮਸ਼ਹੂਰ ਗੀਤਕਾਰ ਮਦਨ ਜਲੰਧਰੀ ਨੇ ਦੇਖਿਆ ਅਤੇ ਉਸੇ ਸਮੇਂ ਤੋਂ ਹੁਣ ਤੱਕ ਉਨ੍ਹਾਂ ਨੇ ਕਦੇ ਪਿੱਛੇ ਮੁੜ ਕੇ ਨਹੀਂ ਦੇਖਿਆ।''
ਜ਼ਿਕਰਯੋਗ ਹੈ ਕਿ ਕਲੇਰ ਨੇ ਕਦੇ ਵੀ ਗਾਇਕੀ ਦਾ ਰਿਆਜ਼ ਨਹੀਂ ਕੀਤਾ ਬਲਕਿ ਗਾਇਕੀ ਤਾਂ ਉਨ੍ਹਾਂ ਦੇ ਖੂਨ 'ਚ ਹੈ।