ਮੁੰਬਈ (ਬਿਊਰੋ)— ਬਾਲੀਵੁੱਡ ਅਦਾਕਾਰਾ ਮਾਧੁਰੀ ਦੀਕਸ਼ਿਤ ਨੇ ਆਪਣੇ ਡਾਂਸਿੰਗ ਸ਼ੋਅ 'ਡਾਂਸ ਦੀਵਾਨੇ' 'ਚ ਇਕ ਹੈਰਾਨੀਜਨਕ ਖੁਲਾਸਾ ਕੀਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਕਦੇ-ਕਦੇ ਉਨ੍ਹਾਂ ਦੇ ਬੇਟੇ ਵੀ ਉਨ੍ਹਾਂ ਨੂੰ ਅਹਿਮੀਅਤ ਨਹੀਂ ਦਿੰਦੇ। ਅਸਲ 'ਚ ਉਨ੍ਹਾਂ ਨੇ ਇਹ ਸਭ ਉਸ ਸਮੇਂ ਕਿਹਾ, ਜਦੋਂ ਇਸ ਸ਼ੋਅ ਦੇ ਇਕ ਪ੍ਰਤੀਭਾਗੀ ਕਿਸ਼ਨ ਨੇ ਆਪਣੀ ਮਾਂ ਨੂੰ ਇਕ ਪੇਸ਼ਕਾਰੀ ਸਮਰਪਿਤ ਕੀਤੀ।
ਕਿਸ਼ਨ ਦੀ ਪੇਸ਼ਕਾਰੀ ਨੇ ਉੱਥੇ ਮੌਜੂਦ ਸਾਰਿਆ ਦੇ ਦਿਲ ਜਿੱਤ ਲਏ ਅਤੇ ਸਾਰਿਆ ਦੀਆਂ ਅੱਖਾਂ 'ਚ ਹੰਝੂ ਲਿਆ ਦਿੱਤੇ। ਕਿਸ਼ਨ ਨੇ ਆਪਣੇ ਪਰਫਾਰਮੈਂਸ ਤੋਂ ਬਾਅਦ ਕਿਹਾ, ''ਮੈਨੂੰ ਆਪਣੀ ਮਾਂ ਦੇ ਫੋਨ ਨੂੰ ਨਜ਼ਰਅੰਦਾਜ਼ ਕਰਨ ਅਤੇ ਉਨ੍ਹਾਂ ਨੂੰ ਅਹਿਮੀਅਤ ਨਾ ਦੇਣ ਦਾ ਪਛਤਾਵਾ ਹੈ।'' ਇਸ 'ਤੇ ਮਾਧੁਰੀ ਨੇ ਭਾਵੁਕ ਹੁੰਦਿਆ ਕਿਹਾ, ''ਮੈਨੂੰ ਉਸ ਸਮੇਂ ਬਹੁਤ ਬੁਰਾ ਲੱਗਦਾ ਹੈ, ਜਦੋਂ ਮੇਰੇ ਦੋਵੇਂ ਬੇਟੇ ਮੈਨੂੰ ਅਹਿਮੀਅਤ ਨਹੀਂ ਦਿੰਦੇ।
ਮੈਂ ਉਨ੍ਹਾਂ ਨੂੰ ਵਾਰ-ਵਾਰ ਬੁਲਾਉਂਦੀ ਰਹਿੰਦੀ ਹਾਂ ਪਰ ਉਹ ਦੋਵੇਂ ਮੇਰੀ ਗੱਲ ਨੂੰ ਅਣਸੁਣਿਆ ਕਰ ਦਿੰਦੇ ਹਨ। ਜਦੋਂ ਮੈਂ ਛੋਟੀ ਸੀ ਤਾਂ ਮੈਂ ਵੀ ਇੰਝ ਹੀ ਕਰਦੀ ਹੁੰਦੀ ਸੀ ਪਰ ਹੁਣ ਮੈਂ ਇਕ ਮਾਂ ਹਾਂ ਅਤੇ ਮੈਨੂੰ ਪਤਾ ਹੈ ਕਿ ਅਜਿਹਾ ਕਰਕੇ ਕਿਹੋ ਜਿਹਾ ਮਹਿਸੂਸ ਹੁੰਦਾ ਹੈ।'' ਇਹ ਸਭ ਕਹਿੰਦੇ ਹੋਏ ਮਾਧੁਰੀ ਦੇ ਹੰਝੂ ਵੀ ਨਿਕਲੇ ਆਏ।
ਜ਼ਿਕਰਯੋਗ ਹੈ ਕਿ ਫਿਲਮਾਂ 'ਚ ਨਾਂ ਕਮਾਉਣ ਤੋਂ ਬਾਅਦ ਮਾਧੁਰੀ ਨੇ ਸਾਲ 1999 'ਚ ਡਾਕਟਰ ਸ਼੍ਰੀਰਾਮ ਨੇਨੇ ਨਾਲ ਵਿਆਹ ਕਰ ਲਿਆ ਸੀ। ਅੱਜਕਲ ਮਾਧੁਰੀ ਫਿਲਮਾਂ ਤੋਂ ਇਲਾਵਾ ਟੀ. ਵੀ. ਰਿਐਲਿਟੀ ਸ਼ੋਅਜ਼ 'ਚ ਬਤੌਰ ਜੱਜ ਮਾਧੁਰੀ ਹਮੇਸ਼ਾ ਨਜ਼ਰ ਆਉਂਦੀ ਰਹਿੰਦੀ ਹੈ। ਇੱਥੇ ਇਹ ਵੀ ਦੱਸਣਯੋਗ ਹੈ ਕਿ ਕਰਨ ਜੌਹਰ ਦੀ ਫਿਲਮ 'ਕਲੰਕ' 'ਚ ਮਾਧੁਰੀ ਦੀਕਸ਼ਿਤ ਅਤੇ ਸੰਜੇ ਦੱਤ ਦੀ ਜੋੜੀ 21 ਸਾਲਾਂ ਬਾਅਦ ਮੁੜ ਪਰਦੇ 'ਚ ਨਜ਼ਰ ਆਵੇਗੀ।
ਇਸ ਫਿਲਮ 'ਚ ਸਭ ਤੋਂ ਪਹਿਲਾਂ ਸ਼੍ਰੀਦੇਵੀ ਨੂੰ ਕਾਸਟ ਕੀਤਾ ਗਿਆ ਸੀ ਪਰ ਉਨ੍ਹਾਂ ਦੀ ਮੌਤ ਤੋਂ ਬਾਅਦ ਮਾਧੁਰੀ ਨੂੰ ਇਸ ਫਿਲਮ 'ਚ ਕਾਸਟ ਕੀਤਾ ਗਿਆ।