ਜਲੰਧਰ— ਕੱਲ ਯਾਨੀ 28 ਜੁਲਾਈ ਨੂੰ ਪੰਜਾਬੀ ਫਿਲਮ 'ਵੇਖ ਬਰਾਤਾਂ ਚੱਲੀਆਂ' ਦੁਨੀਆ ਭਰ 'ਚ ਰਿਲੀਜ਼ ਹੋਣ ਜਾ ਰਹੀ ਹੈ। ਫਿਲਮ 'ਚ ਬੀਨੂੰ ਢਿੱਲੋਂ ਤੇ ਐੱਫ. ਆਈ. ਆਰ. ਦੀ ਚੰਦਰਮੁਖੀ ਚੌਟਾਲਾ ਯਾਨੀ ਕਵਿਤਾ ਕੌਸ਼ਿਕ ਮੁੱਖ ਭੂਮਿਕਾ ਨਿਭਾਅ ਰਹੇ ਹਨ। ਕਵਿਤਾ ਦੇ ਕਰੀਅਰ ਦੀ ਇਹ ਪਹਿਲੀ ਫਿਲਮ ਹੈ। ਫਿਲਮ ਤੇ ਬੀਨੂੰ ਢਿੱਲੋਂ ਨਾਲ ਕਵਿਤਾ ਦਾ ਇਕ ਖਾਸ ਕੁਨੈਕਸ਼ਨ ਹੈ, ਜਿਹੜਾ ਤੁਹਾਨੂੰ ਭਾਵੁਕ ਕਰ ਦੇਵੇਗਾ। ਦਰਅਸਲ ਕਵਿਤਾ ਦੇ ਪਿਤਾ ਪੁਲਸ 'ਚ ਸਨ। ਉਨ੍ਹਾਂ ਨੇ ਬਤੌਰ ਡੀ. ਐੱਸ. ਪੀ. ਪੰਜਾਬ 'ਚ ਸੇਵਾਵਾਂ ਨਿਭਾਈਆਂ। ਬਹੁਤ ਸਾਰੇ ਉਨ੍ਹਾਂ ਦੇ ਪੰਜਾਬੀ ਦੋਸਤ ਵੀ ਸਨ, ਜਿਨ੍ਹਾਂ ਨਾਲ ਉਹ ਹਾਸਾ-ਮਜ਼ਾਕ ਕਰਦੇ ਰਹਿੰਦੇ ਸਨ। ਹਾਲਾਂਕਿ ਕੈਂਸਰ ਦੇ ਚਲਦਿਆਂ ਉਨ੍ਹਾਂ ਦਾ ਪਿਛਲੇ ਸਾਲ 29 ਜੁਲਾਈ ਦੀ ਸਵੇਰ ਦਿਹਾਂਤ ਹੋ ਗਿਆ। ਪਿਛਲੇ ਸਾਲ 29 ਜੁਲਾਈ ਨੂੰ ਬੀਨੂੰ ਢਿੱਲੋਂ ਦੀ ਫਿਲਮ 'ਬੰਬੂਕਾਟ' ਰਿਲੀਜ਼ ਹੋਈ ਸੀ। ਕਵਿਤਾ ਨੇ ਕਿਹਾ ਕਿ ਇਹ ਸ਼ਾਇਦ ਉਸ ਦੇ ਪਿਤਾ ਦਾ ਪੰਜਾਬ ਨਾਲ ਪਿਆਰ ਹੀ ਸੀ, ਜਿਹੜਾ ਉਸ ਨੂੰ ਇਥੇ ਖਿੱਚ ਲਿਆਇਆ। ਉਹ ਬੀਨੂੰ ਢਿੱਲੋਂ ਨਾਲ ਵੀ ਅਕਸਰ ਇਹ ਗੱਲ ਕਰਦੀ ਰਹਿੰਦੀ ਹੈ ਕਿ ਜਿਸ ਦਿਨ ਮੇਰੇ ਪਿਤਾ ਦਾ ਦਿਹਾਂਤ ਹੋਇਆ, ਉਸੇ ਦਿਨ ਤੁਹਾਡੀ ਫਿਲਮ ਰਿਲੀਜ਼ ਹੋਈ ਸੀ। ਉਸ ਨੂੰ ਦੁੱਖ ਹੈ ਕਿ ਉਸ ਦੇ ਪਿਤਾ ਦਾ ਦਿਹਾਂਤ ਜਲਦੀ ਹੋ ਗਿਆ ਕਿਉਂਕਿ ਉਹ ਚਾਹੁੰਦੀ ਸੀ ਕਿ ਉਸ ਦੇ ਪਿਤਾ ਇਹ ਫਿਲਮ ਜ਼ਰੂਰ ਦੇਖਦੇ ਕਿਉਂਕਿ ਉਨ੍ਹਾਂ ਦਾ ਪੰਜਾਬ ਨਾਲ ਇੰਨਾ ਲਗਾਅ ਸੀ। ਕਵਿਤਾ ਨੇ ਕਿਹਾ ਕਿ ਉਸ ਦੇ ਪਿਤਾ ਜਿਹੜੀ ਵੀ ਦੁਨੀਆ 'ਚ ਹਨ, ਉਹ ਇਹ ਫਿਲਮ ਦੇਖ ਕੇ ਜ਼ਰੂਰ ਮਾਣ ਮਹਿਸੂਸ ਕਰਨਗੇ।